ខណៈអាកាសធាតុក្តៅខ្លាំង ចូរប្រុងប្រយ័ត្នករណីគ្រោះអគ្គីភ័យ

នៅក្នុងខណៈពេលដែលស្ថានភាពអាកាសធាតុ កំពុងតែក្តៅខ្លាំង អគ្កីភ័យបានកើតមានឡើងផ្ទួនៗ ចូរប្រុងប្រយ័ត្ន ពីព្រោះវាក៏ជាប្រភពដែលអាចសម្លាប់ជីវិតនិងបំផ្លិចបំផ្លាញទ្រព្យសម្បត្តិតែមួយប៉ប្រិចភ្នែកតែប៉ុណ្ណោះ។​

តាមសេចក្តីរាយការណ៍នៅលើបណ្តាញសង្គមនៅ ក្នុងអំឡុងពេលប្រមាណជា ៣ខែក្នុង​ឆ្នាំ២០២៥កន្លងមកនេះ គ្រោះអគ្គីភ័យគឺបានកើតមានឡើងសាហាវៗគួរសម ជាក់ស្តែងដូចជាករណីកើត ឡើងកាលពីថ្ងៃទី០១ ខែមេសា ឆ្នាំ២០២៥ នៅវេលាម៉ោង៩និង៥០នាទី​ ស្ថិតក្នុងភូមិថ្លើក ឃុំពើក​ ស្រុកអង្គស្នួល​ ខេត្តកណ្ដាល។​ គ្រោះអគ្គីភ័យនេះ បានបំផ្លាញឃ្លាំង​រោងចក្រ​ចំនួន៣ឃ្លាំង និងផ្ទះប្រជាពលរដ្ឋចំនួន៤ខ្នង។

ហើយនៅថ្ងៃទី ៣០ ខែមីនា នៅបណ្តោយផ្លូវជាតិលេខ៥ ស្ថិតនៅ ភូមិស្វាយប៉ាក សង្កាត់ស្វាយប៉ាក ខណ្ឌឬស្សីកែវ ក៏មានមួយករណីទៀត។ ករណីអគ្គីភ័យនេះ ដំបូងវាបានធ្វើឱ្យឆេះផ្ទះឈើថ្មក្រោមចំនួន ០១ខ្នង ហើយបណ្តាលឲ្យឆេះរាលដាលដល់ផ្ទះថ្មក្រោមឈើលើចំនួន ០៣ខ្នងអស់ទាំងស្រុង និងឆេះរាលដល់ជញ្ជាំងផ្ទះចំនួន ០៧ខ្នងផ្សេងទៀត។

នៅថ្ងៃទី ១៦ ខែមីនា ក៏មានករណីហេតុការណ៍អគ្គីភ័យមួយ បានឆាបឆេះរោងចក្រមួយកន្លែង ដែលមានទីតាំងស្ថិតនៅភូមិបាញ់កង្កែប ឃុំត្រពាំងគង ស្រុកសំរោងទង ខេត្តកំពង់ស្ពឺផងដែរ។

កាលពីយប់ថ្ងៃទី១១ ខែកុម្ភៈ ឆ្នាំ២០២៥ អគ្គីភ័យឆាបឆេះរោងចក្រ ហ្វ័រម៉ាត (ខេមបូឌា) នៅសង្កាត់ព្រៃស ខណ្ឌដង្កោ បណ្ដាលឱ្យខូចខាតសម្ភារៈអស់ទាំងស្រុង។ ហើយអ្វីដែលគួរឲ្យកត់សំគាល់នោះ គឺកាលពីអំឡុងពេលបុណ្យចូលឆ្នាំថ្មីប្រពៃណី​ចិននិងវៀតណាម ពីថ្ងៃទី ២៨ដល់ ថ្ងៃទី ៣០ ខែ​មករា កន្លង​មក គឺមានគ្រោះអគ្គីភ័យសរុបដល់ទៅ ២២ ករណី ហើយវាបានសម្លាប់ជីវិតមនុស្ស៣នាក់ផងដែរ។

នៅក្នុងអំឡុងអាកាសធាតុក្តៅបែបនេះ ករណីបង្កការឆាបឆេះងាយស្រួលណាស់ ដូច្នេះសូមលើកកំពស់ការប្រុងប្រយ័ត្ន​ទាំងអស់គ្នា។

មកដល់ពេលនេះមូលហេតុចម្បងបំផុតនៃករណីគ្រោះអគ្គីភ័យទាំងនេះ ភាគច្រើនគឺបណ្តាលមកពីឆ្លងចរន្តអគ្គិសនី ដូច្នេះនៅក្នុងករណីដែលគ្មានមនុស្សធ្វើការទេ ឬនៅផ្ទះ​ទេ គួរតែបិទភ្លើងនិងផ្តាច់ចរន្ត។ នៅក្នុងករណីខ្សែភ្លើងចាស់​ពុកផុយ ចេញលួសគួរលៃលករុះរើប្រព័ន្ធចាស់បំពាក់ខ្សែនិងប្រព័ន្ធថ្មី។ ​

មិនថានៅតាមផ្ទះផ្ទាល់ខ្លួន ផ្ទះជួល ឬ កន្លែងធ្វើការនោះទេ គួរតែយកចិត្តទុកដាក់ជួយពិនិត្យសុវត្ថិភាពទាំងអស់គ្នា។ កុំធ្វេសប្រហែសឲ្យសោះ ហើយនៅតាមផ្ទះឬអគាគួរតែមានបំពង់ពន្លត់អគ្គីភ័យ ដើម្បីអាចជួយអន្តរាគមន៍បានខ្លះនៅក្នុងករណីវាកើតមាន ហើយយើងអាចដឹងមុន ពេលដែលវាឆាបឆេះសន្ធោសន្ធៅ ហើយក្រៅពីចរន្តអគ្គិសនីចេញ កំទិចកំទីភ្លើងនៅតាមផ្ទះបាយ ក៏ដូចជាទៀតធូបនៅតាមទីសក្ការបូជាក៏គួរតែយកចិត្តទុកដាក់បង្ការនិងការពារលើកកំពស់ គ្រប់គ្រងដោយប្រុងប្រយ័ត្នផងដែរ។  មិនត្រឹមតែប៉ុណ្ណោះ ត្រូវទុកដាក់សារធាតុងាយឆេះ ឬងាយផ្ទុះគ្រប់ប្រភេទរួមមាន ប្រេងឥន្ធនៈ ហ្គាស ឬឧស្ម័នឱ្យបានត្រឹមត្រូវ ឬដាក់ឱ្យឆ្ងាយពីប្រភពភ្លើង ឬប្រភពកម្ដៅ ហើយមុនពេលចេញពីផ្ទះត្រូវតែបិទប្រព័ន្ធអគ្គិសនី និងពន្លត់ភ្លើងចង្ក្រាន ចង្ក្រានហ្គាសឬឧស្ម័ន ទៀន ធូប ឱ្យបានត្រឹមត្រូវ៕