GPH ថ្ងៃទី ៣៖ កាឌីណាល់ តាគ្លេ និង អាំបូ​ អញ្ជើញទ្វីបអាស៊ីឲ្យ «ចងចាំអនាគត» និង «ស្វែងរកព្រះយេស៊ូដែលមានលក្ខណៈមនុស្សឡើងវិញ»

ខណៈដែលមនុស្សរាប់ពាន់នាក់នៅតែបន្តធ្វើដំណើរក្នុង បូជនីយចរឆ្ពោះទៅក្តីសង្ឃឹមដ៏អស្ចារ្យ (GPH) នៅទីក្រុង ប៉េណាំង ថ្នាក់ដឹកនាំព្រះសហគមន៍ ដែលមានឥទ្ធិពលពីររូបនៅអាស៊ីគឺ កាឌីណាល់លីវីស អន់តូនីញ៉ូ តាគ្លេ (Luis Antonio Tagle) និង កាឌីណាល់បាប្លូ វើហ្គីលីយ៉ូ អាំបូ ដេវីឌ (Pablo Virgilio “Ambo” David) បានផ្តល់សារដ៏ជ្រាលជ្រៅមួយសម្រាប់ទ្វីបអាស៊ីមុនឆ្នាំព្រះមហាករុណាទិគុណ​ដ៏អស្ចារ្យ​ (Great Jubilee) ឆ្នាំ ២០៣៣ ដោយអំពាវនាវឲ្យអ្នកជឿបង្កើនក្តីសង្ឃឹម ស្វែងរកលក្ខណៈមនុស្សរបស់ព្រះយេស៊ូឡើងវិញ និងអនុញ្ញាតឲ្យរឿងរ៉ាវផ្ទាល់ខ្លួនរបស់ពួកគេឆ្លុះបញ្ចាំងពីអាថ៌កំបាំងនៃជំនឿ។

សន្និសីទសារព័ត៌មាននេះ ត្រូវបានធ្វើឡើងនៅថ្ងៃទី ២៩ ខែវិច្ឆិកា និងសម្របសម្រួលដោយលោកដានីញ៉ែល​ រ៉យ (Daniel Roy) ប្រធានការិយាល័យទំនាក់ទំនងសង្គមនៃភូមិភាគប៉េណាំង ដែលមាន​អ្នកសារព័ត៌មានក្នុងស្រុក និងអន្តរជាតិដែលចង់យល់ពីរបៀបដែល បូជនីយចរ នេះភ្ជាប់ទៅនឹងការធ្វើដំណើរខាងវិញ្ញាណដ៏ទូលំទូលាយ រហូត​ដល់ឆ្នាំព្រះមហាករុណាទិគុណ​ដ៏អស្ចារ្យ​ ដែលជាការរំឭកដល់ ២.០០០ ឆ្នាំដែល​ព្រះគ្រីស្តមានព្រះជន្ម​រស់ឡើងវិញ។

«ចងចាំអនាគត»៖ ការអំពាវនាវរបស់ កាឌីណាល់ តាគ្លេ សម្រាប់ក្តីសង្ឃឹម

នៅពេលត្រូវបានសួរសម្រាប់សាររបស់លោកទៅកាន់ទ្វីបអាស៊ីដោយយោងទៅលើឆ្នាំព្រះមហាករុណាទិគុណ​ដ៏អស្ចារ្យ​ ឆ្នាំ ២០៣៣ កាឌីណាល់ តាគ្លេ បាននិយាយ​អំពីពិធីអភិបូជា៖ «ព្រះគ្រីស្ត បានសុគត ហើយព្រះគ្រីស្តបានរស់ឡើងវិញហើយ ព្រះគ្រីស្តនឹងយាងមកវិញ»។

លោកបាននិយាយថា ពាក្យទាំងនេះលើសពីពិធីក្នុង​សាសនា ហើយពាក្យទាំងនេះគួរតែស្ថិតនៅជាប់​​ជីវិតអ្នកជឿម្នាក់ៗ។

លោកបានកត់សម្គាល់ថា ឆ្នាំព្រះមហាករុណាទិគុណ​ដ៏អស្ចារ្យ ​មិនមែនត្រឹមតែជាការចងចាំអតីតកាលប៉ុណ្ណោះទេ ប៉ុន្តែជាជំនួប​រវាង​ការងារសង្គ្រោះរបស់ព្រះជាម្ចាស់នៅក្នុងបច្ចុប្បន្ន និងអនាគត។

លោកបានមានប្រសាសន៍ថា «ទ្រង់បានរស់ឡើងវិញ ហើយនោះផ្តល់ឲ្យយើងនូវអនាគត» ដោយរំឭកអ្នកជឿថា ពព្រះរាជ្យ​របស់​ព្រះជាម្ចាស់គឺ ភាពជាធ្លុងតែមួយដ៏រស់រវើកដែលរួមបញ្ចូលពួកគេ។

ដោយដកស្រង់គំនិតដែលថាមនុស្សម្នាក់ត្រូវតែ «ចងចាំអនាគត» លោកបានព្រមានថា ការបាត់បង់ការមើលឃើញអនាគតធ្វើឲ្យបច្ចុប្បន្នចុះខ្សោយ។ លោកបានមានប្រសាសន៍ថា «នោះគឺជាក្តីសង្ឃឹម»។ «ព្រះយេស៊ូមិនមែនជារឿងប្រឌិតទេ។ ការរស់ឡើងវិញរបស់ទ្រង់គឺជាអនាគតរបស់យើង។ ហើយប្រសិនបើយើងភ្លេចអនាគតនោះ តើយើងដើរលើផ្លូវរបស់យើងឥឡូវនេះដោយរបៀបណា?»

កាឌីណាល់អាំបូ​៖ «អាស៊ីត្រូវតែប្រាប់រឿងរ៉ាវរបស់ព្រះយេស៊ូតាមរយៈលក្ខណៈជាមនុស្សរបស់ទ្រង់»

កាឌីណាល់អាំបូ ដេវីឌ បានគូសបញ្ជាក់ពីអំណាចនៃការនិទានរឿងនៅក្នុងជំនឿ។ ដោយនឹកឃើញដល់ការងារនៅអាមេរិកឡាទីនដែលមានចំណងជើងថា A Certain Jesus លោកបានកត់សម្គាល់ពីរបៀបដែលការពណ៌នាអំពី​ព្រះយេស៊ូតាមរយៈបទពិសោធន៍ប្រចាំថ្ងៃ ធ្វើឲ្យទ្រង់មានលក្ខណៈដែលមនុស្សអាចទាក់ទងបាន និងមានលក្ខណៈជាមនុស្ស។

លោកបានមានប្រសាសន៍ថា «ព្រះយេស៊ូដែលមានលក្ខណៈជាមនុស្ស គួរតែជាអ្នកដែលមនុស្សអាចទាក់ទងបាន ជាអ្នកដែលពួកគេអាចប៉ះបាន» ដោយសង្កត់ធ្ងន់ថា លក្ខណៈទេវភាពរបស់​ព្រះអង្គ​​ត្រូវបានចូលទៅ​តាមរយៈលក្ខណៈជាមនុស្សរបស់ទ្រង់។

សម្រាប់ទ្វីបអាស៊ី ដែលសម្បូរទៅដោយរឿងរ៉ាវ និមិត្តសញ្ញា និងការរស់នៅ​ខាងវិញ្ញាណ ផ្តល់នូវឱកាសសម្រាប់​អភិបាលកិច្ច គឺតាមរយៈការចែករំលែកពីរបៀបដែលសហគមន៍ជួបព្រះយេស៊ូនៅក្នុងជីវិតប្រចាំថ្ងៃ តាមរយៈគ្រួសារ ការរងទុក្ខ សាមគ្គីភាព និងសេចក្តីអំណរ និងតាមរយៈអ្នកជឿអាចជួយពិភពលោកឲ្យស្វែងរកព្រះយេស៊ូឡើងវិញ ទាំងទេវភាព និងភាព​ជា​មនុស្សដ៏ជ្រាលជ្រៅរបស់​ទ្រង់។

ការដើរឆ្ពោះទៅឆ្នាំ ២០៣៣ ដោយភ្នែកនៃជំនឿ

ការពិចារណារបស់ កាឌីណាល់ តាគ្លេ និងអាំបូ​ ផ្តល់ឲ្យទ្វីបអាស៊ីនូវការអញ្ជើញរួមគ្នាមួយនៅលើផ្លូវទៅកាន់ឆ្នាំព្រះមហាករុណាទិគុណ​ដ៏អស្ចារ្យ​ ឆ្នាំ ២០៣៣ គឺដើម្បីចងចាំអនាគតដោយក្តីសង្ឃឹម ដោយមើលឃើញការរស់ឡើងវិញរបស់ព្រះគ្រីស្ត​ទាំងអតីតកាល និងការសន្យា។

ដើម្បីស្វែងរកព្រះយេស៊ូឡើងវិញនៅក្នុងលក្ខណៈជាមនុស្សរបស់ទ្រង់ គឺត្រូវ​ចែករំលែករឿងរ៉ាវដែលបង្ហាញពីលក្ខណៈជាទេវភាពរបស់ទ្រង់ តាមរយៈសេចក្តីមេត្តាករុណា និងភាពស្និទ្ធស្នាល។ និងអនុញ្ញាតឲ្យសេចក្តីពិតទាំងនេះបង្កើតជីវិតផ្ទាល់ខ្លួន និងសហគមន៍ ដោយបង្កើតជាសាក្សីដ៏រស់រវើកនៃជំនឿ។

ខណៈដែល បូជនីយចរឆ្ពោះទៅក្តីសង្ឃឹមដ៏អស្ចារ្យបានធ្វើ​នៅក្នុងទីក្រុង ប៉េណាំង ឆ្នាំព្រះមហាករុណាទិគុណ​ដ៏អស្ចារ្យ​បានលេចឡើងមិនមែនជាកាលបរិច្ឆេទនៅលើប្រតិទិនទេ ប៉ុន្តែជាការធ្វើដំណើរខាងវិញ្ញាណដែលចាប់ផ្តើមឥឡូវនេះ រស់នៅតាមរយៈរឿងរ៉ាវរបស់អ្នកជឿដែលដើរជាមួយព្រះគ្រីស្ត៕