GPH ថ្ងៃទី ៣៖ ថ្នាក់ដឹកនាំព្រះសហគមន៍អាស៊ីសង្កត់ធ្ងន់ពីតម្រូវការបន្ទាន់ក្នុងការដោះស្រាយបញ្ហាសុខភាពផ្លូវចិត្តរបស់បូជាចារ្យ

សុខភាពផ្លូវចិត្តរបស់បូជាចារ្យ និងអភិបាលបានក្លាយជាប្រធានបទដ៏សំខាន់មួយក្នុងអំឡុងសន្និសីទសារព័ត៌មាននៅក្នុងព្រឹត្តិការណ៍បូជនីយចរឆ្ពោះទៅក្តីសង្ឃឹម​ដ៏អស្ចារ្យ (Great Pilgrimage of Hope - GPH) ដែលធ្វើឡើង​នៅទីក្រុងប៉េណាំង ខណៈដែលថ្នាក់ដឹកនាំព្រះសហគមន៍បានពិភាក្សាអំពីបញ្ហាប្រឈមដែលក្រុមអ្នកបួសជួបប្រទះក្នុងការថែរក្សាសុខុមាលភាពផ្លូវអារម្មណ៍ និងផ្លូវចិត្តរបស់ពួកគេ។

សន្និសីទសារព័ត៌មាននេះ ត្រូវបានសម្របសម្រួលដោយលោកដានីញ៉ែល​ រ៉យ (Daniel Roy) ប្រធានការិយាល័យទំនាក់ទំនងសង្គមនៃភូមិភាគប៉េណាំង នៅថ្ងៃទី ២៩ ខែវិច្ឆិកា ឆ្នាំ ២០២៣ នៅសណ្ឋាគារ ឌឹ ឡៃថ៍ (Light Hotel) ដោយមានវត្តមានកាឌីណាល់តាស៊ីស៊ីយ៉ូ អ៊ីសាវ គីគុឈិ (Tarcisio Isao Kikuchi) អគ្គអភិបាលនៃទីក្រុងតូក្យូ និងកាឌីណាល់សេបាស្ទៀ ហ្វ្រាន់ស៊ីស (Sebastian Francis) អភិបាលនៃទីក្រុងប៉េណាំង ដែលជាភូមិភាគម្ចាស់ផ្ទះ។ លោកទាំងពីរបានចែករំលែកបទពិសោធន៍ និងគំនិតផ្តួចផ្តើមរបស់ពួកគាត់ដែលមានគោលបំណងគាំទ្របូជាចារ្យនៅទូទាំងទ្វីបអាស៊ី។

លោកឪពុកហ្វេម៉ា ហ្វីល (Felmar Fiel, SVD) អ្នកគ្រប់គ្រងទូទៅនៃវិទ្យុវើរីតាសអាស៊ី​ (Veritas Asia) បានចោទជាសំណួរ​ទូទៅថា៖ «ជុំវិញពិភពលោក មានការព្រួយបារម្ភអំពីសុខភាពផ្លូវចិត្តរបស់បូជាចារ្យ និងសូម្បីតែអភិបាល។ តើសភាលោកអភិបាលអាស៊ីមាន​​គំនិតផ្តួចផ្តើមអ្វីខ្លះដើម្បីដោះស្រាយវា?»

បូជាចារ្យភូមិភាគប្រឈមនឹងភាពឯកោ និងសម្ពាធកើនឡើង

កាឌីណាល់គីគុឈិ បានឆ្លើយ​ចំពោះ​បញ្ហាប្រឈមដ៏ធំរបស់​បូជាចារ្យភូមិភាគ ដោយសង្កត់ធ្ងន់ថា មនុស្សជាច្រើនជួបប្រទះភាពឯកោ និងខ្វះរចនាសម្ព័ន្ធគាំទ្រជាប្រចាំ ដែលខុសពីបូជាចារ្យនៅក្នុងក្រុមបព្វជិតនៅអារ៉ាម។

លោកកាឌីណាល់​​បាន​លើកឡើងថា «បូជាចារ្យជាច្រើនគ្មាននរណាម្នាក់អាចចែករំលែក​រឿង​ក្នុង​ចិត្ត​ជាមួយទេ»។ «ប្រសិនបើពួកគេចែករំលែកការតស៊ូរបស់ពួកគេ បូជាចារ្យផ្សេងទៀតអាចមើលឃើញថា ពួកគេជាមនុស្សទន់ខ្សោយ ឬជាអ្នកបរាជ័យ។ ពួកគេមិនហ៊ាន​​បង្ហាញនូវអ្វីដែលពួកគេកំពុងប្រឈម»។ ភាពឯកោនេះបង្កើនភាពងាយរងគ្រោះរបស់ពួកគេចំពោះភាពតានតឹង និងការធ្លាក់ទឹកចិត្ត។

ចំពោះ​កត្តាមួយទៀត គឺ​សម្ពាធសាធារណៈ ដោយ​លោក​កាឌីណាល់​គីគុឈិ​ថ្លែងថា បូជាចារ្យក៏ប្រឈមមុខនឹងការចាប់​កំហុស និងការរិះគន់ពីសាធារណជនយ៉ាងខ្លាំង ជាពិសេសក្នុង​ករណីរឿង​រសើប។ លោក​បានគូសបញ្ជាក់ថា៖ «ពួកគេប្រឈមមុខនឹងការរិះគន់ប្រភេទនេះ ដោយគ្មានវិធីការពារខ្លួនឡើយ។ នេះអាចបំផ្លាញភាពធន់ផ្លូវចិត្តរបស់ពួកគេ»។

ការបណ្តុះបណ្តាលនៅទេវវិទ្យាល័យ និងការគាំទ្រស្ថាប័ន

ដើម្បីដោះស្រាយបញ្ហាទាំងនេះ គំនិតផ្តួចផ្តើមនានាកំពុងត្រូវបានពិចារណាដើម្បីបញ្ចូលការបណ្តុះបណ្តាលសុខភាពផ្លូវចិត្ត និងជំនាញទំនាក់ទំនងរវាងបុគ្គលទៅក្នុងកម្មវិធីបណ្តុះបណ្តាលនៅទេវវិទ្យាល័យ​ ដោយបង្រៀនជំនាញជាក់ស្តែងដូចជា ការទំនាក់ទំនង ការ​ស្តាប់​ និងហាត់​គុណការពារខ្លួន។ បញ្ហាប្រឈមក្នុងការអនុវត្តរឿងនេះនៅអាស៊ីបូព៌ា គឺជារបាំងភាសា ដោយសារវគ្គសិក្សាសុខភាពផ្លូវចិត្តតែងផ្តល់ជូនជាភាសាអង់គ្លេស ដែលបូជាចារ្យជាច្រើនមិនចេះនិយាយ។

កាឌីណាល់សេបាស្ទៀ ហ្វ្រាន់ស៊ីស បានសង្កត់ធ្ងន់លើសារៈសំខាន់នៃការគាំទ្រស្ថាប័ន ដោយកត់សម្គាល់ថា ទ្វីបអាស៊ីមានក្របខ័ណ្ឌដែលមានស្រាប់ ជាពិសេសនៅក្នុងប្រទេសហ្វីលីពីន និងឥណ្ឌា «ដែលបង្កើតឡើងដើម្បីជួយអ្នកបួស​ដែលមានបញ្ហាសុខភាពផ្លូវចិត្ត»។

លោកក៏បានលើកឡើងពីសុខុមាលភាពរបស់ថ្នាក់ដឹកនាំព្រះសហគមន៍ផងដែរ ដោយ​លើកឡើងថា «កាឌីណាល់ តាគ្លេ បានគូសបញ្ជាក់ថា អភិបាលក៏អាចជួបប្រទះការធ្លាក់ទឹកចិត្ត និងការអស់កម្លាំងផងដែរ។ បុរីវ៉ាទីកង់​ កំពុងស្វែងរកវិធីដើម្បីផ្តល់កន្លែងសុវត្ថិភាពសម្រាប់អភិបាលដែលត្រូវការជំនួយបែបនេះ»។

ម្យ៉ាងវិញទៀត ការគាំទ្រមូលដ្ឋានក៏មានសារៈសំខាន់ ក្នុងនោះ​លោក​កាឌីណាល់ហ្វ្រាន់ស៊ីស​ បានបញ្ចប់ដោយសង្កត់ធ្ងន់ថា «ទំនាក់ទំនងល្អរឹងមាំ​ជាមួយថ្នាក់លើ គឺជាគន្លឹះសំខាន់។ វាបង្កើតជាមូលដ្ឋានគ្រឹះសម្រាប់ការយកចិត្តទុកដាក់រវាង​អ្នកគង្វាល និងសុខុមាលភាពទូទៅ»។

ពហុវិធីសាស្រ្ត

កាឌីណាល់ទាំងពីរបានទទួលស្គាល់ថា ការដោះស្រាយបញ្ហាសុខភាពផ្លូវចិត្តរបស់អ្នកបួស គឺជាបញ្ហាដែលរសើប និងស្មុគស្មាញ។

ក្នុងនោះ​ កាឌីណាល់គីគុឈិ បានសង្កត់ធ្ងន់លើតម្រូវការយកឈ្នះលើការមាក់ងាយនៃ​វប្បធម៌ និងទីកន្លែងដែល​ពួកគេនៅ។

រីឯកាឌីណាល់ហ្វ្រាន់ស៊ីស​ បានសង្កត់ធ្ងន់លើសារៈសំខាន់នៃ​ប្រព័ន្ធគាំទ្រដែលអាចចូលដំណើរការបាន និងទំនាក់ទំនងរឹងមាំ ប្រកបដោយការទុកចិត្តនៅក្នុងព្រះសហគមន៍។

ការពិភាក្សានេះ បង្ហាញពីការយល់ដឹងកាន់តែច្រើនឡើងនៅក្នុងព្រះសហគមន៍អាស៊ី ទាក់ទងនឹងសម្ពាធដែលបូជាចារ្យ និងអភិបាលកំពុងប្រឈមមុខ។ ថ្នាក់ដឹកនាំព្រះសហគមន៍កំពុងអំពាវនាវរក ពហុ​វិធីសាស្រ្ត ដែលរួមបញ្ចូលការបង្កើនការបណ្តុះបណ្តាលនិស្សិតទេវវិទ្យាល័យ ការថែទាំសុខភាពផ្លូវចិត្តប្រកបដោយវិជ្ជាជីវៈ និងការគាំទ្រសហគមន៍ដ៏រឹងមាំ ដើម្បីដោះស្រាយតម្រូវការកើនឡើង ការពិនិត្យកាន់តែខ្លាំង និងបញ្ហាប្រឈមនៃភាពឯកោ។

សុខុមាលភាពផ្លូវចិត្តរបស់អ្នកបួស​ត្រូវបានកំណត់ថានឹងនៅតែជាកង្វល់ចម្បងសម្រាប់ថ្នាក់ដឹកនាំព្រះសហគមន៍ ដែលឆ្លុះបញ្ចាំងពីការប្តេជ្ញាចិត្តទូលំទូលាយ យកចិត្តទុកដាក់ចំពោះអ្នកបម្រើរបស់​ព្រះជាម្ចាស់​៕