រដ្ឋមន្ត្រីក្រសួងព័ត៌មាន ប្ដេជ្ញាខិតខំបង្កើនការផលិតកម្មវិធីល្អៗ សម្រាប់អប់រំកុមារឱ្យប្រព្រឹត្តអំពើល្អ
លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងថា ក្រសួងព័ត៌មាននឹងខិតខំបង្កើនការផលិតកម្មវិធីល្អៗគ្រប់រូបភាព ប្រកបដោយភាពទាក់ទាញឱ្យកាន់តែច្រើន ដើម្បីអប់រំកុមារឱ្យប្រព្រឹត្តអំពើល្អ និងលើកកម្ពស់ការយល់ដឹងរបស់ប្រជាពលរដ្ឋអំពីតម្លៃរបស់កុមារ និងអំពីបញ្ហាប្រឈមនានារបស់កុមារ។
លោកថ្លែងដូចនេះក្នុងពិធីបិទមហោស្រពតន្ត្រី និងចម្រៀងកុមារ ឆ្នាំ២០២៤ ពានរង្វាន់ក្រសួងព័ត៌មាន នាថ្ងៃទី២៧ ខែឧសភា ឆ្នាំ២០២៤ នៅទីស្តីការក្រសួងព័ត៌មាន។
លោក នេត្រ ភក្ត្រា បានបញ្ជាក់ថា ៖ «ក្រសួងព័ត៌មាន ដែលមានប្រព័ន្ធផ្សព្វផ្សាយ និងក្រុមការងារដើម្បីកុមារជាសេនាធិការ នឹងបន្តរៀបចំផលិតកម្មវិធីថ្មីបន្ថែមទៀតទាក់ទងកិច្ចការងារកុមារ បន្ទាប់ពីក្រសួងបានរៀបចំមហោស្រពតន្ត្រី និងចម្រៀងកុមារ ឆ្នាំ២០២៤ ពានរង្វាន់ក្រសួងព័ត៌មាន ឈានមកដល់ថ្ងៃបញ្ចប់ដោយជោគជ័យ»។
តាមរយៈជោគជ័យនៃដំណើរការកម្មវិធីមហោស្រពតន្រ្តី និងចម្រៀងកុមារនេះដែរ លោករដ្ឋមន្រ្តី បានលើកទឹកចិត្តឱ្យមានការប្រារព្ធធ្វើមហោស្រពចម្រៀងកុមារឱ្យបានជាប់ជារៀងរាល់ឆ្នាំ ហើយសង្ឃឹមថាថ្នាក់ដឹកនាំ មន្ត្រីរាជការ និងសប្បុរសជននានា នឹងបន្តជួយឧបត្ថម្ភជ្រោមជ្រែងដល់កម្មវិធីនេះ ដើម្បីជាឧត្តមប្រយោជន៍សម្រាប់កុមារដែលជាទំពាំងស្នងឫស្សីរបស់កម្ពុជាទៅថ្ងៃអនាគត។
ជាមួយគ្នានោះដែរ លោកក៏បានផ្ដាំផ្ញើដល់កុមារាកុមារីទាំងអស់ខិតខំកសាងខ្លួន សិក្សារៀនសូត្រដើម្បីក្លាយជាកូនល្អ សិស្សល្អ មិត្តល្អ និងពលរដ្ឋល្អ ដែលជាធនធានដ៏សំខាន់ក្នុងការរួមចំណែកអភិវឌ្ឍន៍ប្រទេសជាតិ។
យោងតាមរបាយការណ៍សង្ខេបរបស់លោកស្រី ច័ន្ទ ធី រដ្ឋលេខាធិការក្រសួងព័ត៌មាន ទទួលបន្ទុកជាប្រធានគណៈកម្មការបូកពិន្ទុក បានឱ្យដឹងថា មហោស្រពតន្ត្រី និងចម្រៀងកុមារ បានចាប់កំណើតតាំងពីឆ្នាំ១៩៨៥ រហូតមកឆ្នាំ២០១២ ក្រោមការគាំទ្រពីលោក ខៀវ កាញារីទ្ធ អតីតរដ្ឋមន្រ្តីក្រសួងព័ត៌មាន ដែលនៅបន្តគាំទ្ររហូតដល់ឆ្នាំ២០១៩ ប៉ុន្តែត្រូវផ្អាកអស់រយៈពេលជិត៣ឆ្នាំ ដោយសារការរីករាលដាលនៃជំងឺកូវីដ-១៩។
ក្នុងឆ្នាំ២០២៤នេះ មហោស្រពតន្ត្រី និងចម្រៀងកុមារ ត្រូវបានប្រារព្ធឡើងវិញក្រោមការផ្តួចផ្តើមដោយលោក នេត្រ ភក្ត្រា រដ្ឋមន្រ្តីក្រសួងព័ត៌មាន។ កុមារាកុមារីដែលបានចូលរួមប្រលងមានចំនួន៣៤ក្រុម ទំនុកច្រៀងចំនួន៦៨អត្ថបទ ដែលមានអត្ថរូប អត្ថន័យ អត្ថរសល្អៗ និងជាសារផ្តល់នូវការអប់រំ ចំណេះដឹង យ៉ាងទូលំទូលាយ គ្របដណ្តប់ទៅលើសីលធម៌ អត្តចរឹតរបស់កុមារ៕
Daily Program
