ក្រសួងសុខាភិបាលប្រជុំ ពិនិត្យវឌ្ឍភាពការងារសាងសង់អគារជីវៈសុវត្ថិភាពមន្ទីរពិសោធន៍កម្រិត៣ (BSL 3) នៃគម្រោងឆ្លើយតបបន្ទាន់នឹងជំងឺកូវីដ-១៩
នាទីស្តីការក្រសួងសុខាភិបាល កាលពីថ្ងៃទី២៧ ខែឧសភា ឆ្នាំ២០២៤ លោកស្រី យក់ សម្បត្តិរដ្ឋលេខាធិការ និងជានាយកគម្រោងឆ្លើយតបបន្ទាន់នឹងជំងឺកូវីដ-១៩ បានដឹកនាំកិច្ចប្រជុំប្រចាំខែឧសភា ដើម្បីពិនិត្យវឌ្ឍភាពការងារសាងសង់អគារជីវៈសុវត្ថិភាពមន្ទីរពិសោធន៍កម្រិត៣ (BSL 3) របស់វិទ្យាស្ថានជាតិសុខភាពសាធារណៈ នៃគម្រោងឆ្លើយតបបន្ទាន់នឹងជំងឺកូវីដ-១៩ (COVID-19 ERP)។
យោងតាមក្រសួងសុខាភិបាលបានលើកឡើងថា គោលបំណង នៃកិច្ចប្រជុំគឺដើម្បីពិនិត្យវឌ្ឍភាពការងារសាងសង់អគារជីវៈសុវត្ថិភាពមន្ទីរពិសោធន៍កម្រិត៣ (BSL 3) និងបញ្ហាប្រឈមនានាក្នុងអំឡុងពេលនៃការងារសាងសង់។
ក្រសួងបានបន្តថា កិច្ចប្រជុំក៏បានពិភាក្សារកដំណោះស្រាយ ដើម្បីជម្រុញការងារសាងសង់ឱ្យបានរលូន និងការកំណត់ផែនការដែលត្រូវអនុវត្តបន្តផងដែរ។
ជាលទ្ធផលការងារសងសង់បានដំណើរលូន និងសម្រេចបានដូចផែនការដែលបានគ្រោងទុក។
សូមបញ្ជាក់ដែរថា កិច្ចប្រជុំនេះ មានការចូលរួមពី មន្រ្តីជាន់ខ្ពស់នៃអគ្គនាយកបច្ចេកទេសសុខាភិបាល មន្រ្តីរដ្ឋបាល និងហិរញ្ញវត្ថុ នាយកវិទ្យាស្ថានជាតិសុខភាពសាធារណៈ តំណាងខាងក្រុមហ៊ុន ASBIC Construction និងក្រុមការងារបច្ចេកទេសដែលពាក់ព័ន្ធ នៃក្រសួងសុខាភិបាលជាច្រើនរូបផងដែរ៕
Daily Program
