ឯកសារថ្មីរបស់បុរីវ៉ាទីកង់បង្ហាញទាំងសក្តានុពល និងហានិភ័យនៃ AI

វ៉ាទីកង់ញូវបានរាយការណ៍ថា នៅក្នុងកំណត់ត្រាស្តីពីទំនាក់ទំនងរវាងបញ្ញាសិប្បនិមិត្ត (AI) និងបញ្ញារបស់មនុស្ស ក្រសួងទទួលបន្ទុកគោលលទ្ធិនៃជំនឿ វប្បធម៌និងអប់រំ បង្ហាញទាំងសក្តានុពល និងបញ្ហាប្រឈមនៃ AI ក្នុងវិស័យអប់រំ សេដ្ឋកិច្ច ពលកម្ម សុខភាព មនុស្ស និង ទំនាក់ទំនងអន្តរជាតិ និងសង្គ្រាម។

ប្រភពដដែលបានបន្តថា ឯកសារនេះ ត្រូវបានចេញក្រោយពេលដែលសម្តេចប៉ាបហ្រ្វង់ស៊ីស្កូ បានធ្វើការព្រមានម្តងហើយម្តងទៀតពាក់ព័ន្ធនឹង AI ។

ប្រភពដដែលបានបន្តថា ឯកសារថ្មីនេះត្រូវបានលើកឡើងជាពិសេសចំពោះ “អ្នកដែលផ្តល់សេចក្តីទុកចិត្តអំពីការអប់រំជំនឿ” ប៉ុន្តែក៏ទៅកាន់ “អ្នកដែលចែករំលែកការជឿជាក់ថាការជឿនលឿនខាងវិទ្យាសាស្ត្រ និងបច្ចេកវិទ្យាឆ្ពោះទៅរកការបម្រើមនុស្សជាតិ និងផលប្រយោជន៍រួម” ។

ប្រភពដដែលបានបន្តថា ឯកសារនេះមិនត្រឹមតែរាយបញ្ជីហានិភ័យប៉ុណ្ណោះទេ ប៉ុន្តែក៏មានបញ្ជីនៃការរីកចម្រើនដែលទាក់ទងនឹង AI ផងដែរ ដែលវាលើកទឹកចិត្តនិងបង្ហាញនូវការគាំទ្រសមិទ្ធកម្មនៃផលរីកចម្រើននៃវិទ្យាសាស្រ្ត។

ឯកសារនេះបានលើកឡើងថា AI ជាគំនិតដែលកើតឡើងពីការច្នៃប្រឌិតរបស់មនុស្ស ប៉ុន្តែវាកំពុងតែបង្កើនការព្រួយបារម្ភអំពីវិសមភាព បញ្ហាអសីលធម៌សង្គមរួមទាំងហានិភ័យដែល AI អាចត្រូវបានរៀបចំសម្រាប់ផលប្រយោជន៍ផ្ទាល់ខ្លួន ឬសាជីវកម្ម ឬដើម្បីដឹកនាំមតិសាធារណៈសម្រាប់ផលប្រយោជន៍នៃឧស្សាហកម្មជាក់លាក់មួយ។

ឯកសារនេះក៏បានសង្កត់ធ្ងន់លើភាពគ្រោះថ្នាក់នៃ ប្រព័ន្ធអាវុធស្វយ័ត ដែលមានសមត្ថភាព "កំណត់ និងវាយប្រហារគោលដៅដោយគ្មានការអន្តរាគមន៍ពីមនុស្ស ហើយ AI ក៏អាចនឹងធ្វើឲ្យមនុស្សកាន់តែឈានទៅរកភាពឯកោដ៏គ្រោះថ្នាក់​ ។ ក្រៅពីនោះវាក៏មានការសង្ស័យពាក់ព័ន្ធនឹងប្រសិទ្ធភាពនិងផលប៉ះពាល់ នៅក្នុងវិស័យសេដ្ឋកិច្ច និង ហិរញ្ញវត្ថុជាដើម ។ល។