អ្នកវិភាគ​គ្រប់រឿង លោក ជេម សុខ សុំទោសសម្តេច ហ៊ុន សែន ជាសាធារណៈ

លោក ជេម សុខ ដែលប្រជាជនខ្មែរ​ភាគច្រើន​ទាំង​ក្នុង និង​ក្រៅប្រទេសស្គាល់ថាជាអ្នកដែល​វិភាគ​ និង​រិះគន់ស្ទើរគ្រប់រឿងនោះ បាន​សរសេរសារ​សុំទោសជាសាធារណៈទៅដល់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា បន្ទាប់ពីសម្តេចតេជោប្រតិកម្មទៅលើការ​ចោទថា​សម្តេចតេជោធ្វើដំណើរទៅ​ប្រទេសចិនយ៉ាងប្រញាប់ប្រញាល់។

សម្តេចតេជោ ហ៊ុន សែន បាន​លើកឡើងនៅ​ថ្ងៃអង្គារ ទី​៣ ខែធ្នូនេះថា​លោក ជេម សុខ បាន​និយាយនៅ​ក្នុង​ប្រព័ន្ធតិកតុកថាលោកហ៊ុន សែនទៅប្រទេសចិនយ៉ាងប្រញាប់ប្រញាល់ ប៉ុន្តែសម្តេច​បានបញ្ជា​ក់​វិញថាគំរោងទស្សនកិច្ចនៅចិនរបស់សម្តេច​គឺបានរៀបចំតាំងពីជិត២ខែមុន​ ដែលជាការអញ្ជើញរបស់ប្រធានាធិបតីចិន លោក ស៊ី​ ជិនភីង។

សម្តេចថា ៖ «នេះមិនមែនជាទស្សនកិច្ចដ៏ប្រញាប់ប្រញាល់ ឬតក់ក្រហល់នោះទេ។ បងសង្ឃឹមថាប្អូនគួរឈប់ធ្វើជាអ្នកចេះគ្រប់រឿងទៀតទៅ។ ដោយប្អូនខ្លាចសម្បថបងមិនបបួលប្អូនស្បថទៀតទេព្រោះខ្លាចងាប់ឆ្កែរបស់ប្អូន»។

សម្តេច​តេជោបានបន្តទៀតថា ៖ «ជូនពរឱ្យប្អូនឆាប់ជាសះស្បើយពីជំងឺពុលទឹកមាត់ ពីជំងឺច្រណែនស្ទើរគ្រប់មនុស្ស ពិសេសជូនពរឱ្យប្អូនចេះគ្រប់រឿងថែមទៀតប្រសិនប្អូនចង់។ ពីផ្កាយព្រឹកដែលប្អូនដាក់ឈ្មោះនិងហៅបងយ៉ាងពិរោះ»។

បន្ទាប់ពីប្រធានព្រឹទ្ធសភាបាន​បញ្ជាក់​ពី​ចោទប្រកាន់នេះ​រួចហើយ លោក ជេម សុខ បានសរសេរលើបណ្តាញសង្គមហ្វេសប៊ុក​របស់លោកនៅ​ថ្ងៃដដែលដោយ​បានសូមអភ័យទោសពីសម្ដេចតេជោ បើលោកមានការខុសឆ្គងត្រង់ណា។

លោកថា ៖ «ជាការពិតណាស់ប្អូនជាមនុស្សឈឺ និងពុលទឹកមាត់ ដោយប្អូនចូលចិត្តនិយាយលេងសើចច្រើន។ ប្អូនសូមសម្ដេចបងមត្តាដល់ប្អូន សូមសម្ដេចបងមេត្តាកុំប្រកាន់ទោសអូសដំណើរ។ ប្អូនសូមអរគុណសម្ដេចបង និងសូមជូនពរសម្ដេចបងឲ្យមានសុខភាពល្អ និងកម្លាំងខ្លាំងក្លា បំពេញកិច្ចការឧត្តុងឧត្តម ដើម្បីប្រទេសជាតិ។ គួរពុំគួរសូមទានសម្ដេចបងអភ័យទោស»។

សូមបញ្ជាក់ថា សម្តេចតេជោ ហ៊ុន សែន បានដឹកនាំគណៈប្រតិភូជាន់ខ្ពស់កម្ពុជា បំពេញទស្សនកិច្ចមិត្តភាពផ្លូវការនៅប្រទេសចិន ចាប់ពីថ្ងៃទី២ ដល់ថ្ងៃទី៤ ខែធ្នូ ឆ្នាំ២០២៤។

​នៅក្នុងឱកាសទស្សនកិច្ចនេះ សម្តេចតេជោ ហ៊ុន សែន នឹងមានជំនួបទ្វេភាគី ជាមួយ លោក ស៊ី ជីនពីង អគ្គលេខាធិការនៃគណៈកម្មាធិការមជ្ឈិមបក្សកុម្មុយនីស្តចិន និងជាប្រធានាធិបតីនៃសាធារណរដ្ឋ ប្រជាមានិតចិន ព្រមទាំងមានជំនួបពិភាក្សាការងារដាច់ដោយឡែកជាមួយ លោក វ៉ាង ហ៊ូនឹង ប្រធានគណៈកម្មាធិការជាតិនៃសភាប្រឹក្សានយោបាយនៃប្រជាជនចិន និងលោក ចាវ ឡីជី ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនចិន៕