អ៊ីស្រាអែលពង្រីកប្រតិបត្តិការយោធារបស់ខ្លួន និងកិច្ចប្រជុំអំពីជម្លោះនេះនៅ សេតវិមាន

កាលពីថ្ងៃពុធ ទី២៧ ខែសីហា អ៊ីស្រាអែលបានពង្រីកប្រតិបត្តិការយោធារបស់ខ្លួននៅជុំវិញ ទីក្រុងរបស់នៃតំបន់ហ្គាហ្សា ទោះបីមានសំពាធអន្តរជាតិដើម្បីបញ្ចប់ការវាយប្រហារនេះ​ហើយអ៊ីស្រាអែក៏បរិហារការចោទប្រកាន់ប្រកាន់ថាមានគ្រោះទុរភិក្សរ​បស់ប្រជាជន​ពី​សំណាក់​អង្គការសហ​ប្រជាជាតិ​​ថា គ្មានមូលដ្ឋានពិតប្រាកដ។

យោងតាមមន្រ្តីជាន់ខ្ពស់អាម៉េរិកមួយរូបបានឲ្យដឹងថា បន្ទាប់ពី ២៣ខែ នៃសង្រ្គាមដែលបង្ក​ឡើង​ជាការវាយបកតបនឹងការវាយប្រហារ​ដោយ​បង្ហូរ​ឈាម​នៃចលនាឥស្លាមប៉ាឡេស្ទីន ហាម៉ាស​នៅលើទឹកដីអ៊ីស្រាអែលនៅថ្ងៃទី៧ ខែតុលា ឆ្នាំ២០២៣ លោកដូណាល់ ត្រាំ បាន​ចូលរួមកិច្ចប្រជុំនយោបាយមួយអំពីសង្រ្គាមនេះនៅសេតវិមាន។​ លោកស្តេវ វីតកូហ្វ បេសកជន​​ពិសេស​បានថ្លែងថា ជំនួបនេះគឺជាកិច្ចប្រជុំសំខាន់សម្រាប់ថ្ងៃខាងមុខ​នៃតំបន់​ហ្គាហ្សា ហើយ​ដែល​ប៉ុន្មានខែមកហើយដែលប្រធានាធិបតីអាម៉េរិកធ្លាប់បាននិយាយថា ចង់​ជម្លៀស​ប្រជាជន​ដើម្បី​សម្រេចគម្រោងអចលនទ្រព្យរបស់លោក។

យោងតាមអង្គការសហប្រជាជាតិ បានឲ្យដឹងថា នៅលើដែនដីផ្ទាល់ កងកម្លាំងការពារ​ប្រជាជន​ស៊ីវិលហ្គាហ្ស៉ា បានបង្ហាញថា មានអ្នក​ស្លាប់ ៣៨នាក់នៅក្នុងការទម្លាក់គ្រាប់បែក និង​​ការបាញ់របស់អ៊ីស្រាអែលលើដែនដីដែលត្រូវបានឡោមព័ទ្ធបំផ្លិចបំផ្លាញ និងរងហានិភ័យ​ជួបគ្រោះទុរភិក្ស។

ទាហានអ៊ីស្រាអែលដែលបានគ្រប់គ្រងប្រមាណ ៧៥% នៃដែនដីហ្គាហ្សា បានបញ្ជាក់ថា ខ្លួន​បាន​ធ្វើប្រតិបត្តិការនៅជាយទីក្រុងនៅហ្គាហ្ស៉ាដើម្បីបំផ្លាញមជ្ឈមណ្ឌល​ហេដ្ឋារចនាសម្ព័ន្ធ​ក្រុម​ភេរវករ។ ពួកគេបានវាយតម្លៃថា ការជម្លៀសប្រជាជនគឺជៀសមិនរួច​ពីទីក្រុងនេះ ហើយ​ដែល​ពួកគេក៏បង្ហាញថា ដែនដីនៅសល់គឺជាមូលដ្ឋាន​ធំចុងក្រោយរបស់​ក្រុម​ហាម៉ាស​នៅក្នុង​ដែន​ដីហ្គាហ្សា ដែលមានមនុស្សរាប់ពាន់អ្នកបានធ្វើការភៀសខ្លួនរួចហើយ។

លោកតាឡា អាល់ ខាទីប ប្រជាជននៅសង្កាត់ហ្ស៉ីទូននៅទីក្រុងហ្គាហ្ស៉ា បាននិយាយ​ប្រាប់​ទី​ភ្នាក់​ងារសារព័ត៌មានបារាំងតាមទូរសព្ទថា ៖ “យន្តហោះចម្បាំងបានទម្លាក់គ្រាប់បែក ហើយ​ដ្រូន​បាន​បាញ់ពេញមួយយប់។” ”យើងស្ថិតនៅក្នុងផ្ទះរបស់យើង អ្នកជិតខាងយើងខ្លះ​បាន​ចាក​ចេញ។ ប៉ុន្តែតើយើងភៀសខ្លួនទៅណា? សេចក្តីស្លាប់តាមយើង​ជានិច្ច។”

កាលពីខែមីនាបន្ទាប់ពីបានហាមឃាត់ការបញ្ជូនចូលនូវជំនួយមនុស្សធម៌មកក្នុងដែនដី​ហ្គាហ្ស៉ា អ៊ីស្រាអែលបានអនុញ្ញាតឡើងវិញនៅខែឧសភា ប៉ុន្តែវាត្រូវបានវាយតម្លៃ​ដោយ​ទីភ្នាក់ងារ​​អង្គការ​មនុស្សធម៌ថា ជំនួយគឺមិនគ្រប់គ្រាន់ទាល់តែសោះ។

នៅថ្ងៃទី២២ ខែសីហា អង្គការសហប្រជាជាតិបានប្រកាសជាផ្លូវការថា​មានគ្រោះទុរភិក្ស​នៅ​ក្នុង​ដែនដីប៉ាឡេស្ទីននេះ និងទម្លាក់ការទទួលខុសត្រូវលើអ៊ីស្រាអែល ដោយផ្អែកលើរបាយ​ការណ៍​​មួយពីអង្គការដែលជាអ្នកបញ្ចូលចំណាត់ថ្នាក់ចំណីអាហារ IPC។ នេះគឺជាអង្គការ​ដែល​​ផ្តល់អណត្តិដោយអង្គការសហប្រជាជាតិ។ អ៊ីស្រាអែល ដែលបានបញ្ជាក់ថា​មិនមាន​គ្រោះ​​ទុរភិក្សនៅហ្គាហ្សាកាលពីថ្ងៃទី២៧ ខែសីហា បានទាម​ទារ​ឲ្យ IPC ដកចេញនូវ​របាយការណ៍​ភូតកុហសរបស់ខ្លួនចេញជាបន្ទាន់។

ប៉ុន្តែរូបភាពនានារបស់ទីភ្នាក់ងារសារព័ត៌មានបារាំងបានបង្ហាញស្ទើរតែជារៀងរាល់ថ្ងៃនូវជនជាតិ​ប៉ាឡេស្ទីនជាច្រើនដែលលើកចានទទេបង្ហាញទៅកាន់អង្គការមនុស្សធម៌មិនស្វែងរក​ប្រាក់​​ចំណេញ​ដើម្បីទទួលបានចំណីអាហារនៅក្នុងទីតាំងជាច្រើននៅក្នុងដែនដីហ្គាហ្ស៉ា។

នៅពីមុខក្រុមប្រឹក្សាសន្តិសុខនៃអង្គការសហប្រជាជាតិ នាយិកានៃអង្គការ សង្រ្គោះកុមារ Save the Children លោកស្រី អ៊ីហ្គើ អាស្ហ៊ីង បានប្រកាសថា ៖ “នៅពេលមិនមានអ្វីគ្រប់គ្រាន់​បរិភោគ កុមារទទួលរងការខ្វះជីវជាតិអាហារយ៉ាងធ្ងន់ធ្ងរ បន្ទាប់មក​ពួកគេស្លាប់យឺតៗ និង​ទាំងឈឺ​ចាប់។”