អ៊ីរ៉ង់ និងសហរដ្ឋអាម៉េរិកស្ថិតនៅទីក្រុងហ្សឺណេវ ដើម្បីកិច្ចចរចាថ្មី

ជុំទី២ អ៊ីរ៉ង់ និងសហរដ្ឋអាម៉េរិក​ចាប់ផ្តើមការពិភាក្សាជាបន្តបន្ទាប់​ជាលើកទី២ កាលពីថ្ងៃ​អង្គារ ទី១៧ ខែកុម្ភៈ នៅទីក្រុងហ្សឺណេវ ដើម្បីបញ្ចៀសឲ្យឆ្ងាយ​ពីហានិភ័យ​នៃការចូលធ្វើអន្តរាគមន៍​យោធារបស់សហរដ្ឋអាម៉េរិក។ ប្រទេសសត្រូវទាំងពីរ បានចងភ្ជាប់កិច្ចសន្ទនា​កាលពីថ្ងៃទី៦ ខែកុម្ភៈ នៅ ម៉ាស្កាត រដ្ឋធានីនៃប្រទេសអូម៉ង់ បន្ទាប់ពីការកើនឡើងនូវការគំរាមកំហែងគ្នាទៅ​វិញទៅមករវាងភាគីទាំងពីរ។

នៅចំពោះមុខការចរចាថ្មីៗទាំងនេះ អ្នកនាំពាក្យក្រសួងការបរទេសអ៊ីរ៉ង់ លោក​អេស្មាអេល បាកាអេ ដែលលើកសំដីមកដោយទីភ្នាក់ងារព័ត៌មានអឺរ៉ង់ អៀណា បានឲ្យដឹងថា យើងអាច​សន្និដ្ឋាន​ដោយប្រុងប្រយ័ត្នថា ជំហររបស់អាម៉េរិកលើបញ្ហានុយក្លេអ៊ែរអ៊ីរ៉ង់ បាន​ក្លាយ​​ជាកាន់​តែ​មា​នការយល់ដឹង។

លោកដូណាល់ ត្រាំ បានដាក់សំពាធលើទីក្រុងតេអេរ៉ង់ កាលពីល្ងាចថ្ងៃអង្គារ និងបញ្ជាក់ថា ៖ “ពួក​គេ​ចង់សម្រេចបានកិច្ចព្រមព្រៀង លោកមិនគិតថា ពួកគេចង់ទទួលខុសត្រូវនូវផលវិបាក​នៅពេលដែលមិនមានកិច្ចព្រមព្រៀងនោះទេ។”

ទន្ទឹមពេល​នឹងដំណើរ​ការការទូត ក្រុមកងឆ្មាំបដិវត្តន៍​អ៊ីរ៉ង់ បានដាក់ពង្រាយនូវ​នាវា និង​ឧទ្ធម្ភាគចក្រ កាលពីថ្ងៃ​ចន្ទ ធ្វើតេស្ត៍ដ្រូន និងមីស៊ីល នៅក្នុងលំហាត់សមយុទ្ធយោធា​នៅក្នុង​តំបន់​បង្ហាញកម្លាំង​នៅក្នុងច្រកសមុទ្រយុទ្ធសាស្រ្តអ័រមូស។ ទូរទស្សន៍រដ្ឋអ៊ីរ៉ង់ បានរៀបរាប់ឲ្យ​ដឹង​ថា ការធ្វើសមយុទ្ធ​ ដែលមានរយៈពេលមិនកំណត់ មានគោលដៅរៀបចំឆ្មាំបដិវត្តន៍ ដែល​​ជា​យោធាមនោគមន៍វិជ្ជានៃសាធារណៈរដ្ឋអ៊ីស្លាម សម្រាប់ការគំរាមកំហែង​ខាងសន្តិសុខ និង​យោធា​ដែលមានសក្តានុពល។

ចំណែកទីក្រុងវ៉ាស៊ីនតុន បានថែរក្សានូវសំពាធខាងយោធា។ នាវាដឹកយន្តហោះមួយ ស្ថិតនៅ​ជានិច្ចតាមបណ្តោយឆ្មេរអ៊ីរ៉ង់ ប្រមាណ ៧០០ គម ពីឆ្នេរ និងមួយគ្រឿងទៀតកំពុងរៀបចំ​បោះ​ទីតាំង។ លោកដូណាល់ ត្រាំ ហាក់ដូចជាថែរក្សាជម្រើសរបស់លោកឲ្យនៅបើកចំហរ។

សម្រាប់កិច្ចចរចាថ្មីៗ ទាំងនេះ សហរដ្ឋអាម៉េរិក និងអ៊ីរ៉ង់ ស្ថិតនៅទីក្រុងហ្សឺណេវ ក្រោមការ​សម្រប​សម្រួលពីស្តេចស៊ុលតង់ អូម៉ង់។  យោងតាមក្រសួងការបរទេសអ៊ីរ៉ង បានឲ្យដឹងថា ប្រមុខ​ការទូតអ៊ីរ៉ង់ លោកអាបបាស អារ៉ាជី បានមកដល់ចាប់តាំងពីថ្ងៃចន្ទ មកប្រទេសស្វីស ដែល​​លោក​បានជួបសមភាគីអូម៉ង់ លោកបា អាល់ ប៊ូសៃឌី ដើម្បីពន្យល់ទស្សនៈ និងការ​ពិចារណារបស់សាធារណៈរដ្ឋឥស្លាមអ៊ីរ៉ង់​លើបញ្ហានុយក្លេអ៊ែរ និងការដកចេញនូវទណ្ឌកម្ម។ 

នៅក្នុងសេចក្តីប្រកាសមួយ លោកក៏បានលើកឡើងអំពីការប្តេជ្ញាចិត្តរបស់អ៊ីរ៉ង់​ក្នុងការធ្វើ​ការងារ​​ការទូត​នៅជុំវិញ​លទ្ធផល​សម្រាប់ធានានូវផលប្រយោជន៍ និងសិទ្ធរបស់អ៊ីរ៉ង់ សន្តិភាព និង​​ស្ថិរភាព​នៅក្នុងតំបន់”។

ប្រទេសលោកខាងលិច និងអ៊ីស្រាអែល ដែលត្រូវបានចាត់ទុកថា ជាមហាអំណាច​នុយក្លេអ៊ែរ នៅមជ្ឈិមបូព៌ា មានការសង្ស័យថា អ៊ីរ៉ង់ចង់មានអាវុធនុយក្លេអ៊ែរ។

ទីក្រុងតេអេរ៉ង់ បានបដិសេធសម្រាប់ការចិញ្ចឹមនូវមហិច្ចតានេះ ប៉ុន្តែទទូចអំពីសិទ្ធដែលមិន​អាចដកហូតបានក្នុងការអភិវឌ្ឍវិស័យនុយក្លេអ៊េរស៊ីវិល និងបង្កើនការចម្រាំងសារធាតុ​អ៊ុយរ៉ានីញ៉ូម មានជាអាទិ៍​សម្រាប់ថាមពល ដែលស្របតាមបទបញ្ញត្តិនៃសន្ធិសញ្ញាមិនសាយ​ភាយ​អាវុធនុយក្លេអ៊ែរ ដែលជាខ្លួនជាហត្ថលេខីដែរ។

ចំណែកលោកដូណាល់​ ត្រាំ ប្រធានាធិបតីអាម៉េរិក បានធ្វើការព្រមានជាច្រើនដង​បន្ទាប់ពីការ​បង្រ្កាបដោយបង្ហូរឈាមលើការធ្វើបាតុកម្មទ្រង់ទ្រាយធំនៅអ៊ីរ៉ង់កាលពីខែមករា និងបានបើក​ទ្វារចំហរសម្រាប់​ការរៀបចំការទូត ជាពិសេសអំពីកម្មវិធីនុយក្លេអ៊ែរអ៊ីរ៉ង់។ ដោយមិនមាន​កិច្ច​ព្រមព្រៀង​ ប្រធានាធិបតីអាម៉េរិកបានព្រមានអ៊ីរ៉ង់អំពីផលវិបាកដ៏ឈឺចាប់ប និងក៏បានលើក​ឡើង​ដោយចំហរកាលពីថ្ងៃចន្ទ នូវសមតិកម្ម​អំពីការផ្តួលរំលំរដ្ឋអំណាចនៅអ៊ីរ៉ង់។