អ៊ីរ៉ង់បដិសេធការវាយប្រហារលើមូលដ្ឋានទ័ពអាមេរិកនៅហ៊្សកដានី

អ៊ីរ៉ង់​បានបដិសេធ​ការ​ជាប់​ពាក់ព័ន្ធ​នឹង​ការ​វាយ​ប្រហារ​ដោយ​យន្តហោះ​គ្មាន​មនុស្ស​បើក​លើ​មូលដ្ឋាន​ទ័ព​អាមេរិក​ក្នុង​ប្រទេស​ហ្ស៊កដានី។

ព័ត៌មានលម្អិតអំពីហេតុការនេះបានលេចចេញមកថា ការវាយប្រហារដោយយន្តហោះគ្មានមនុស្សបើកនៅឯមូលដ្ឋានទ័ពអាមេរិកក្បែរព្រំដែនស៊ីរី-ហ្ស៊កដានី បានសម្លាប់ទាហានអាមេរិកបីនាក់ និងរាប់សិបនាក់ផ្សេងទៀតរងរបួស។

បន្ទាប់ពីការវាយប្រហារនេះកើតឡើងភ្លាមៗ ទីក្រុងវ៉ាស៊ីនតោនបានចោទប្រកាន់ទាហានស៊ីឈ្នួលគាំទ្រដោយអ៊ីរ៉ង់ថាជាអ្នកនៅពីក្រោយការវាយប្រហារ ដែលត្រូវបានគេគិតថាបានកំណ​ត់គោលដៅលើប្លុកបន្ទាយរបស់សហរដ្ឋអាមេរិក។

លោកប្រធានាធិបតី ចូ បៃដិន បានស្បថថា សហរដ្ឋអាមេរិកនឹងឆ្លើយតបទាន់ពេលវេលា ខណៈពេលដែលគណបក្សសាធារណរដ្ឋមួយចំនួនបានអំពាវនាវឱ្យមានការវាយប្រហារសងសឹកយ៉ាងទូលំទូលាយ។

ទោះបីជាយ៉ាងណាក៏ដោយ អ៊ីរ៉ង់បានបដិសេធថា ខ្លួនមិនបាននៅពីក្រោយឧបទ្ទវហេតុនេះទេ ហើយបានពណ៌នាការចោទប្រកាន់នេះថាគ្មានមូលដ្ឋាន ដោយនិយាយថា វាមិនជាប់ពាក់ព័ន្ធក្នុ​ងការសម្រេចចិត្តរបស់ក្រុមប្រឆាំងនោះទេ។

បេសកជនអ៊ីរ៉ង់ប្រចាំនៅអង្គការសហប្រជាជាតិ បានថ្លែងថា ទីក្រុងតេអេរ៉ង់មិនមានទំនាក់ទំនងទៅនឹងការវាយប្រហារនេះទេ ដោយបន្ថែមថាឧប្បត្តិហេតុនេះគឺជាផ្នែកមួយនៃ «ជម្លោះរវាងកងទ័ពសហរដ្ឋអាមេរិក និងក្រុមតស៊ូនៅក្នុងតំបន់ ដែលឆ្លើយតប (ជាមួយនឹង) ការវាយប្រហារសងសឹក»។​

រដ្ឋាភិបាលហ្ស៊កដានី បានថ្កោលទោសការវាយប្រហារនេះ ហើយបាននិយាយថា ខ្លួនកំពុងបន្តសហការជាមួយទីក្រុងវ៉ាស៊ីនតោន ដើម្បីការពារព្រំដែន និងប្រយុទ្ធប្រឆាំងនឹងអំពើភេរវកម្ម៕