អំពើ​ហិង្សា​សម្ព័ន្ធ​ផ្ទុះ​ឡើង​នៅ​ប៉ាពួញូហ្គីណេដោយសារបញ្ហារ៉ែខុសច្បាប់

មនុស្សចន្លោះពី ២០ ទៅ ៥០ នាក់ត្រូវបានសម្លាប់នៅក្នុងអំពើហិង្សាថ្មីមួយដែលបានកើតមានឡើងក្នុងចំណោមអ្នកជីករ៉ែខុសច្បាប់នៅក្នុងប្រទេសប៉ាពួញូហ្គីណេ។

វ៉ាទីកង់ញូវបានរាយការណ៍ថា ការប្រយុទ្ធគ្នារវាងកុលសម្ព័ន្ធដែលជាគូបដិបក្សនឹងគ្នាជុំវិញអណ្តូងរ៉ែមាសដែលមានជម្លោះបានចាប់ផ្តើមប៉ុន្មានថ្ងៃមុន និងកំពុងបន្តនៅជ្រលងភ្នំ មួយនា ភាគខាងលិចនៃប្រទេស។

នេះជាអំពើហិង្សាចុងក្រោយបង្អស់កើតឡើងតែប៉ុន្មានថ្ងៃបន្ទាប់ពីសម្តេចប៉ាប ហ្វ្រង់ស៊ីស្កូ បានមកបំពេញទស្សនៈកិច្ចនៅប្រទេសនេះ​។​

គួរំលឹកថា នៅក្នុងអំឡុងទស្សនៈកិច្ចនៅប្រទេសនេះសម្តេចប៉ាប នៅថ្ងៃទី ៦ ខែកញ្ញា បានស្នើសុំឱ្យអាជ្ញាធរធ្វើអស់ពីសមត្ថភាពដើម្បីជំរុញការអភិវឌ្ឍន៍ប្រកបដោយសមធម៌ និងការប្រើប្រាស់ធនធានធម្មជាតិរបស់ប្រទេសជាតិប្រកបដោយការទទួលខុសត្រូវ។

សម្តេចប៉ាប បានមានប្រសាសន៍ថា “វាជាក្តីសង្ឃឹមពិសេសរបស់ទ្រង់ដែលថា អំពើហិង្សាកុលសម្ព័ន្ធនឹងឈានដល់ទីបញ្ចប់ ព្រោះវាបណ្តាលឱ្យមានជនរងគ្រោះជាច្រើន រារាំងមនុស្សពីការរស់នៅដោយសន្តិភាព និងរារាំងការអភិវឌ្ឍន៍ ដូច្នេះហើយទ្រង់ក៏បាន ​អំពាវនាវ​ដល់​ស្មារតី​ទទួល​ខុស​ត្រូវ​របស់​ពលរដ្ឋនៅក្នុងប្រទេសនេះគ្នា​ក្នុង​ការ​បញ្ឈប់​ការ​រីក​រាល​ដាល​នៃ​អំពើ​ហិង្សា»៕