អាជ្ញាធរជាតិអប្សរា និង​​វិស័យឯកជន រួមគ្នា​កាត់បន្ថយ​ការបំពុលបរិស្ថាន

អាជ្ញាធរជាតិអប្សរា រួមជាមួយក្រុមហ៊ុន Guangzhou Iceberg Environmental Consulting Services Co Ltd នៅព្រឹកថ្ងៃទី២៣ ខែធ្នូ ឆ្នាំ២០២៤នេះ បានប្រគល់​ចង្រ្កានបង្កើនថាមពល កាត់បន្ថយការបំពុលបរិស្ថាន ដល់ប្រជាពលរដ្ឋចំនួន៦ភូមិ ក្នុងឃុំបាគង ស្រុកប្រាសាទបាគង ខេត្តសៀមរាប។

ពិធីនេះ​ ​ចូលរួមពីលោក គឹម សុធិន អគ្គនាយករងអាជ្ញាធរជាតិអប្សរា លោក សុខ លក្ខិណា ទីប្រឹក្សាអាជ្ញាធរជាតិអប្សរា លោក សាខុន ប៉ូរិន ប្រធានក្រុមហ៊ុន Guangzhou Iceberg Environmental Consulting Services Co Ltd លោក សូរ ប្លាតុង អភិបាលស្រុកប្រាសាទបាគង រួមជាមួយភ្ញៀវកិត្តិយស និងបងប្អូនប្រជាពលរដ្ឋជិត១,០០០គ្រួសារនៅក្នុងឃុំបាគង។

យោងតាមអាជ្ញាធរជាតិអប្សរា បាន​ឱ្យដឹងថា នេះមិនមែនជាលើកទីមួយឡើយ ដែលអាជ្ញាធរជាតិអប្សរា បានសហការជាមួយវិស័យឯកជន ដើម្បីផ្តល់ជូនចង្រ្កានបង្កើនថាមពល កាត់បន្ថយការបំពុលបរិស្ថាន ដល់ប្រជាពលរដ្ឋនៅតាមមូលដ្ឋាន។

សកម្មភាពទាំងនេះ គឺមិនត្រឹមតែបង្ហាញពីការយកចិត្តទុកដាក់របស់ថ្នាក់ដឹកនាំ ចំពោះប្រជាពលរដ្ឋក្នុងមូលដ្ឋានប៉ុណ្ណោះទេ ប៉ុន្តែក៏ជាការចូលរួមចំណែកជាមួយរាជរដ្ឋាភិបាលកម្ពុជា ក្នុងការលើកកម្ពស់ជីវភាពប្រជាពលរដ្ឋ ព្រមទាំងកាត់បន្ថយការបំពុលបរិស្ថានក្នុងសហគមន៍ផងដែរ ព្រោះថាចង្រ្កានដែលមានមាកសញ្ញាព្រៃមាន់ គឺមានលក្ខណៈបច្ចេកទេសក្នុងការកាត់បន្ថយ ដល់ការប្រើប្រាស់បរិមាណអុស និងការបំភាយកាបូនក្នុងកំរិតមួយទាបចូលទៅក្នុងបរិយាកាសជាដើម៕