អគ្គអភិបាលផូ អញ្ជើញព្រះសហគមន៍កាតូលិកអាស៊ីឲ្យមើលឃើញវិបត្តិជាឱកាស

អគ្គអភិបាលស៊ីមូន ផូ​ (Simon Poh) នៃភូមិភាគ​គូឈីង (Kuching) ប្រទេស​ម៉ាឡេស៊ី​ បានមានប្រសាសន៍ថា វិបត្តិមិនមែនគ្រាន់តែជាគ្រោះថ្នាក់នោះទេ ប៉ុន្តែជាទ្វារដែលព្រះសហគមន៍កាតូលិកអាចរីកចម្រើនបាន ដោយជំរុញឲ្យបរិស័ទ​កាតូលិកអាស៊ីហ៊ានប្រឈមមុខនឹងបញ្ហាប្រឈមទំនើបដោយជំនឿ និងក្តីសង្ឃឹម។

នៅក្នុងសុន្ទរកថាគន្លឹះ «ធ្វើដំណើរជាមួយគ្នាជាប្រជាជនអាស៊ី» កាលពីថ្ងៃទី ២៨ ខែវិច្ឆិកា ដែលជាថ្ងៃទីពីរនៃ បូជនីយចរឆ្ពោះទៅក្តីសង្ឃឹមដ៏អស្ចារ្យ (Great Pilgrimage of Hope) នៅក្រុងប៉េណាំង អគ្គអភិបាលផូ​ ដែលជាប្រធានសភាលោកអភិបាល​ម៉ាឡេស៊ី និងជាប្រធានការិយាល័យផ្សាយដំណឹងល្អនៃសភាលោកអភិបាល​អាស៊ី​ បានបញ្ជាក់អំពី​ពាក្យចិន 危机 (wéi jī)។ ខណៈពេលដែល 危 បង្ហាញពីគ្រោះថ្នាក់ 机 ចង្អុលទៅចំណុចរបត់លាក់កំបាំង ដែលជាឱកាសកំពុងរង់ចាំឲ្យ​លេចចេញជារូបរាង។

លោកបានមានប្រសាសន៍ថា៖ «នៅក្នុងវិបត្តិគ្រប់យ៉ាង មានទាំងគ្រោះថ្នាក់ និងឱកាស»។

អគ្គអភិបាល​ ផូ បានសង្កត់ធ្ងន់ថា វិបត្តិមិនមែនជាការរំខានទេ ប៉ុន្តែជាការអញ្ជើញ។ វាគឺជាពេលដែលព្រះជាម្ចាស់បើកផ្លូវឲ្យ​យើង ហើយ​ប្រហែល​ជា​យើងមើលមិនឃើញភ្លាមៗឡើយ។

លោកបានមានប្រសាសន៍ថា៖ «នៅក្នុងការតស៊ូគ្រប់យ៉ាង ព្រះជាម្ចាស់បានដាំគ្រាប់ពូជថ្មី»។

ព្រះសហគមន៍កាតូលិកនៅអាស៊ី៖ ប្រវត្តិសាស្រ្តនៃការសាកល្បង និងភាពធន់ស្ងប់ស្ងាត់

ការឆ្លុះបញ្ចាំងរបស់អគ្គអភិបាល​លើ wéi jī ក្លាយជាការពិចារណាលើភាពធន់របស់បរិស័ទ​កាតូលិកអាស៊ី ដែលបានរីកចម្រើនក្នុង​ការលំបាករាប់សតវត្សរ៍។ នៅទូទាំងទ្វីបអាស៊ី ព្រះសហគមន៍កាតូលិកនៅតែមានចំនួនតិចតួច ប៉ុន្តែមានសក្ខីភាពជ្រាលជ្រៅ ដោយជារឿយៗរីកចម្រើនបំផុតក្នុងអំឡុងពេលនៃការបៀតបៀន ភាពអស្ថិរភាព ឬការសង្ស័យខាងវប្បធម៌។

គ្រីស្តបរិស័ទដែលលាក់ខ្លួននៅក្នុងប្រទេសជប៉ុន និងកូរ៉េ បានរក្សាជំនឿអស់ជាច្រើនជំនាន់។ សហគមន៍នៅប្រទេសឥណ្ឌា ស្រីលង្កា និងហ្វីលីពីនបានស៊ូទ្រាំនឹងអាណានិគម ជម្លោះ និងភាពចលាចល ហើយនៅក្នុងប្រទេសម៉ាឡេស៊ី ភូមា វៀតណាម និងទីម័រខាងកើត ក្រុមសាសនទូតបានកសាងស្ថាប័នសំខាន់ៗនៅកណ្តាលនៃជំងឺរាតត្បាត និងភាពខ្វះខាត។ នេះគឺជាជំនឿដែលត្រូវបានបង្កើតឡើងតាមរយៈការស៊ូទ្រាំ ដោយ​មាន​ឪពុកម្តាយបង្រៀនការអធិស្ឋានដោយសម្ងាត់ លោក​គង្វាលដើរទៅកាន់ភូមិនានាដាច់ស្រយាល ហើយបព្វជិតបានរួចជីវិតពីសង្គ្រាម និងភាពក្រីក្រ។

ជាថ្មីម្តងទៀត អ្វីដែលមើលទៅដូចជាឧបសគ្គបានក្លាយជាគ្រាប់ពូជថ្មី ដោយឆ្លុះបញ្ចាំងពីការពិតរបស់ wéi jī៖ គ្រោះថ្នាក់ និងលទ្ធភាពឈរនៅក្បែរគ្នា។

ដំណើររបស់ម៉ាឡេស៊ី៖ កំណើនលើដីមិនស្មើគ្នា

ព្រះសហគមន៍កាតូលិកនៅប្រទេសម៉ាឡេស៊ីឆ្លុះបញ្ចាំងពីគំរូអាស៊ីដ៏ទូលំទូលាយនៃកំណើនតាមរយៈទុក្ខលំបាក។

ការផ្លាស់ទីលំនៅដោយសារសង្គ្រាម ការធ្វើចំណាកស្រុកក្នុងទីក្រុងយ៉ាងឆាប់រហ័ស ភាពរសើបខាងជាតិសាសន៍ និងការផ្លាស់ប្តូរប្រជាសាស្រ្ត បានធ្វើឱ្យជីវិតកាតូលិកមានការលំបាកជាញឹកញាប់ ប៉ុន្តែបញ្ហាប្រឈមនីមួយៗបានបង្កឱ្យមានទម្រង់ថ្មីនៃការបម្រើ ដែលកើត​មាន​ដូចជា​ គំនិតផ្តួចផ្តើមយុវជន ការទៅដល់ជនចំណាកស្រុក បេសកកម្មជនជាតិដើមភាគតិចនៅរដ្ឋសាបា (Sabah) និងសារ៉ាវ៉ាក (Sarawak) និងភាពជាអ្នកដឹកនាំជនសាមញ្ញដ៏រឹងមាំ។

ដូចជាប្រទេសអាស៊ីជាច្រើនដែរ សាសនាកាតូលិកម៉ាឡេស៊ីបានចាក់ឫសនៅលើដីមិនស្មើគ្នា ដោយរីកចម្រើនដោយសារតែបរិស័ទកាតូលិក​របស់ខ្លួនបដិសេធមិនព្រមចុះចាញ់ ដែលបង្កប់នូវ​អត្ថន័យ​នៃ​​តួអក្សរចិនសម្រាប់ «វិបត្តិ»៖ ពេលវេលាដែលគ្រោះថ្នាក់ និងលទ្ធភាពរួមរស់ជាមួយគ្នា។ នេះ​បើ​តាម​ការ​បញ្ជាក់​ពី​អគ្គអភិបាល​ផូ។

វិបត្តិទំនើប៖ បញ្ហាប្រឈម និងលទ្ធភាពលាក់កំបាំង

អគ្គអភិបាល​ផូ បានពន្យល់ថា វិបត្តិសព្វថ្ងៃ។ លោកបានចង្អុលទៅលើសម្ពាធដ៏ធំទូលាយដែលបរិស័ទ​កាតូលិកអាស៊ីកំពុង​ប្រឈមមុខ ក្នុងនោះ​មាន​ យុវជនរសាត់ចេញពីជីវិតសហគមន៍ អត្រា​បព្វជិតធ្លាក់ចុះ ការធ្លាក់ចុះអត្រាកំណើត វិសមភាពសេដ្ឋកិច្ច ការធ្វើចំណាកស្រុក ផលប៉ះពាល់អាកាសធាតុ គ្រួសារតានតឹង ការរំខានឌីជីថល គ្រោះថ្នាក់បរិស្ថាន ការកើនឡើងនៃលោកិយនិយម ការរឹតត្បិតលើការផ្សាយដំណឹងល្អ និងការរើសអើងប្រឆាំងនឹងគ្រីស្តបរិស័ទ​ដែល​ជា​សំឡេង​ភាគតិចក្នុងសង្គម។

លោកបានមានប្រសាសន៍ថា បញ្ហាប្រឈមនីមួយៗឆ្លុះបញ្ចាំងពីអត្ថន័យទ្វេដងរបស់ wéi jī៖ គ្រោះថ្នាក់ទាក់ទងនឹងលទ្ធភាពនៃការកែប្រែថ្មី។

លោកបានមានប្រសាសន៍ថា៖ «គ្រប់ឧបសគ្គទាំងអស់មានទ្វារ។ វិបត្តិគ្រប់យ៉ាងមានចំណុចស្នូលដែលព្រះជាម្ចាស់អាចប្រែក្លាយអ្វីដែលមើលទៅដូចជាការធ្លាក់ចុះទៅជាកំណើន និងការផ្លាស់ប្តូរ»។

ពេលកិច្ចការប្រកាសដំណឹងល្អ​ធ្វើ​មិន​កើត

អគ្គអភិបាល​ ផូ បានរំលឹកដល់អ្នកជឿអំពីអត្តសញ្ញាណសាសនទូត​របស់ព្រះសហគមន៍កាតូលិក ដោយរំលឹកដល់ឯកសារ​ប្រកាសដំណឹងល្អ​របស់​សម្តេចប៉ាប​ហ្វ្រង់ស៊ីស្កូលេខ៤៩ (Pope Francis’ Evangelii Gaudium, 49) ដែល​បាន​ចែង​ថា៖ «ខ្ញុំចូលចិត្តព្រះសហគមន៍កាតូលិកដែលមានស្នាម​ជាំ ឈឺចាប់ និងកខ្វក់ដោយសារតែបានចេញទៅតាមដងផ្លូវ ជាជាងព្រះសហគមន៍កាតូលិកដែលគ្មានសុខភាពល្អដោយ​បាន​ឃុំ​ខ្លួន​នៅមួយកន្លែង និងប្រកាន់ខ្ជាប់នូវសន្តិសុខផ្ទាល់ខ្លួន»។

លោកបានកត់សម្គាល់ថា នៅក្នុងផ្នែកជាច្រើននៃទ្វីបអាស៊ី ដែលការផ្សាយដំណឹងល្អដោយបើកចំហត្រូវបានរឹតត្បិត គ្រោះថ្នាក់គឺពិត ប៉ុន្តែឱកាសក៏ពិតប្រាកដដែរ។ បរិបទបែបនេះអំពាវនាវដល់គ្រីស្តបរិស័ទផ្សព្វផ្សាយតាមរយៈ សកម្មភាព។

លោក​បាន​បញ្ជាក់ថា ដោយរស់នៅប្រកបដោយក្តីមេត្តា យុត្តិធម៌ និងការគោរពចំពោះសេចក្តីថ្លៃថ្នូររបស់មនុស្ស។

ទោះបីជាការប្រកាសដំណឹងល្អ​មិន​​អាចទៅរួចក៏ដោយ ព្រះសហគមន៍កាតូលិកបន្តប្រាប់រឿងរ៉ាវរបស់ព្រះគ្រីស្តតាមរយៈសក្ខីភាព សហគមន៍ និងការរស់នៅ​ដោយស្មោះត្រង់ប្រចាំថ្ងៃ ដោយឆ្លុះបញ្ចាំងពីកិច្ចការប្រកាសដំណឹងល្អ​នៅ​អាស៊ី​ (Ecclesia in Asia)។

ក្នុងស្មារតីនេះ អគ្គអភិបាលផូ បានមានប្រសាសន៍ថា ជនជាតិអាស៊ីត្រូវតែរៀន «ធ្វើជាសក្ខីភាព និង 'ខ្សឹប' ដំណឹងល្អ» មិនមែនតាមរយៈភាពស្ងៀមស្ងាត់នោះទេ ប៉ុន្តែតាមរយៈជីវិតដែលត្រូវបានផ្លាស់ប្តូរដោយការជួបផ្ទាល់ជាមួយព្រះគ្រីស្ត។

វិបត្តិជាទ្វារឆ្ពោះទៅរកការកែប្រែថ្មី

ដោយភ្ជាប់ការយល់ដឹងរបស់អាស៊ីអំពី wéi jī ទៅនឹងបេសកកម្មរបស់ព្រះសហគមន៍កាតូលិកនាពេលបច្ចុប្បន្ននេះ អគ្គអភិបាលផូ បានអំពាវនាវដល់គ្រីស្តបរិស័ទ​កាតូលិកឱ្យប្រឈមមុខនឹងវិបត្តិទំនើបដោយក្តីសង្ឃឹម និងការច្នៃប្រឌិត។ ដូចដែលមនុស្សជំនាន់មុនបានជួបប្រទះការបៀតបៀន ការផ្លាស់ទីលំនៅ និងភាពក្រីក្រដោយភាពក្លាហាន និងការអត់ធ្មត់ គ្រីស្តបរិស័ទសព្វថ្ងៃត្រូវតែហ៊ាន​ដើរចូល​ទៅ​កាន់​ប្រវត្តិសាស្ត្រ​ទាំងនោះ ដោយ​​ស្មារតីអត់ធ្មត់ដូចគ្នា។

លោកបានមានប្រសាសន៍ថា៖ «ដរាបណាជំនឿនៅមានជីវិត វិបត្តិគ្រប់យ៉ាងអាចក្លាយជាចំណុចរបត់។ ហើយចំណុចរបត់គ្រប់យ៉ាងអាចក្លាយជាទ្វារដែលព្រះសហគមន៍កាតូលិកលូតលាស់»៕