អគ្គអភិបាលកាតូលិក​ក្រុង​សេអ៊ូល​ថា ការរក្សា​សិទ្ធិ​មនុស្ស​ចំ​ពេល​មាន​ជម្លោះ​សង្គមគឺសំខាន់

លោកអគ្គអភិបាលនៃព្រះសហគមប៍កាតូលិកនៅទីក្រុងសេអ៊ូលនៃប្រទេសកូរ៉េខាងត្បូងបានជំរុញឱ្យគ្រីស្តបរិស័ទ​បង្កើតសង្គមមួយ ដែលគាំទ្រការរក្សាសិទ្ធិរបស់មនុស្សគ្រប់រូប ចំពេលមានជម្លោះសង្គម និងការប្រឈមមុខគ្នាជាច្រើននាពេលបច្ចុប្បន្ននេះ។

នៅក្នុងសារ សម្រាប់បុណ្យរោយផេះកាលពីពេលថ្មីៗនេះ លោកអគ្គអភិបាល ភីធ័រ ជន សុនតៃ (Peter Chung Soon-taick) បាននិយាយថា រដូវកាលនេះយើងត្រូវតែយកចិត្តទុកដាក់រិះគិតមិនត្រឹមតែលើបញ្ហាផ្ទាល់ខ្លួនប៉ុណ្ណោះទេ ប៉ុន្តែថែមទាំងលើការផ្លាស់ប្តូរសង្គមផងដែរ។

លោកអគ្គអភិបាលបានមានប្រសាសន៍ថា ចំពេលមានជម្លោះសង្គម និងការប្រឈមមុខដាក់គ្នា យើងត្រូវឆ្លុះបញ្ចាំងពីរបៀបដែលយើងកំពុងខិតខំបង្កើតសង្គមមួយ ក្នុងនាម​ជាប្រជានុរាស្រ្តដ៏មានតម្លៃរបស់ព្រះជាម្ចាស់ និងយកចិត្តទុកដាក់ចំពោះគ្នាទៅវិញទៅមក ទោះបីយើង​មាន​គំនិតខុសគ្នា មុខតំណែងផ្សេងគ្នា និងរស់នៅ​ក្នុង​កាលៈទេសៈខុសគ្នាក៏ដោយ។

លោកអគ្គអភិបាលក៏​បានបង្ហាញក្តីសង្ឃឹមរបស់គាត់ថា ពិធីបុណ្យរោយផេះនេះ នឹងក្លាយជាពេលវេលាដើម្បីជំនះការបែកបាក់​និងជម្លោះនៅក្នុងសង្គម ដោយការរួបរួមនៅក្នុងសេចក្តីស្រឡាញ់របស់ព្រះ​ជាម្ចាស់ ​ដូចសម្តេចប៉ាប​បានមានបន្ទូលថា សូមឱ្យយើងចងចាំថា ចំណេះដឹង ការអភ័យទោស និងការឆ្ពោះទៅរកការផ្សះផ្សាមិនមែនគ្រាន់តែជាគុណធម៌ផ្ទាល់ខ្លួនប៉ុណ្ណោះទេ ប៉ុន្តែជាផ្លូវទៅកាន់ការព្យាបាលសម្រាប់សហគមន៍ និងសង្គមរបស់យើង៕