អគ្គស្នងការដ្ឋាននគរបាលជាតិ ប្ដេជ្ញាចាត់វិធានការជំនាញ និងវិធានការច្បាប់ក្នុងការបង្ការ ទប់ស្កាត់ និងបង្ក្រាបនូវរាល់សកម្មភាពក្មេងទំនើង

​ក្នុងអំឡុងពេលចុងក្រោយនេះ សង្កេតឃើញថា សកម្មភាពក្មេងទំនើងបានកើតមានឡើងជាញឹកញាប់ និងមានចរិតកាចសាហាវគួរឱ្យព្រួយបារម្ភ ធ្វើឱ្យបាត់បង់សណ្តាប់ធ្នាប់ បង្កឱ្យមានកា​រភ័យខ្លាច និងជះឥទ្ធិពលដល់បរិយាកាសសន្តិសុខ និងសណ្តាប់ធ្នាប់សង្គម ព្រមទាំងរំខានដល់ការរស់នៅរបស់ ប្រជាពលរដ្ឋនៅមូលដ្ឋាន។

ដើម្បីដោះស្រាយបញ្ហាទាំងនេះ អគ្គស្នងការដ្ឋាននគរបាលជាតិ បាន​ប្ដេជ្ញាចិត្តយ៉ាងមុតមាំ ដោ​យចាត់គ្រប់វិធានការជំនាញ និងវិធានការច្បាប់ ក្នុងការបង្ការ ទប់ស្កាត់ និងបង្ក្រាបនូវរាល់ស​កម្មភាពក្មេងទំនើង ឱ្យបានម៉ឹងម៉ាត់ និងហ្មត់ចត់បំផុត ដើម្បីពង្រឹងសន្តិសុខ សណ្តាប់ធ្នាប់សាធា​រណៈ និងសុវត្ថិភាពសង្គម។

ការប្តេជ្ញានេះធ្វើឡើងបន្ទាប់​ពី​​សម្តេចធិបតីនាយករដ្ឋមន្ត្រី ហ៊ុន ម៉ាណែត បញ្ជាឱ្យ​គ្រប់​គណៈអភិបាលរាជធានីខេត្ត​ទាំងអស់​ ចាត់វិធានការឱ្យបានម៉ឺងម៉ាត់ លើក្មេងទំនង ក្មេងមានដាវសាំម៉ូរ៉ៃ។

អគ្គស្នងការដ្ឋាននគរបាលជាតិ បាន​​អំពាវនាវដល់សាធារណជន គ្រប់គ្រឹះស្ថានសិក្សា មាតាបិតា អាណាព្យាបាលទាំងអស់ សូមចូលរួមក្នុងការអប់រំ ណែនាំ ប្រៀនប្រដៅដល់សិស្សានុសិ​ស្ស បុត្រធីតា របស់ខ្លួន ឱ្យបានល្អ មានសុជីវធម៌ ចរិយាសម្បត្តិសមរម្យ ថ្លៃថ្នូរ ស័ក្តិសមជាយុវជនទំពាំងស្នងឫស្សី ជាសសរទ្រូងនៃ ប្រទេសជាតិ។

​ទន្ទឹមនេះ អគ្គស្នងការដ្ឋាននគរបាលជាតិ ក៏ស្នើសុំដល់អាជ្ញាធរដែនដីគ្រប់លំដាប់ថ្នាក់ ត្រូវបង្កើ​ននូវកិច្ចសហការដឹកនាំសកម្មភាពការងារក្នុងការបង្ការ ទប់ស្កាត់ និងបង្ក្រាបសកម្មភាពក្មេងទំ​នើងឱ្យបានដាច់ខាត ដើម្បីរួមចំណែកជំរុញចលនាអនុវត្តគោលនយោបាយ «ភូមិ-ឃុំ-សង្កាត់ មា​នសុវត្ថិភាព» ឱ្យទទួល បានជោគជ័យ។

សូមបញ្ជាក់ដែរថា ប្រមុខរាជរដ្ឋាភិបាល សម្តេចធិបតីនាយករដ្ឋមន្រ្តី ហ៊ុន ម៉ាណែត បានបញ្ជា​ទៅដល់​គ្រប់គណៈអភិបាល​រាជ​ធានីខេត្ត​ទូទាំងប្រទេស ត្រូវ​រឹតបន្តឹង​ឲ្យបានម៉ឺងម៉ាត់បំផុត ចំពោះ​ក្មេងទំនើង ដោយត្រូ​វតែចាត់វិធានការឲ្យបានទាន់ពេលវេលាដោយមិនត្រូវលើកលែងនោះឡើយ។

ការបញ្ជាដូចនេះធ្វើឡើងនាព្រឹកថ្ងៃទី​២៣ ខែឧសភា នេះ ក្នុង​ពិធីប្រកាសដាក់ឱ្យអនុវត្តជាផ្លូវការផែនទីបង្ហាញផ្លូវឆ្ពោះទៅ​ការគ្របដណ្តប់សុខភាពជាសកលនៅកម្ពុជាឆ្នាំ២០២៤-២០៣៥។

សម្តេចមានប្រសាសន៍ថា ៖ «ក្នុងនាមប្រមុខរាជរដ្ឋាភិបាលកម្ពុជា ខ្ញុំសូមចេញបញ្ជាឱ្យគណៈអភិបាលនៃអភិបាលរាជធានីខេត្តទាំងអស់ ជាមួយនឹងសមត្ថកិច្ចពាក់ព័ន្ធត្រូវតែរឹតបន្តឹងវិធានការឱ្យបានម៉ឺងម៉ាត់បំផុតចំពោះក្រុមក្មេងទំនើង ជាពិសេសក្រុមដាវសាំម៉ូរ៉ៃ»៕