ស្រ្តីមេធាវីជាតិហ្វីលីពីនម្នាក់ត្រូវ​តែងតាំងក្នុងក្រុមប្រឹក្សាភិបាលនៃធនាគារវ៉ាទីកង់

លោកស្រី​ សីឡា ម៉ារី យូរៀត តាន់ (Sheila Marie L. Uriarte-Tan) ដែលជាមេធាវីជនជាតិហ្វីលីពីនមួយរូបត្រូវបានតែងតាំងជាសមាជិកថ្មីនៃក្រុមប្រឹក្សាភិបាលនៃគណៈកម្មការគ្រប់គ្រងធនាគារដែលត្រូវបានគេស្គាល់ថាជាធនាគារវ៉ាទីកង់។

លោកស្រីត្រូវបានគេបង្ហាញពីទំនុកចិត្តចំពោះតួនាទីថ្មី ក្រោយពេលដែលលោកស្រី មានបទពិសោធន៍ជាង៣០ឆ្នាំក្នុងវិស័យធនាគារ និងការគ្រប់គ្រងទ្រព្យសកម្ម នៅក្នុងនាមជាមេធាវីអាជីពមួយរូប។

លោកស្រីត្រូវបានគណៈកម្មការនាយករបស់ធនាគារទទួលស្គាល់ថា ជាបុគ្គលមានបទពិសោធដ៏គួរឱ្យចាប់អារម្មណ៍ និងជំនាញភាពជាអ្នកដឹកនាំរបស់លោកស្រីនៅក្នុងធនាគារអន្តរជាតិ និងហិរញ្ញវត្ថុ ហើយគេរំពឹងថា ចំណេះនិងជំនាញនេះនឹងជួយ​ឲ្យធនាគារវ៉ាទីកង់មានសេវាកម្មកាន់តែ​ប្រសើរឡើង។

ក្រុមប្រឹក្សាភិបាលធនាគារមានជំនឿថា លោកស្រី តាន់ នឹងអាចជួយពង្រឹងធនាគាររបស់បុរីវ៉ាទីកង់។

លោកស្រី តាន់ គឺ​ជា​សមាជិក​ក្រុមប្រឹក្សាអគ្គអភិបាល​ហិរញ្ញវត្ថុ​នៃ​ទីក្រុង​ម៉ានីល ជា​អ្នក​គ្រប់គ្រង និង​ជា​សមាជិក​គណៈកម្មាធិការ​ប្រតិបត្តិ​សម្រាប់​ទាំង​មជ្ឈមណ្ឌល​កាតូលិករបស់​សម្តេចប៉ាប​ពីយ៉ូស​ទី​១២ និង​មូលនិធិសាន់​ហ័ន ដឺ​ឌីយ៉ូស អ៊ីឌីយ៉ូខេសិន ហ្វោនដេសិន (San Juan de Dios Educational Foundation) នៅ​ទីក្រុង​ម៉ានីល។

លោកស្រី ក៏បានបម្រើការជាប្រធាន និងជានាយកប្រតិបត្តិនៃសាជីវកម្មគ្រប់គ្រងទ្រព្យសកម្ម របស់ធនាគារ Philippine Islands  និងកាន់តួនាទីប្រតិបត្តិនៅសាជីវកម្ម BPI Capital៕