ស្រ្តីជាតិអាមេរិកម្នាក់​ ត្រូវតែងតាំងជាសមាជិកនៃក្រសួង​សម្រាប់​ប្រណិប័តន៍ជំនឿ និង​ក្រឹត្យវិន័យ​នៃអគ្គសញ្ញា

សាស្រ្តាចារ្យខាងទេវវិទ្យាជនជាតិ​អាមេរិកមួយរូបត្រូវបានសម្តេច​ប៉ាប ហ្វ្រង់ស៊ីស្កូ តែងតាំងឲ្យក្លាយជាសមាជិកនៃក្រសួង​សម្រាប់​ប្រណិប័តន៍ជំនឿ និង​ក្រឹត្យវិន័យ​នៃអគ្គសញ្ញា(Dicastery for Divine Worship and the Discipline of the Sacraments)។ នេះបើតាមសេចក្តីរាយការណ៍របស់ទីភ្នាក់ងារព័ត៌មានកាតូលិក។

អ្នកស្រី ម៉ារី ហៀលី (Mary Healy)ដែលជាសាស្រ្តាចារ្យផ្នែកទេវវិទ្យានៅសាលាទេវវិទ្យាល័យនៅក្នុងរដ្ឋ​មីស៊ីហ្គេន សហរដ្ឋអាមេរិក​ ត្រូវបានប្រកាសកាលពីថ្ងៃទី ១១ ខែមករា ឆ្នាំ២០២៥ កន្លងទៅថ្មីៗនេះ។​

អ្នកស្រី​នឹងក្លាយជាសមាជិកនៃទីប្រឹក្សារបស់សម្តេចប៉ាបទាក់ទងនឹងការអនុវត្តនិងជំរុញការផ្សព្វផ្សាយក៏ដូចជាប្រកាសដំណឹងល្អពាក់ព័ន្ធនឹងអគ្គសញ្ញា​ ពិធីបុណ្យ​ក្នុង​ព្រះសហគមន៍​ និងការអប់រំជំនឿរបស់ព្រះសហគមន៍នៅអាមេរិកឡាទីន។

អ្នកស្រី ម៉ារី ហៀលី ត្រូវបានគេដឹងថា ជាសមាជិកម្នាក់នៅក្នុងចំណោមបុគ្គលសំខាន់ៗជាង១០នាក់ ក្នុងនោះ​មាន​កាឌីណាល់ លោកអភិបាល​ បូជាចារ្យ និង គ្រហស្ថ។

អ្នកស្រី ត្រូវបានគដឹងថា គឺជាពលរដ្ឋអាមេរិកដែលកើតនៅអាមេរិក និង បានបញ្ចប់សញ្ញាប័ត្របណ្ឌិតពីសកលវិទ្យាល័យកាតូលិករបស់​សន្តអាសនៈ Pontifical Gregorian University៕