សម្តេចប៉ាបអធិស្ឋានសុំសន្តិភាពក្នុងប្រទេសកុងហ្គោ ខណៈក្រុមឧទ្ទាមវាយលុកក្រុងហ្គោម៉ា
សម្តេចប៉ាប ហ្វ្រង់ស៊ីស្កូកាលពីថ្ងៃទី២៩ ខែមករា បានអធិដ្ឋានជូនដល់ជនស៊ីវិលនៅទីក្រុងហ្គោម៉ា ក្នុងសាធារណរដ្ឋប្រជាធិបតេយ្យកុងហ្គោ ខណៈក្រុមឧទ្ទាមវាយលុកទីក្រុងភាគខាងកើតដែលជាប់ព្រំដែនប្រទេសរ៉ូវ៉ាន់ដា។
វ៉ាទីកង់ញូវបានរាយការណ៍ថា សម្តេចប៉ាបបានមានបន្ទូលថា “ទូលបង្គំជាខ្ញុំអធិដ្ឋាន និង បួងសួងឲ្យមានការស្តារឡើងវិញនូវសន្តិភាព និងសន្តិសុខយ៉ាងឆាប់រហ័ស។ ទូលបង្គំជាខ្ញុំសូមអំពាវនាវដល់អាជ្ញាធរមូលដ្ឋាន និងសហគមន៍អន្តរជាតិ ខិតខំប្រឹងប្រែងដើម្បីដោះស្រាយជម្លោះតាមរយៈមធ្យោបាយសន្តិវិធី”។
សម្តេចប៉ាប ព្រួយបារម្ភចំពោះស្ថានភាពកាន់តែអាក្រក់នៅក្នុងសាធារណរដ្ឋប្រជាធិបតេយ្យកុងហ្គោ ដោយជំរុញឱ្យភាគីទាំងអស់ស្វែងរកសន្តិភាព និងការពារជនស៊ីវិលនៅក្នុងទីក្រុងហ្គោម៉ា និងតំបន់ជុំវិញ។
ការប្រយុទ្ធគ្នាបានកើនឡើងនៅក្នុងទីក្រុងហ្គោម៉ា ខណៈដែលក្រុមឧទ្ទាម M23 បានប្រយុទ្ធជាមួយកងកម្លាំងរដ្ឋាភិបាលដើម្បីគ្រប់គ្រងរដ្ឋធានីនៃខេត្តគីវូខាងជើង ( North Kivu)ដែលមានប្រជាជនប្រមាណជា២លាននាក់។
ក្រុមឧទ្ទាម M23 បានរឹបអូសយកអាកាសយានដ្ឋានកាលពីថ្ងៃអង្គារ ហើយចាប់តាំងពីពេលនោះមកបានស្វែងរកការបង្រួបបង្រួមការគ្រប់គ្រងរបស់ខ្លួនលើហ្គោម៉ា។
នៅក្នុងហេតុការណ៍នេះ អ្នកគ្រប់គ្រងព្រះសហគមន៍កាតូលិកនៅតំបន់ជម្លោះបានអះអាងថា ពលរដ្ឋ រងការបាញ់ផ្លោងជាបន្តបន្ទាប់ ហើយសូម្បីតែអគារនៅក្នុងព្រះសហគមន៍ក៏រងគ្រោះដោយការបាញ់ផ្លោងដាក់គ្នានេះដែរ ស្របពេលដែលពលរដ្ឋប្រមាណជា១លាននាក់ហើយដែលបានចាកចេញពីលំនៅស្ថាននៅក្នុងទីក្រុង៕
Daily Program
