សម្តេច​ប៉ាប​បន្ត​អធិដ្ឋាន​សុំ​សន្តិភាព​នៅ​ស៊ូដង់ ខណៈ​មនុស្ស​រាប់​លាន​នាក់​ប្រឈម​នឹង​គ្រោះទុរ្ភិក្ស

សម្តេច​ប៉ាប ហ្វ្រង់ស៊ីស្កូបាន ជំរុញឲ្យ​មេដឹកនាំ​ពិភពលោក​ឱ្យ​ជួយស្វែងរក​សន្តិភាព​នៅក្នុង ​ជ​ម្លោះ​នីស៊ូដង់ ខណៈ​អង្គការ​មនុស្សធម៌​និយាយ​ថា ពេលវេលា​អស់​ហើយ​សម្រាប់​មនុស្ស​រាប់លាន​នាក់​ក្នុង​ប្រទេស​អាហ្វ្រិកមួយនេះ។

សម្តេចប៉ាបបានមានបន្ទូលថា ៖ «ទូលបង្គំជាខ្ញុំសូមអញ្ជើញអ្នករាល់គ្នាឱ្យអធិស្ឋានសម្រាប់ប្រទេសស៊ូដង់ ជាកន្លែងដែលសង្រ្គាមដែលអូសបន្លាយជាងមួយឆ្នាំមកនេះ មិនទាន់រកឃើញដំណោះស្រាយដោយសន្តិវិធីនៅឡើយ ហើយសូមគ្រប់ភាគីរក្សាភាពស្ងៀមស្ងាត់»។

ថ្លែងនៅទីលានសន្តសិលា សម្តេច​ប៉ាប​បាន​ជំរុញ​មេដឹកនាំ​អន្តរជាតិ​និង​អាជ្ញាធរ​ស៊ូដង់​ឲ្យ​ជួយ​ស៊ូដង់​និង​ជនភៀសខ្លួន​ជាច្រើនលាន​នាក់។

ទ្រង់បានបន្ថែមថា ៖ «សូមឱ្យជនភៀសខ្លួនស៊ូដង់ស្វែងរកការស្វាគមន៍ និងការការពារនៅក្នុងប្រទេសជិតខាង»។

សម្តេច​ប៉ាប ក៏​បានអធិដ្ឋានទូលអង្វរ ​សុំ​សន្តិភាព​នៅ​ក្នុងប្រទេស​​អ៊ុយក្រែន ប៉ាឡេស្ទីន អ៊ីស្រាអែល និង​មីយ៉ាន់ម៉ាផងដែរ។

ទ្រង់បានមានបន្ទូលថា ៖ «ទូលបង្គំខ្ញុំសូមអំពាវនាវដល់ភាពឆ្លាតវៃរបស់មេដឹកនាំ ឲ្យបញ្ឈប់អំពើហិង្សា ហើយជំរុញនូវរាល់ការខិតខំប្រឹងប្រែងដែលអាចបង្កើនការ សន្ទនា និងការចរចាដើម្បីសន្តិភាព»។

នៅពេលដែលសម្តេចប៉ាបបានអំពាវនាវរកសន្តិភាព ពេលវេលាហាក់ដូចជាកំពុងអស់សម្រាប់មនុស្សរាប់លាននាក់នៅក្នុងប្រទេសស៊ូដង់ ដែលប្រឈមនឹងគ្រោះទុរ្ភិក្ស។

ឥឡូវនេះ នៅពេលដែលសង្រ្គាមកាន់តែអូសបន្លាយ អង្គការមនុស្សធម៌បានបញ្ជូនការព្រមានយ៉ាងម៉ឺងម៉ាត់ ដោយនិយាយថា ភាគីសង្រ្គាមកំពុងរារាំងជំនួយមិនឱ្យទៅដល់ប្រជាជន។

ការជូនដំណឹងចុងក្រោយនេះកើតឡើងបន្ទាប់ពីក្រុមមនុស្សធម៌អន្តរជាតិចំនួន១៩ស្ថាប័ន រួមទាំងទីភ្នាក់ងារអង្គការសហប្រជាជាតិចំនួន ១២ បានជំរុញឱ្យភាគីសង្រ្គាមបញ្ឈប់ការរារាំងជំនួយស្បៀងអាហារដល់ប្រជាជន រាប់លាននាក់ដែលកំពុងរស់ដោយភាព អត់ឃ្លាន។

តាមស្ថិតិបានឲ្យដឹងថា នៅក្នុងប្រទេសនេះមានកុមាររងគ្រោះប្រមាណជា ៣,៦លាន​នាក់​កំពុងរស់នៅដោយអត់ឃ្លាន៕