សម្តេច​ប៉ាបអំពាវនាវ​សុំ​ជំនួយ​ដល់​រដ្ឋកាជីននៅ​មី​យ៉ាន់​ម៉ាដែលរងគ្រោះដោយការ​បាក់​ដី​

សម្តេចប៉ាប ហ្វ្រង់ស៊ីស្កូ បានធ្វើការអំពាវនាវមួយ ដើម្បីជួយអ្នកដែលរងគ្រោះដោយសារគ្រោះ រអិលបាក់ដី នៅតំបន់ជីកយករ៉ែត្បូងក្នុងរដ្ឋកាជីនភាគខាងជើងនៃប្រទេសមីយ៉ាន់ម៉ា និងសុំឱ្យគ្រីស្តបរិស័ទ អធិស្ឋានឲ្យ​ក្រុមហ៊ុនផលិតអាវុធកែប្រែ​ចិត្ត​គំនិត​ ព្រោះ​ពួកគេ​បាន​រួមចំណែកដល់ការស្លាប់មនុស្ស​រាប់មិនអស់​នៅក្នុងជម្លោះទូទាំងពិភពលោក។

ការអំពាវនាវរបស់សម្តេចប៉ាបបែបនេះ គឺនៅពេលដែលរដ្ឋកាជីន បានរងគ្រោះដោយការរអិលបាក់ដី ធ្ងន់ធ្ងរកាលពីព្រឹកថ្ងៃចន្ទសប្តាហ៍មុន។​

គ្រោះបំណាក់ដីនៅរដ្ឋកាជីននេះ បានបណ្តាលឲ្យមានអ្នកស្លាប់ និង​បាត់ខ្លួន ព្រមទាំងការខូចខាតទ្រព្យសម្បត្តិអស់ជាច្រើន​។​

វ៉ាទីកង់ញូវបានរាយការណ៍ថា ផ្ទះអ្នកភូមិយ៉ាងហោចណាស់ ៥០ ខ្នងត្រូវកប់ដោយបំណាក់ដី  ដូច្នេះហើយទ្រង់ក៏បានអំពាវនាវឲ្យមានជំនួយជួយដល់សហគមន៍ដែលរងផលប៉ះពាល់ ហើយទ្រង់ក៏មិនបានបំភ្លេចឡើយអំពីសង្រ្គាមនៅ ​អ៊ុយក្រែន មី​យ៉ាន់​ម៉ា ប៉ា​ឡេ​ស្ទី​ន អ៊ីស្រាអែល និង​ប្រទេស​ជា​ច្រើន​ក្នុងពិភពលោក៕