សម្តេចប៉ាប ឡេអូ ទី១៤ ប្រទានវត្ថុបុរាណ​ចំនួន ៦២ ដុំ ដល់ព្រះសហគមន៍កាណាដា

វ៉ាទីកង់ញូវបានរាយការណ៍ថា សម្តេចប៉ាបឡេអូទី១៤ បានសម្រេចចិត្តរាជទាន​នូវវត្ថុបុរាណសរុបប្រមាណជា ៦២ ដុំ ដែលរក្សាទុកនៅ សារមន្ទីរវ៉ាទីកង់ ដែលមានដើមកំណើតមកពីសហគមន៍ជនជាតិដើមភាគតិចនៅក្នុងប្រទេសកាណាដា ទៅលោកអភិបាលនៃព្រះសហគមន៍កាតូលិកកាណាដាវិញ។​

ប្រភពដដែលបានអះអាងថា ការសម្រេចចិត្តនេះ ជាសញ្ញានៃការសន្ទនា និងការគោរពនៃតម្លៃរបស់បងប្អូនជនជាតិភាគតិចកាណាដា។

នេះគឺជាការសម្រេចចិត្តដែលបានធ្វើឡើងក្រោយពេលដែល សម្តេចប៉ាបហ្រ្វង់ស៊ីស្កូបានយាងទៅបំពេញទស្សនកិច្ចនៅក្នុងប្រទេសកាណាដា កាលពីឆ្នាំ២០២២ ហើយទ្រង់បានទទួលទស្សនៈនិងយោបល់ជាច្រើនពី​សហគមន៍ជនជាតិដើមភាគតិច។

វ៉ាទីកង់ញូវបានរាយការណ៍ថា  សម្តេចប៉ាបលីអូទី១៤ មានបំណងចង់ឱ្យអំណោយនេះ​ជាតំណាងឱ្យសញ្ញាជាក់ស្តែងនៃការសន្ទនា ការគោរព និងភាតរភាពជាមួយនឹងបងប្អូនជនជាតិភាគតិចនៅកាណាដា។

វត្ថុបុរាណទាំងនេះត្រូវបានបញ្ជូនទៅវ៉ាទីកង់កាលពីអំឡុងឆ្នាំ១៩២៥ ​ក្នុងអំឡុងពេលឆ្នាំមហាករុណាទិគុណ​ ដើម្បីធ្វើជាសាក្សីនៃជំនឿ និងភាពសម្បូរបែបខាងវប្បធម៌របស់គ្រីស្តបរិស័ទ៕