សម្តេចប៉ាបហ្រ្វង់ស៊ីស្កូបានផ្ញើសារមួយជូនអ្នកចូលរួមក្នុងទិវាអន្តរជាតិនៃការអធិស្ឋាន និងការយល់ដឹងលើកទី១១ ស្តីពីការប្រឆាំងនឹងការជួញដូរមនុស្ស។
វ៉ាទីកង់ញូវបានរាយការណ៍ថា សារដែលបានចេញកាលពីថ្ងៃទី ០៨ ខែកុម្ភៈនេះ ក៏បានសរសើរការងាររបស់អ្នកដែលប្រយុទ្ធប្រឆាំងនឹងការគំរាមកំហែងនៃទាសភាពនៅក្នុងយុគសម័យទំនើបផងដែរ។
នាឱកាសនោះសម្តេចប៉ាប បានជំរុញឱ្យគ្រីស្តបរិស័ទ និងប្រជាជនទាំងអស់ដែលមានសុច្ឆន្ទៈប្រឆាំងនឹងរបបទាសភាព សូមចូលរួមប្រយុទ្ធប្រឆាំងនឹងការកេងប្រវ័ញ្ចលើជនងាយរងគ្រោះទាំងឡាយ។
នាឱកាសនោះសម្តេចប៉ាបក៏បានមានបន្ទូលលើកឡើងនូវវីរភាពរបស់សន្តី យ៉ូសែហ្វីន បាឃីតា (Josephine Bakhita) ដែលជាស្រ្តីជនជាតិស៊ូដង់ម្នាក់ បានតស៊ូតាំងពីកុមារភាពប្រឆាំងនឹងរបបទាសភាព រហូតដល់ក្លាយជាបងស្រីបម្រើព្រះសហគមន៍។
សម្តេចប៉ាបបានរំលេចទៀតថា នៅពេលដែលយើងកំពុងតែចូលរួមក្នុងឆ្នាំមហាករុណាទិគុណ យើងក៏ត្រូវសួរខ្លួនយើងផងដែរថា តើយើងអាចចិញ្ចឹមក្តីសង្ឃឹមនោះសម្រាប់មនុស្សរាប់លាននាក់ដែលជាប់នៅក្នុងទាសភាពសម័យទំនើបដែរឬទេ។
សម្តេចប៉ាប បានចោទជាសំណួរចំហរថា “តើយើងទទួលបានកម្លាំងជំរុញថ្មីពីណា ដើម្បីប្រយុទ្ធប្រឆាំងនឹងការជួញដូរសរីរាង្គនិងជាលិការបស់មនុស្ស ការកេងប្រវ័ញ្ចផ្លូវភេទលើកុមារានិងកុមារី ពលកម្មដោយបង្ខំរួមទាំងពេស្យាចារ ការជួញដូរគ្រឿងញៀន និងការជួញដូរអាវុធ?”។
សម្តេចប៉ាបមានបន្ទូលទៀតថា យើងជាគ្រីស្តបរិស័ទ គឺគួរតែជាប្រភពនៃក្តីសង្ឃឹម និងកម្លាំងសម្រាប់អ្នកដែលរងគ្រោះដោយការជួញដូរមនុស្ស និងសម្រាប់អ្នកដែលស្វែងរកការប្រយុទ្ធប្រឆាំងនឹងគ្រោះក៏អាក្រក់នេះ។
សម្តេចប៉ាប ក៏បានមានបន្ទូលលើកសរសើរនូវស្នាដៃនិងវីរៈភាពរបស់យុវជនជាច្រើនជុំវិញពិភពលោក ដែលបានធ្វើកិច្ចការទាក់ទងនឹងជនរងគ្រោះ និងអ្នករស់រានមានជីវិត។
សម្តេចប៉ាបបានមានបន្ទូលថា ដោយយើងមានជំនួយពីព្រះជាម្ចាស់ យើងអាចជៀសផុតពីភាពស៊ាំនឹងអយុត្តិធម៌ និងការល្បួង ដែលតែងគិតថាអំពើជួញដូរមនុស្សជាបាតុភូតមួយមិនអាចលុបបំបាត់បាននោះ៕
Daily Program
