សម្តេចប៉ាប៖ ការស្វែងរកសន្តិភាព គឺជាការទទួលខុសត្រូវទាំងអស់គ្នា

នៅក្នុងអំឡុងពេលដែលគ្រិស្តបរិស័ទកំពុងតែរង់ចាំប្រារព្ធពិធីបុណ្យព្រះយេស៊ូប្រសូត្រ សម្តេចប៉ាប ហ្វ្រង់ស៊ីស្កូ បានព្រមានថា ប្រសិនបើ «ការបន្ទាបខ្លួន និងភាពព្រងើយកន្តើយចំពោះភាពភ័យរន្ធត់នៃសង្រ្គាមបានឈ្នះ នោះមនុស្សជាតិទាំងអស់នឹងត្រូវចាញ់»។

សម្តេចប៉ាបបានមានបន្ទូលកាលពីថ្ងៃទី ០១ ខែធ្នូ ឆ្នាំ២០២៤ថា ការស្វែងរកសន្តិភាពគឺជាការទទួលខុសត្រូវរបស់មនុស្សទាំងអស់គ្នា ដូច្នេះគ្រប់គ្នាត្រូវតែខិតខំស្វែងរកសន្តិភាព ។

សម្តេចប៉ាប បានមានបន្ទូលថា ៖ «ទូលបង្គំជាខ្ញុំសង្ឃឹមថាភាពភ្លឺស្វាងនៃសន្តិភាពដែលបានលេចឡើងអាចនាំឱ្យមានបទឈប់បាញ់នៅគ្រប់ផ្នែកផ្សេងទៀតនៃពិភពលោក»។

សម្តេចប៉ាប​បាន​មានបន្ទូល ​សំដៅ​ទៅ​លើ​កិច្ចព្រមព្រៀង​ឈប់​បាញ់​ដែល​សម្រេច​បាន​រវាង​ក្រុម​ហេសបូឡាហ៍​នៅ​លីបង់ និង​អ៊ីស្រាអែល ដើម្បី​បញ្ចប់​ការ​ប្រយុទ្ធ​គ្នា​រយៈពេល ១៣ ខែ។

ដោយ​ផ្អែក​លើ​បញ្ហា​នេះ សម្តេច​ប៉ាប​ក៏​បាន​ជំរុញ​ប្រជាជន​លីបង់​ឲ្យ​បោះឆ្នោត​ជ្រើសរើស​ប្រធានាធិបតី ហើយទ្រង់បានលើកទឹកចិត្តថា "សូមសម្រេចចិត្តឱ្យបានឆាប់តាមដែលអាចធ្វើទៅបាន" ដើម្បីឱ្យស្ថាប័នរដ្ឋអាចត្រឡប់ទៅដំណើរការធម្មតា ដំណើរការកំណែទម្រង់ចាំបាច់ និងធានាថាប្រទេសនេះនៅតែជាគំរូនៃការរួមរស់ដោយសន្តិភាពក្នុងចំណោមសាសនាផ្សេងៗគ្នា។

ទោះបីជាយ៉ាងណាក៏ដោយ ទាំងអ៊ីស្រាអែល និងក្រុមហេសបូឡា បានចោទប្រកាន់ភាគីម្ខាងទៀតថា បានរំលោភលើកិច្ចព្រមព្រៀងបទឈប់បាញ់ ខណៈដែលមានសេចក្តីរាយការណ៍ថា កងកម្លាំងអាកាសអ៊ីស្រាអែល បានវាយប្រហារទីតាំងហេសបូឡា មួយថ្ងៃបន្ទាប់ពីបទឈប់បាញ់ត្រូវបានចុះហត្ថលេខា៕