សម្តេចប៉ាបអធិដ្ឋានដោយស្ងប់ស្ងាត់ក្នុងបន្ទប់ឯកជននៅមន្ទីរពេទ្យ

ការិយាល័យព័ត៌មានសន្តអាសនៈបាន ចេញផ្សាយនូវរូបថតរបស់សម្តេចហ្រ្វង់ស៊ីស្កូនៅពេលដែលទ្រង់កំពុងតែរៀបចំពិធីអធិស្ឋាននៅក្នុងបន្ទប់ឯកជននៅក្នុងមន្ទីរពេទ្យ។

វ៉ាទីកង់ញូវបានរាយការណ៍ថា រូបភាពនេះ​ជា​រូបថត​ដំបូង​គេ​ចាប់​តាំង​ពីទ្រង់យាង ​ចូល​ពេទ្យ​នៅ​ថ្ងៃ​ទី ១៤ ខែកុម្ភៈ ប៉ុន្តែនៅពេលនេះ ស្ថានភាពសុខភាពរបស់ទ្រង់កំពុងមានស្ថិរភាព តែទោះជាយ៉ាងណាក៏ទ្រង់នៅតែបន្តទទួលការព្យាបាលចលនាដង្ហើម​។​

រូបថតនេះបង្ហាញថា ទោះទ្រង់មានបញ្ហាសុខភាពក៏ទ្រង់មិនដែលភ្លេចការអធិដ្ឋានឡើយ ជាក់ស្តែងដូចជាអ្វីដែលរូបថតបានបង្ហាញស្រាប់។ រូបថតបានបង្ហាញថាទ្រង់កំពុងតែ សម្លឹងមើលឈើឆ្កាងនៅលើអាសនៈនៃវិហារនៅជាន់ទីដប់នៃមន្ទីរពេទ្យ ជាកន្លែងដែលទ្រង់បានយាងទៅអធិស្ឋានជារៀងរាល់ថ្ងៃ ចាប់តាំងពីស្ថានភាពសុខភាពរបស់គាត់បានប្រសើរឡើង។​

ដោយសារតែស្ថានភាពសុខភាពសួតទ្រង់ស្មុគស្មាញ តាំងពីទទួលការព្យាបាល​ក្រៅពីក្រុមគ្រូពេទ្យដែល​ព្យាបាលសម្តេចប៉ាប និងសហការីដ៏ជិតស្និទ្ធបំផុតរបស់ទ្រង់គឺគ្មាននរណាបានឃើញស្ថានភាពសម្តេចប៉ាបដោយផ្ទាល់ឡើយ។

រូបភាពសម្តេចមិនត្រូវបានគេបង្ហាញ ប៉ុន្តែសំឡេងរបស់​ទ្រង់​ ត្រូវ​បាន​បញ្ចេញតាមសារនៅក្នុងកម្មវិធីមួយចំនួនជាបន្តបន្ទាប់៕​