សម្តេចប៉ាបឡេអូទី១៤ នឹងទៅ​ទួរគីនិង​លីបង់

ដំណើរទស្សនកិច្ចក្រៅបុរីវ៉ាទីកង់និងទីក្រុងរ៉ូមដំបូងបំផុតរបស់សម្តេចប៉ាបឡេអូទី១៤ ត្រូវបានគេដឹងថា គឺប្រទេសទួរគី នៅថ្ងៃទី ២៧ ដល់ថ្ងៃទី ៣០ ខែវិច្ឆិកា និង​បន្ត​ដំណើរ​ទៅ​ប្រទេស​លីបង់ ពីថ្ងៃទី ៣០ ខែវិច្ឆិកា ដល់ថ្ងៃទី ០២ ខែធ្នូ ឆ្នាំ ២០២៥។

ទ្រង់​នឹង​ជួបជាមួយប្រធានាធិបតីនៃប្រទេស គឺលោក រីសិប តៃយីប អឺដូហ្គាន ( Recep Tayyip Erdogan) មុនពេលថ្លែងទៅកាន់អាជ្ញាធរទួរគី តំណាងសង្គមស៊ីវិល និងសមាជិកនៃក្រុមការទូត។​ ហើយ​បន្ទាប់​មក​នៅថ្ងៃទី២៨ ខែវិច្ឆិកា សម្តេចប៉ាបឡេអូនឹងជួបជាមួយ លោកអភិបាល បូជាចារ្យ អ្នកបម្រើអាសនៈ  នៅព្រះសហគមន៍ទីក្រុងអ៊ីស្តង់ប៊ុល ហើយនឹងយាងទៅទស្សនាមណ្ឌលថែទាំកុមារក្រីក្ររបស់ព្រះសហគមន៍មួយ។

នៅថ្ងៃសៅរ៍ ទី២៩ ខែវិច្ឆិកា សម្តេចប៉ាបឡេអូនឹងយាងដំណើរទស្សនកិច្ចនៅវិហារអ៊ីស្លាមស៊ុលតង់អាម៉េដ - "វិហារអ៊ីស្លាមខៀវ" ដ៏ល្បីល្បាញ មុនពេលជួបសាវនាការជាឯកជនជាមួយថ្នាក់ដឹកនាំព្រះវិហារក្នុងស្រុក និងសហគមន៍គ្រីស្តសាសនាមួយ។

នៅថ្ងៃទី ៣០ ខែវិច្ឆិកា ទ្រង់នឹងយាងដឹកនាំកម្មវិធីថ្វាយអភិបូជាមួយ នៅក្នុងទីក្រុងអ៊ីស្តង់ប៊ុល ហើយនិងកម្មវិធីមួយចំនួន រួចចាកចេញទៅកាន់ប្រទេសលីបង់។ នៅលីបង់ ទ្រង់​នឹង​ជួប​ប្រធានាធិបតី ប្រធានរដ្ឋសភា និងនាយករដ្ឋមន្ត្រីលីបង់។

នៅថ្ងៃទី ០១ ខែធ្នូ គឺពេញដោយមានកម្មវិធីទស្សនកិច្ចនៅផ្នូរបុរាណ របស់សន្ត  Charbel Maklūf ព្រះវិហារ  Saint Maroun ក្នុងទីក្រុង Annaya។  សម្តេចប៉ាបឡេអូ ក៏នឹងយាងធ្វើដំណើរទៅកាន់ទីសក្ការៈបូជារបស់ព្រះនាងលីបង់ ក្នុងទីក្រុង Harissa ជាកន្លែងដែលទ្រង់នឹងជួបជាមួយលោកអភិបាល បូជាចារ្យ  និង គ្រីស្តបរិស័ទ។ នៅពេលរសៀល សម្តេចប៉ាបឡេអូ នឹងរៀបចំកិច្ចប្រជុំសាសនា និងអន្តរសាសនានៅទីលានមរណសាក្សីក្នុងទីក្រុងបៃរូត។ ក្រោយមក សម្តេចប៉ាបនឹងយាងជួបជាមួយនឹង យុវជននៃប្រទេសលីបង់។

នៅថ្ងៃចុងក្រោយនៃដំណើរទស្សនកិច្ចនេះ ពោលគឺ ថ្ងៃទី ២ ខែធ្នូ សម្តេចប៉ាបឡេអូនឹង យាងទៅសួរសុខទុក្ខបុគ្គលិក និងអ្នកជំងឺនៃមន្ទីរពេទ្យ De La Croix ក្នុងទីក្រុង Jal Ed Dib។ បន្ទាប់មកសម្តេចប៉ាប ឡេអូ នឹងអធិស្ឋានដោយស្ងៀមស្ងាត់នៅកន្លែងផ្ទុះកំពង់ផែ បៃរូតដែលបានកើតឡើងនៅឆ្នាំ ២០២០ ហើយនឹងយាងដឹកនាំកម្មវិធីថ្វាយអភិបូជា នៅ Beirut Waterfront ដែលជាព្រឹត្តិការណ៍សំខាន់ចុងក្រោយនៃដំណើរទៅកាន់ប្រទេសលីបង់៕