សម្តេចប៉ាបឡេអូទី១៤យាងទទួលគណៈប្រតិភូមកពីអឺរ៉ុប

វ៉ាទីកង់ញូវបានរាយការណ៍ថា កាលពីថ្ងៃទី​២៩ ខែកញ្ញា កន្លងទៅនេះសម្តេចប៉ាបឡេអូទី១៤​ បានយាងទទួលគណៈប្រតិភូនៃក្រុមការងារទទួលបន្ទុកការងារកិច្ចសន្ទនាអន្តរវប្បធម៌ និងសាសនារបស់សភាអឺរ៉ុប។

ប្រភពដដែលបានរាយការណ៍ថា នាឱកាសនោះ សម្តេចប៉ាបឡេអូបានជំរុញនិងលើកទឹកចិត្តគណៈប្រតិភូឲ្យជួយលើកកំពស់កិច្ចសន្ទនាអន្តរវប្បធម៌ប្រកបដោយការទទួលខុសត្រូវ។

សម្តេចប៉ាបបានវាតម្លៃខ្ពស់ចំពោះកិច្ចការនិងបេសកកម្មរបស់ពួកគេនៅក្នុងការលើកកម្ពស់ការសន្ទនារវាងវប្បធម៌ និងសាសនា ដែល​ជាគោលបំណងសំខាន់មួយ​សម្រាប់អ្នកនយោបាយ​ដែលមានប្រភពពីគ្រីស្តបរិស័ទ ដូច្នេះពូកគេគួរតែជាមនុស្សដែលពោរពេញដោយ សក្ខីភាពល្អ បើកចំហរ និងទទួលស្គាល់ទស្សនៈនិងមតិអ្នកដទៃ។

សម្តេចប៉ាបឡេអូបានសង្កត់ធ្ងន់ថា ​សាសនា​នៅតែអាចជួយ​ពង្រឹង​ទំនាក់ទំនង​រវាង​បុគ្គល និង​ជួយ​មនុស្ស​ឱ្យ​រស់នៅក្នុង​សហគមន៍ និង​សង្គម​បាន​យ៉ាង​ប្រសើរ​ ហើយចេះទទួលខុសត្រូវផងដែរ៕