សម្តេចប៉ាបប្រកាសតែងតាំងកាឌីណាល់ថ្មី២១រូប​ដែលមានអាស៊ី៥រូប

សម្តេចប៉ាប ហ្វ្រង់ស៊ីស្កូ បានប្រកាសតែងតាំងលោកកាឌីណាល់ថ្មី ២១រូបនៅក្នុងចំណោមនោះមាន៥រូបនៅអាស៊ី ។

លោកកាឌីណាល់អាស៊ីទាំង៥ រូបដែលត្រូវបានសម្តេចប៉ាបប្រកាសតែងតាំងនោះគឺរួមមាន៖

១​. លោកកាឌីណាល់ តាស៊ីស៊ីអូ អ៊ីសាអូ គីគូជី (Tarcisio Isao Kikuchi) ជនជាតិជប៉ុន

លោកកាឌីណាល់ តាស៊ីស៊ីអូ អ៊ីសាអូ គីគូជី គឺជាអ្នកទទួលខុសត្រូវនៃព្រះសហគមន៍កាតូលិកនៅ ទីក្រុងតូក្យូ ហើយត្រូវបានទទួលស្គាល់ចំពោះការប្តេជ្ញាចិត្តរបស់លោកចំពោះអ្នកខ្វះខាត និងការខិតខំប្រឹងប្រែងរបស់លោកក្នុងការលើកកម្ពស់ការសន្ទនាអន្តរសាសនា។ លោកកាឌីណាល់ បានដើរតួនាទីយ៉ាងសំខាន់ទាំងនៅក្នុងប្រទេសជប៉ុន និងទូទាំងពិភពលោក ហើយក៏ជាអ្នកដឹកនាំការីតាសអន្តរជាតិផងដែរ ។

២. លោកកាឌីណាលើ ប៉ាប្លូ វ័ជីលីល្យូ សុងកូ ដាវីត (Pablo Virgilio Siongco David) ជាជនជាតិហ្វីលីពីន

លោកកាឌីណាល់គឺជាសំឡេងដ៏គួរឱ្យគោរពនៅក្នុងព្រះសហគមន័ហ្វីលីពីន ដែលត្រូវបានគេស្គាល់ថាសម្រាប់ជំហរដ៏ក្លាហានរបស់លោកប្រឆាំងនឹងអយុត្តិធម៌សង្គម។ លោក ដាវីត ជាអ្នកតស៊ូមតិដោយឥតសំចៃមាត់សម្រាប់សិទ្ធិមនុស្ស និងធ្វើការដោយមិនចេះនឿយហត់ជាមួយជនក្រីក្រ និងមានការខ្វះខាត ជាពិសេសក្នុងការដោះស្រាយបញ្ហាដែលកំពុងកើតមាននៃភាពក្រីក្រ និងវិសមភាពនៅក្នុងប្រទេសហ្វីលីពីន។

៣. លោកកាឌីណាល់ ប៉ាស្កាលីស ប្រ៊ុយណូ ស៊ីយូគូ ( Paskalis Bruno Syukur) ជនជាតិឥណ្ឌូនេស៊ី

លោកជាអ្នកដឹកនាំនៅក្នុងព្រះសហគមន៍ប័ហ្គ័រ ( Bogor ) ដែលធ្លាប់មានភាពល្បីល្បាញចំពោះការប្តេជ្ញាចិត្តរបស់លោកចំពោះការគ្រប់គ្រងបរិស្ថាន និងការជំរុញកិច្ចសន្ទនាអន្តរជំនឿ។ នៅប្រទេសឥណ្ឌូណេស៊ី ដែលជាប្រទេសដែលកាន់សាសនាឥស្លាមច្រើនជាងគេបំផុតនៅលើពិភពលោក កាឌីណាល់បានដើរតួយ៉ាងសំខាន់ក្នុងការលើកកម្ពស់សន្តិភាព និងការគោរពគ្នាទៅវិញទៅមករវាងគ្រិស្តបរិស័ទ និងមូស្លីម។

៤.​ លោក ដូនីមិក ចូសេព ម៉ាសូវ (Dominique Joseph Mathieu) ជនជាតិអ៊ីរ៉ង់

ជាអ្នកទទួលខុសត្រូវនៃព្រះសហគមន៍កាតូលិក Tehran-Ispahan នៅប្រទេសអ៊ីរ៉ង់ និងជាសមាជិកនៃ Conventual Franciscans ។ លោកធ្លាប់ដឹកនាំព្រះសហគមន៍កាតូលិកតូចមួយនៅក្នុងប្រជាជាតិដែលកាន់សាសនាឥស្លាមលើសលប់ ជាកន្លែងដែលបេសកកម្មរបស់គាត់ត្រូវបានសម្គាល់ដោយការខិតខំប្រឹងប្រែងដើម្បីលើកកម្ពស់ការយល់ដឹង និងការរួមរស់ដោយសន្តិភាពរវាងជំនឿផ្សេងៗ។ ការងាររបស់លោកជាគំរូដល់ការលះបង់របស់ព្រះសហគមន៍ ក្នុងការគាំទ្រជនជាតិភាគតិចគ្រីស្ទាននៅក្នុងបរិបទដែលពិបាក ជំរុញការសន្ទនា និងការកសាងស្ពាននៅក្នុងបរិយាកាសលំបាក។

៥. លោក ចច ចាកូន កូវាកាត (George Jacob Koovakad) ជនជាតិឥណ្ឌា

លោកជា មន្ត្រីនៅក្នុងលេខាធិការដ្ឋានរដ្ឋនៃបុរីវ៉ាទីកង់ ជាកន្លែងដែលលោកទទួលខុសត្រូវជាចម្បងក្នុងការរៀបចំការធ្វើដំណើររបស់សម្តេចប៉ាប។ លោកបានដើរតួនាទីយ៉ាងសំខាន់ក្នុងការសម្របសម្រួល និងគ្រប់គ្រងដំណើរយាងទស្សនៈកិច្ច របស់ សម្តេចប៉ាប នៅទូទាំងពិភពលោក ដោយធានាបាននូវការប្រតិបត្តិដោយរលូន និងមានប្រសិទ្ធភាពនៃព្រឹត្តិការណ៍សំខាន់ៗទាំងនេះ។ លោកក៏ជាអ្នកទទួល ខុសត្រូវ ពាក់ព័ន្ធនឹងការត្រួតពិនិត្យព័ត៌មានលម្អិតដ៏ស្មុគស្មាញនៃដំណើរទស្សនកិច្ចរបស់សម្តេចប៉ាប រួមទាំងសន្តិសុខ ទំនាក់ទំនងការទូត និងការទំនាក់ទំនងជាមួយអាជ្ញាធរមូលដ្ឋាន។

តាមការគ្រោងទុកពិធីប្រកាសលោកកាឌីណាល់ថ្មីទាំង២១ រូបរួមទាំងលោកកាឌីណាល់នៅអាស៊ីទាំង៥ រូបនេះ គ្រោងនឹងរៀបចំជាផ្លូវការនៅថ្ងៃទី ៨ ខែធ្នូ ឆ្នាំ ២០២៤ នៅបុរី វ៉ាទីកង់៕