សម្តេចប៉ាបបញ្ជាក់ប្រាប់គ្រីស្តបរិស័ទនៅឡូសអេនជឺឡេសថា បេះដូងទ្រង់នៅជាមួយនឹងពួកគេ

សម្តេចហ្រ្វង់ស៊ីស្កូបានមានបន្ទូលកាលពីថ្ងៃទី ២២ខែមករាថា បេះដូងរបស់ទ្រង់គឺនៅជាមួយបងប្អូនប្រជាជនដែលរងទុក្ខវេទនានៅទីក្រុង ឡូសអេនជឺឡេស រដ្ឋកាលីហ្វ័រញ៉ាដែលកំពុងរងទុក្ខលំបាកបង្កឡើងដោយភ្លើងឆេះព្រៃ ។ នេះបើតាមសេចក្តីរាយការណ៍ដោយវ៉ាទីកង់ញូវ ។

សម្តេចប៉ាប បានសង្កត់ធ្ងន់ថា 'បេះដូងរបស់ទូលបង្គំជាខ្ញុំគឺនៅជាមួយបងប្អូននៅ ទីក្រុងឡូសអេនជឺឡេស» ហើយបានសង្កត់ធ្ងន់ថា ទ្រង់នឹងបន្តអធិដ្ឋាន ដល់អស់អ្នកដែលបានរងគ្រោះដោយភ្លើងឆេះព្រៃនៅក្នុងរដ្ឋកាលីហ្វ័រញ៉ា សហរដ្ឋអាមេរិក។

សម្តេចប៉ាបបានទទួលស្គាល់ថាពួកគេ ពិតជាបានកំពុងតែ រងទុក្ខលំបាកយ៉ាងច្រើនដោយភ្លើងដែលបានបំផ្លិចបំផ្លាញហើយមកដល់ពេលនេះកន្លែងខ្លះនៅមិនទាន់រលត់នៅឡើយ  ។

សម្តេចប៉ាប បានអធិស្ឋានឲ្យប្រជាពលរដ្ឋដែលកំពុងតែរងទុក្ខលំបាកទាំងអស់ ឱ្យពួកគេរឹងមាំនិងក្លាយជាសាក្សីនៃក្តីសង្ឃឹម ហើយក៏អធិដ្ឋានឲ្យមាន ការច្នៃប្រឌិតដើម្បីទ្រទ្រង់ការលំបាកដែលកំពុងតែកើតមាននៅពេលនេះ ។

សម្តេច​ប៉ាប​ក៏​បាន​អធិស្ឋាន​សម្រាប់​កិច្ច​ខិតខំ​ប្រឹងប្រែង​សង្គ្រោះ​របស់​បុគ្គលិក​សេវា​សង្គ្រោះ​បន្ទាន់ ហើយ​បាន​ប្រសិទ្ធពរជ័យ​ដល់​អ្នក​ទាំងអស់​គ្នា។

មកដល់ពេលនេះគ្រោះអគ្គីភ័យនៅឡូសអេនជឺឡេស បានឆក់យកជីវិតមនុស្សយ៉ាងតិច ២៨ នាក់ និងបំផ្លិចបំផ្លាញលំនៅស្ថាន ហេដ្ឋារចនាសម្ព័ន្ធ ទ្រព្យសម្បត្តិអស់រាប់ពាន់លានដុល្លារ ។