សម្តេចប៉ាបហ្រ្វង់ស៊ីស្កូ និង លោក អេម៉ានូអែល ម៉ាក្រុង ប្រធានាធិបតីបារាំងបានជួបពិភាក្សាគ្នាជាថ្មីកាលពីថ្ងៃទី ១៥ ខែធ្នូ ឆ្នាំ២០២៤ នៅពេលដែលទ្រង់បានយាងមកបំពេញទស្សនៈកិច្ចនៅកោះកស៊ីកា (Corsica) ដែលជាកោះមួយស្ថិតនៅកណ្តាលសមុទ្រមេទីទែរ៉ាណេ នៅក្នុងប្រទេសបារាំង ។
វ៉ាទីកង់ញូវបានរាយការណ៍ថា ជំនួបមេដឹកនាំទាំងពីរនៅពេលនោះគឺជាជំនួបឯកជន ហើយធ្វើឡើងនៅចុងបញ្ចប់កម្មវិធីទស្សនៈកិច្ចរបស់សម្តេចប៉ាបនៅលើកោះនោះ មុនពេលទ្រង់យាងចេញដំណើរត្រឡប់មកកាន់បុរីវ៉ាទីកង់វិញ ។
នៅក្នុងជំនួបនោះ លោក ម៉ាក្រុង បានសំដែងអំណរគុណសម្រាប់ដំណើររបស់សម្តេចប៉ាបនៅកោះ កស៊ីកា ។ ដំណើររបស់សម្តេចប៉ាប ឆ្លុះបញ្ចាំងពីតម្លៃនៃទំនាក់ទំនងនិងកិច្ចសហប្រតបត្តិការរវាងបារាំងនិងសន្តអសនៈ ។
នៅក្នុឱកាសនោះ លោក ម៉ាក្រុង បានជូនអំណោយនូវសៀវភៅមួយក្បាលដែលសរសេរអំពីវិសាលវិហារ Notre Dame ដែលទើបបានស្ដារឡើងវិញក្រោយភ្លើងឆេះដ៏សន្ធោសន្ធៅឆ្នាំ ២០១៩ ហើយបានបើកជាសាធារណៈវិញកាលពីមួយសប្តាហ៍មុន ហើយសម្តេចប៉ាបក៏បានប្រទានសៀវភៅអប់រំជំនឿច្បាប់ចម្លងមួយក្បាលជូនលោក ម៉ាក្រុង ។
មេដឹកនាំទាំងពីរបានជួបគ្នាជាញឹកញាប់ ដោយជំនួបនេះគឺធ្វើនៅបុរីវ៉ាទីកង់ នៅទីក្រុងម៉ាកសីប្រទេសបារាំង និង ក្រៅជំនួប G7 នៅអ៊ីតាលី ជាដើម ។
Daily Program
