សម្តេចប៉ាបចង់បានបទឈប់បាញ់គ្រប់កន្លែងនៅក្នុងអំឡុងព្រឹត្តិការណ៍អូឡាំពិកនៅបារាំង

សម្តេច ហ្រ្វង់ស៊ីស្កូ កាលពីថ្ងៃអាទិត្យបានសម្តែងក្តីសង្ឃឹមថា ព្រឹត្តិការណ៍កីឡាអូឡាំពិក និងប៉ារ៉ាឡាំពិកទីក្រុងប៉ារីស នឹងផ្តល់ឱកាសសម្រាប់ប្រទេសដែលមានសង្រ្គាមគោរពនិងអោយតម្លៃដល់ប្រពៃណីដែលផ្តួចផ្តើមតាំងពីសម័យក្រិកបុរាណនេះឡើង។

ទ្រង់​បាន​បន្ត​ថា​ ៖ «​តាម​ប្រពៃណី​បុរាណ សូម​ឲ្យ​ព្រឹត្តិការណ៍​អូឡាំពិក​ជា​ឱកាស​មួយ​ក្នុង​ការ​បង្កើត​បទ​ឈប់​បាញ់​ក្នុង​សង្គ្រាម ដោយ​បង្ហាញ​ពី​ឆន្ទៈ​ស្មោះ​ត្រង់​សម្រាប់​សន្តិភាព»។

សម្តេចប៉ាបក៏បានរំលឹកថា នៅសប្តាហ៍នេះ ព្រឹត្តិការណ៍កីឡាអូឡាំពិកទីក្រុងប៉ារីស នឹងចាប់ផ្តើម ហើយនឹងបន្តដោយកីឡាប៉ារ៉ាឡាំពិក ។

ទ្រង់បានមានបន្ទូលថា ៖ «កីឡាក៏មានថាមពលសង្គមដ៏អស្ចារ្យ ដែលមានសមត្ថភាពបង្រួបបង្រួមមនុស្សដោយសន្តិភាពទោះជាមានវប្បធម៌ផ្សេងៗគ្នាក៏ដោយ»។

សម្តេចប៉ាបបានមានបន្អូល ថា ៖ «ខ្ញុំសង្ឃឹមថាព្រឹត្តិការណ៍នេះអាចជាសញ្ញានៃពិភពលោករួមបញ្ចូលដែលយើងចង់កសាង ហើយថាអត្តពលិក ជាមួយនឹងទីបន្ទាល់កីឡារបស់ពួកគេ អាចជាអ្នកនាំសារសន្តិភាព និងជាគំរូដ៏មានតម្លៃសម្រាប់យុវជន»៕