សមាជនៃអង្គការសហប្រជាជាតិនៅពេលផ្ទុះអំពើហិង្សាហូរហៀនៅមជ្ឈិមបូព៌ា

ចាប់តាំងពីថ្ងៃអង្គារ មេដឹកនាំច្រើនជាង ១០០នាក់ នៅក្នុងពិភពលោកទាំងមូល​កំពុងស្ថិតនៅ ទីក្រុងញូយ៉កដើម្បីចូលរួមសម័យប្រជុំសមាជ ឆ្នាំ២០២៤ នៃអង្គការសហប្រជាជាតិ។ សេចក្តី​សង្កត់​ធ្ងន់គឺ នៅលើការឆាបឆេះជម្លោះនៅតំបន់មជ្ឈិមបូព៌ា។

កិច្ចប្រជុំដ៏ធំប្រចាំឆ្នាំនៃអង្គការសហប្រជាជាតិ ​ចាប់ផ្តើមនៅថ្ងៃអង្គារទី២៤ ខែកញ្ញា នៅ ទីក្រុង ញូយ៉ក ជាមួយនិងការភ័យខ្លាច​នៃសង្រ្គាមនៅក្នុងតំបន់មជ្ឈិមបូព៌ា ដែលរីករាលដាលតានតឹង​ និង​ដែលគ្របដណ្តប់លើសម័យប្រជុំនៃសមាជ។

បន្ទាប់ពី ២ថ្ងៃ នៃកិច្ចប្រជុំកំពូលសម្រាប់អនាគតដែលឧទ្ទិសទៅដល់បញ្ហាប្រឈមធំៗ របស់​មនុស្ស​ជាតិសម្រាប់ជំនាន់ក្រោយដែលនឹងមកដល់ ប្រមុខរដ្ឋ និងរដ្ឋាភិបាល ជាង ១០០រូប នឹង​ឡើង​ថ្លែង​សន្ទរកថា បន្តបន្ទាប់គ្នា​រយៈពេល ១សប្តាហ៍ នៅក្នុងសមាជដែលត្រូវធ្វើឲ្យ​ស្រអាប់​​ដោយ​ជម្លោះ​នានា​​ដ៏​​បំផ្លិច​បំផ្លាញ ជាពិសេស នៅលីបង់ និងនៅក្នុងដែនដីហ្គាហ្ស៉ា។

លោករីឆាត ហ្គ៉ូវ៉ាន់ ពីក្រុមវិបត្តិអន្តរជាតិ បានអធិប្បាយថា ៖ ”នៅឆ្នាំនេះ ការសង្កត់ធ្ងន់គឺ​នៅ​លើ​បញ្ហានៃសង្រ្គាម និងសន្តិភាព ជាពិសេស នៅតំបន់ហ្គាហ្ស៉ា អ៊ុយក្រែន និងស៊ូដង់។”

នៅមជ្ឈិមបូព៌ា ការវាយប្រហាររបស់អ៊ីស្រាអែលប្រឆាំងនឹងក្រុមហេបូឡាលីបង់ ដែលគាំទ្រ​ដោយ​អ៊ីរ៉ង បាន​ធ្វើ​ឲ្យមានមនុស្សស្លាប់ជិត ៥០០នាក់ កាលពីថ្ងៃចន្ទ។ នេះគឺជាថ្ងៃ​ដែល​បង្ហូរ​ឈាម​​ខ្លាំងបំផុត​ក្នុងរយៈពេលជិត ១ឆ្នាំ នៃការបាញ់តទល់រវាងភាគីទាំងពីរ ខាង​ក្រៅ​​​​សង្រ្គាម​នៅ​​ហ្គាហ្ស៉ា។

លោកចូ បាយឌិន ដែលបានបញ្ជាក់ឡើងវិញ ថា នឹងធ្វើការដើម្បីបន្ថយភាពតានតឹង បាន​ឡើង​ថ្លែងកាលពីព្រឹកថ្ងៃអង្គារ​ដែលជាសេចក្តីថ្លែងសន្ទរកថាចុងក្រោយរបស់លោក​នៅ​សមាជ​នៃ​អង្គការសហប្រជាជាតិ។ មន្រ្តីជាន់ខ្ពស់មួយរូបរបស់អាម៉េរិក បានប្រាប់ឲ្យដឹងថា សហរដ្ឋ​អាម៉េរិក​ប្រឆាំង​នឹងការឈ្លានពានដីគោក​ទៅលើលីបង់ និងទៅបង្ហាញគំនិតជាក់ស្តែង​សម្រាប់​ដៃ​​គូ​របស់ខ្លួន​នៅសប្តាហ៍នេះ​នៅអង្គការ​សហប្រជាជាតិដើម្បីសម្រាលជម្លោះ។

ប្រធានាធិបតីអ៊ីរ៉ងថ្មី លោកម៉ាសូដ ប៉េហ្សេស្ហគៀន ដែលប្រទេសរបស់លោកគាំទ្រ ក្រុម​ហេបូឡា និងក្រុមហាម៉ាស ក៏ឡើងថ្លែងសន្ទរកថា ដំបូង​នៅអង្គការសហប្រជាជាតិ។ កាល​ពីថ្ងៃចន្ទ លោកបានចោទប្រកាន់អ៊ីស្រាអែលថាបានព្យាយាម​ពង្រីកជម្លោះ​នៅមជ្ឈិម​បូព៌ា។

ចំណែកលោកប្រមុខការទូតអឺរ៉ុប លោកចូសេព បូរ៉េល បានព្រមានថា ៖​”យើងនៅ​គែម​នឹង​ផ្ទុះសង្រ្គាម​ទាំងស្រុងនៅលីបង់។”

យោងតាមប្រភពការទូតនានា បានឲ្យដឹងថា កាលពីថ្ងៃអង្គារ តាមការស្នើសុំរបស់អ៊ុយក្រែន ដែលភ័យខ្លាចថា សង្រ្គាមរបស់ពួកគេនឹងមិនចប់នៅឆ្នាំនេះ ក្រុមប្រឹក្សា​សន្តិសុខ​នឹងជួប​ប្រជុំ​លើ​សំណុំរឿងអ៊ុយក្រែន​ដោយមានវត្តមានរបស់ប្រធានាធិបតីវ៉ូឡូឌីមៀ ហ្សេឡេនស្គី។

មេដឹកនាំអ៊ុយក្រែន​ ដែលត្រូវឡើងបញ្ចេញមតិនៅថ្ងៃពុធ នៅសមាជ បានអំពាវនាវ​កាលពីថ្ងៃ​ចន្ទ ឲ្យគ្រប់ប្រទេស​បន្តគាំទ្រកិច្ចខិតខំប្រឹងប្រែងរួមរបស់អ៊ុយក្រែនអំពីអនាគតមួយដែល​មាន​សន្តិភាព។ លោកបានថ្លែងថា ប្រធានាធិបតីរុស្ស៊ី លោកវ្លាឌីមៀ ពូទីន បានលួចយកសន្តិភាព ប៉ុន្តែ​គាត់មិនអាចលួចយកអនាគតពិភពលោកបានទេ។ ហើយលោកវ៉ូឡូឌីមៀ ហ្សេឡេនស្គី ក៏ត្រូវ​បង្ហាញ​​នៅសប្តាហ៍នេះ​ ទៅកាន់សមភាគីអាម៉េរិក​របស់លោកនូវផែនការដើម្បីជ័យជម្នះ​របស់​អ៊ុយក្រែន”។

លោករីឆាត ហ្គ៉ូវ៉ាន់ បញ្ជាក់ថា ការទូតពិតប្រាកដដើម្បីកាត់បន្ថយ​ជម្លោះនឹងកើតមាន​ឡើង​​​នៅ​ក្រោយ​ឆាក។ លោកប្រហែល​អាចព្យាករអំពីលទ្ធភាព​សម្រាប់ការទូតលោកខាងលិច  និង​អារ៉ាប ដើម្បីពិភាក្សាជាមួយអ៊ីរ៉ង​ដើម្បីរាំងខ្ទប់​ស្ថានភាពតំបន់​កុំឲ្យក្លាយទៅជាលែងគ្រប់​គ្រង​​​បាន។