សមយុទ្ធ «នាគមាស» លើកទី៦ ឆ្នាំ២០២៤ រយៈពេល​១៥ថ្ងៃ បានចាប់​ផ្តើមហើយ នាព្រឹកនេះ

សមយុទ្ធ «នាគមាស» លើកទី៦ ឆ្នាំ២០២៤ បាន​ចាប់​ផ្តើម​ធ្វើ​ក្រោមប្រធានបទ «ប្រតិបត្តិការប្រឆាំងភេរវកម្មរួមគ្នា និងការងារមនុស្សធម៌» ដែលមានរយៈពេល​១៥ថ្ងៃ គឺចាប់ពី​ថ្ងៃទី​១៦ ខែដល់ថ្ងៃទី​៣០ ខែ​ឧសភា ឆ្នាំ​២០២៤។

ពិធីនេះ ធ្វើឡើង​នា​មជ្ឈមណ្ឌលហ្វឹកហ្វឺនកងរាជអាវុធហត្ថ ភ្នំជុំសែនរីករាយ ស្ថិតនៅក្នុងភូមិសាស្ត្រ ភូមិច្រកកូវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង និងនៅលើផ្ទៃសមុទ្រ និងដែនអា​កាសកម្ពុជា ក្នុងតំបន់ខេត្តព្រះសីហនុ។

សមយុទ្ធនេះ បាន​ធ្វើឡើង​រវាង​កងកម្លាំងនៃកងយោធពលខេមរភូមិន្ទ និងកងទ័ពរំដោះប្រជាជនចិន ដែល​មាន​ប្រមាណ​ជាង២ពាន់នាក់ អមដោយនាវាចម្បាំងចំនួន១៤គ្រឿង និងសម្ភារៈយោធាជាច្រើនទៀត។

​ពិធីបើកសមយុទ្ធនាគមាសនេះ ធ្វើឡើងក្រោមអធិបតីភាព នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ និងភាគីចិន លោកឧត្តមនាវីទោ កៅ សីវឈីង នាយរងសេនាធិការតំបន់ភូមិភាគខាងត្បូង នៃកងទ័ពរំដោះប្រជាជនចិន។​

លោក ប៉ែន សុក្រិតវិទ្យា ប្រធានក្រុមការងារដឹកនាំសមយុទ្ធភាគីកម្ពុជា បានថ្លែង​ក្នុង​ពិធីនោះថា ដោយការ​យកចិត្តទុកដាក់ពីសំណាក់រាជរដ្ឋាភិបាលនៃប្រទេសទាំងពីរ​ ក្រសួងការពារជាតិ គណៈ​​បញ្ជាការ គណៈកម្មការដឹកនាំសមយុទ្ធនាគមាស២០២៤ បានធ្វើការប្រុង​ប្រៀប​ និង​ដំណើ​រការ​សមយុទ្ធ ក្នុង​គោលបំណង​ផ្លាស់ប្តូរបទពិសោធ និង​កិច្ច​ប្រតិបត្តិការទៅវិញទៅមក​លើកិច្ចការ​មនុស្សធម៌ គ្រោះមហន្តរាយ ការ​ប្រឆាំងភេរវកម្មតាមច្បាប់អន្តរជាតិ និងមិនមានការគំរាមកំហែង​ដល់ប្រទេសណាមួយឡើយ។​​

នេះជាសមយុទ្ធទ្រង់ទ្រាយធំលើកទី៦ ហើយ រវាងកងទ័ពកម្ពុជា-ចិន ដែលធ្វើឡើងលើទឹកដីកម្ពុជា​ ចាប់តាំងពីសមយុទ្ធនេះបង្កើតឡើងលើកដំបូង កាលពីឆ្នាំ២០១៦ ខណៈដែលប្រទេសទាំងពី​រ គឺជាដៃគូយុទ្ធសាស្ត្រគ្រប់ជ្រុងជ្រោយ ហើយកំពុងកសាងសហគមន៍រួមវាសនាតែមួយ។

លោកបានបញ្ជាក់ថា ចំពោះកម្លាំងចូលរួមសមយុទ្ធនេះ គឺមានចំនួនសរុបទាំងអស់គឺ ២,០៧៥នាក់ ក្នុងនោះមានកងយោធពលខេមរភូមិន្ទចំនួន ១,៣១៥នាក់ និងកងទ័ពរំដោះប្រជាជនចិនចំនួន ៧៦០នាក់។

ដោយឡែកគ្រឿងបំពាក់សម្រាប់ការចូលរួមធ្វើសមយោគលើគោករួមមាន រថក្រោះ រថពាសដែ​ក រថយន្តគ្រប់ប្រភេទចំនួន ៧៩គ្រឿង រួមទាំងបរិក្ខារស៊ើបការ បរិក្ខារបោសសម្អាតជាតិផ្ទុះ បរិក្ខា​របញ្ជូនសារធាតុគីមី ជាច្រើនឈុតទៀត ហើយសមយុទ្ធនៅលើផ្ទៃសមុទ្រមាននាវាចូលរួមស​រុប ១៤គ្រឿង និងឧទ្ធម្ភាគចក្រចំនួន០២គ្រឿង។​​

លោកឧត្តមនាវីទោ កៅ សីវឈីង នាយរងសេនាធិការតំបន់ភូមិភាគខាងត្បូង នៃកងទ័ពរំដោះប្រជាជនចិន បាន​ថ្លែង​ឱ្យដឹងដែរថា ការធ្វើសមយុទ្ធរួមគ្នាគឺជាវិធានការ​មួយនូវការអនុវត្ត​កូសង់ស៊ីសសំខាន់របស់​លោក ស៊ី ជីងពីង ប្រធានាធិបតីសាធារណរដ្ឋប្រជាមានិតចិន និង​សម្តេចធិបតី ហ៊ុន ម៉ាណែត នាយករដ្ឋមន្រ្តី​នៃកម្ពុជា។

លោកបាន​ថ្លែងថា ៖ «យើងជឿជាក់ថាសមយុទ្ធឆ្នាំនេះ ពិតជាអាច​ទទួលបានភាពជោគជ័យ និងប្រកបដោយ​សុវត្ថិភាព​»។

ចំណែក នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ ក៏បាន​លើកឡើងដែរថា សមយុទ្ធនាគមាស​ប្រចាំឆ្នំារវាង​កងយោធពលខេមរភូមិន្ទជាមួយនឹង​កងទ័ពរំដោះប្រជាជនចិន​ នៅឆ្នាំ​២០២៤នេះ ត្រូវបានពង្រឹងពង្រីក​ទំហំកាន់តែ​ធំ និងខ្លឹមសារ​កាន់តែស៊ីជម្រៅ រួមនឹង​ចំនួ​ន​យោធិន យោតបករ​កាន់តែមានច្រើន​ និង​ទំនើបជាងឆ្នាំមុនៗ​។

លោកបានបញ្ជាក់ថា ៖ «សមយុទ្ធនាគមាសឆ្នាំនេះ មិនត្រឹមតែសមយុទ្ធ​កម្រិត​កងទ័ពជើងគោក និង​កងទ័ពជើងគោកនៅ​លើដីគោក​ប៉ុណ្ណោះទេ តែមានការ​ពង្រីក​ទៅដល់លំហសមុទ្រដែល​មានការ​ចូលរួមពី​កងទ័ព​ជើងទឹកកម្ពុជា​-ចិន ផងដែរ»។

នាយឧត្តមសេនីយ៍ វង្ស ពិសេន បានបន្ថែមថា ៖ «ខ្ញុំសង្ឃឹមថាសមយុទ្ធនាគមាសនេះ នឹងបន្តការរីកចម្រើន និង​ពង្រីកទៅដល់​កងទ័ពជើងអាកាស​ និងទ័ពជំនាញ​ផ្សេងៗទៀតនៅថ្ងៃអនាគ​ត»។

សូមបញ្ជាក់ដែរថា សមយុទ្ធនាគមាសរវាងកម្ពុជា-ចិន ​បានធ្វើឡើងតាំងពីឆ្នាំ២០១៦ ​គឺ​បានចំ​នួន៦ លើករួចមកហើយ ប៉ុន្តែ​ភាគីទាំងពីរបានផ្អាកចំនួនបីដង គឺនៅឆ្នាំ២០១៧ ដោយជាប់រវល់ក្នុងយុទ្ធនាការបង្ក្រាបគ្រឿងញៀន និងការបោះឆ្នោតក្រុមប្រឹក្សាឃុំសង្កាត់ និងនៅឆ្នាំ២០២១-២០២២ ដែលប្រឈមនឹងការរីករាលដាលជំងឺកូវីដ១៩៕