កាលពីថ្ងៃអង្គារ ទី៣០ ខែធ្នូ ប្រទេសចិនបានចាប់ផ្តើមនូវថ្ងៃទី២ នូវសមយុទ្ធយោធាថ្លែងការបិទកំពង់ផែតៃវ៉ាន់ ហើយបើតាមប្រទេសចិន គឺដើម្បីបញ្ជូនសារព្រមានដ៏ម៉ឺងម៉ាត់ ទៅកាន់ តៃវ៉ាន់។ ចំណែកតៃវ៉ាន់ក៏ដឹកនាំលំហាត់យោធាវាយបករហ័សវិញដែរ។
យោងតាមអ្នកកាសែតនៃទីភ្នាក់ងារសារព័ត៌មានបារាំង នៅភីងតាន ដែលជាកោះរបស់ចិនដែលស្ថិតនៅជិតបំផុតនិងកោះធំតៃវ៉ាន់ បានឲ្យដឹងថស គេបានឃើញការបាញ់គ្រាប់រ៉ូកែតជាច្រើនគ្រាប់ផ្ទុះនៅលើអាកាសនៅប្រមាណម៉ោង ៩ ព្រឹកដែលបន្សល់ទុកនូវស្រទាប់ផ្សែងពណ៌ស។
ចំណែករដ្ឋមន្រ្តីការពារជាតិតៃវ៉ាន់ បានថ្លែងថា យោធាតៃវ៉ាន់ចាប់ដានសញ្ញាយន្តហោះចិនចំនួន ១៣០ គ្រឿង ព្រមទាំងនាវាចម្បាំង ២២គ្រឿង នៅជុំវិញកោះតៃវ៉ាន់ក្នុងរយៈពេល ២៤ម៉ោង។ នេះគឺជាចំនួនយន្តហោះចម្បាំងចិនដែលកើនឡើងច្រើនបំផុតដែលទទួលសញ្ញាបានក្នុងមួយថ្ងៃ ចាប់តាំងពីថ្ងៃទី១៥ ខែតុលា ឆ្នាំ២០២៤។
នៅក្នុងសេចក្តីប្រកាសមួយនៃបញ្ជាការតំបន់ប្រតិការសឹកបូព៌ា របស់ PLA កងទ័ពរំដោះប្រជាជនចិន បានឲ្យដឹងថា តាមផែនទីបានបង្ហាញឲ្យឃើញនូវលំហអាកាសចំនួន ៥ នៅជុំវិញកោះតៃវ៉ាន់ ដែលចិនមានគម្រោងនឹងបាញ់គ្រាប់ពិត ឬនឹងត្រូវរៀបចំឡើងនៅម៉ោង ៨ ១៨នាទី ម៉ោងនៅក្នុងតំបន់ នៅក្នុងក្របខណ្ឌនៃលំហាត់យោធា ដែលត្រូវបានដាក់ឈ្មោះថា “បេសកកម្មយុត្តិធម៌ឆ្នាំ២០២៥”។
កាលពីថ្ងៃចន្ទ លោកអនុសេនីយ៍ឯកស្ហ៊ី យី អ្នកនាំពាក្យនៃបញ្ជាការចិន បានបញ្ជាក់ថា កងទ័ពចិនផ្តោចអារម្មណ៍លើការល្បាតត្រៀមប្រយុទ្ធនៅលំហ និងសមុទ្រ ការដណ្តើមរួមគ្នានូវប្រៀបខ្លាំងទាំងស្រុង ការបិទខ្ទប់កំពង់ផែ និងតំបន់គន្លឹះ ព្រមទាំងការកម្លាគ្រប់ទិសលើសត្រូវ។ មន្រ្តីយោធារូបនេះ បានវិនិច្ឆ័យថា លំហាត់សមយុទ្ធយោធា គឺជាការព្រមានធ្ងន់ៗ និងផ្ញើសារសម្រាប់កងកម្លាំងបំបែកខ្លួន ឯករាជ្យរបស់តៃវ៉ាន់ ហើយសមយុទ្ធក៏មានសកម្មភាពស្របច្បាប់ និងចាំបាច់ សម្រាប់ការថែរក្សាអធិបតេយ្យភាព និងឯកភាពជាតិនៃចិន”។
ចំណែកតៃវ៉ាន់ បានថ្លែងថា តំបន់ខ្លះដែលត្រូវកំណត់ដោយប្រទេសចិនសម្រាប់ការធ្វើសមយុទ្ធ ស្ថិតនៅមិនដល់ ១២ម៉ាយ ប្រវែងលើទឹក ឬប្រមាណជា ២០គម ពីឆ្នេរតៃវ៉ាន់។
កាលពីថ្ងៃចន្ទ តៃវ៉ាន់បានប្រាប់ថា តៃវ៉ាន់ក៏មានការដឹកនាំធ្វើលំហាត់យោធាវាយបករហ័សមួយផងដែរ និងបានប្រកាសថា បានចាប់ដានសញ្ញាយន្តហោះប្រយុទ្ធចំនួន ៨៩ គ្រឿង ព្រមទាំងនាវាចម្បាំង ២៨គ្រឿង និងនាវាឆ្មាំឆ្នេរចិន ដែលនៅជិតដែនដីរបស់ខ្លួន។ លោកស្រីការ៉េន គួ អ្នកនាំពាក្យនៃប្រធានាធិបតីតៃវ៉ាន់ បានមានប្រតិកម្មថា ៖ “ដោយឆ្លើយតបនឹងការម៉ាកងាយរបស់អាជ្ញាធរចិនចំពោះច្បាប់អន្តរជាតិ និងការប្រើប្រាស់យោធារបស់ពួកគេដើម្បីគំរាមកំហែងប្រទេសជិតខាង តៃវ៉ាន់សូមសម្តែងនូវការថ្កោលទោសយ៉ាងម៉ឺងម៉ាត់”។
ចំណែកប្រធានាធិបតីអាម៉េរិក លោកដូណាល់ ត្រាំ បាននិយាយថា លោកមិនបានព្រួយបារម្ភចំពោះការធ្វើសមយុទ្ធទាំងនេះឡើយ និងបញ្ជាក់ថា លោកមិនជឿថា សមភាគីចិនរបស់លោក លោកស៊ី ជីនពីង អាចបញ្ជាឲ្យមានការឈ្លានពាននោះទេ។
ប្រទេសចិនបានចាត់ទុកកោះតៃវ៉ាន់ជាផ្នែកនៃទឹកដីរបស់ខ្លួន និងគំរាមថា នឹងប្រើកម្លាំងយោធាដើម្បីដណ្តើមយក។ ភាពតានតឹងនៅក្នុងច្រកសមុទ្រត្រូវបានកើនឡើងវិញ បន្ទាប់ពីមានការលក់អាវុធដ៏សម្បើមរបស់ទីក្រុងវ៉ាស៊ីនតុន ទៅឲ្យទីក្រុងតៃប៉ិកាលពីពាក់កណ្តាលខែធ្នូ ដែលជាលើកទី២ ចាប់តាំងពីការត្រឡប់មកកាន់អំណាចរបស់លោកដូណាល់ ត្រាំ នៅអាម៉េរិក ជាមួយទំហំទឹកប្រាក់ ១១,១ ពាន់លានដុល្លារ ដែលជាទំហំនៃការលក់ដ៏ធំបំផុត ចាប់តាំងពីឆ្នាំ២០០១។
Daily Program
