សភាពាណិជ្ជកម្មអាមេរិក នៅកម្ពុជាជំរុញការពិចារណាឡើងវិញ បន្ទាប់ពីសហរដ្ឋអាមេរិកដំឡើងពន្ធ

បន្ទាប់ពីលោកប្រធានាធិបតី ដូណាល់ ត្រាំ បានប្រកាសដំឡើងពន្ធ ៤៩ភាគរយ លើមុខទំនិញកម្ពុជា ដែលនឹងនាំចូលទៅកាន់សហរដ្ឋអាមេរិកនោះ សភា​ពាណិជ្ជកម្ម​អាមេរិក​នៅ​កម្ពុជា​ ​ជំរុញ​ឲ្យ​មាន​ការ​ពិចារណា​ឡើង​វិញ​ និង​បញ្ចប់​ពន្ធ​លើ​ប្រទេស​កម្ពុជា​យ៉ាង​ឆាប់​រហ័ស។

សេចក្តីប្រកាសព័ត៌មាន របស់សភាពាណិជ្ជកម្មអាមេរិកនៅកម្ពុជា នៅរសៀលថ្ងៃទី៣ ខែមេសានេះ បានអោយដឹងថា «យើងសង្ឃឹមថាសមភាគីពាណិជ្ជកម្ម នឹងចូលរួមយ៉ាងសកម្ម និងបង្កើតដំណោះស្រាយសមហេតុផល ដែលអាចត្រូវបានអនុវត្តយ៉ាងឆាប់រហ័ស និងយ៉ាងម៉ឺងម៉ាត់ ដើម្បីដោះស្រាយកង្វល់សេដ្ឋកិច្ច និងសន្តិសុខជាតិរបស់សហរដ្ឋអាមេរិក»។

សភាពាណិជ្ជកម្មអាមេរិកនៅកម្ពុជា បន្តថា សភាពាណិជ្ជកម្ម ប្តេជ្ញាចិត្តចំពោះទំនាក់ទំនងពាណិជ្ជកម្មវិជ្ជមាន និងប្រកបដោយផលិតភាព។ និងត្រៀមខ្លួនជាស្រេចដើម្បីជួយដល់រាជរដ្ឋាភិបាលកម្ពុជាតាមតម្រូវការ។

នៅព្រឹកថ្ងៃទី៣ ខែមេសាដដែល ក្រុមការងារនៃក្រសួងសេដ្ឋកិច្ច និងហិរញ្ញាវត្ថុកម្ពុជា បាននឹងកំពុងវាយតម្លៃផលប៉ះពាល់សក្តានុពលនៃពន្ធគយ​ របស់សហរដ្ឋអាមេរិក ដែលទើបនឹងដាក់ថ្មី ដើម្បីបង្កើតយុទ្ធសាស្ត្រ ដើម្បីរក្សាការប្រកួតប្រជែងផ្នែកសេដ្ឋកិច្ចរបស់កម្ពុជា។

លោក មាស សុខសេនសាន្ត អ្នកនាំពាក្យ ក្រសួងសេដ្ឋកិច្ច និងហិរញ្ញាវត្ថុ បានអោយដឹងថា ៖«ក្រុមការងារកំពុងវាយតម្លៃផលប៉ះពាល់នៃពន្ធថ្មីនេះ។ រាជរដ្ឋាភិបាល​កំពុង​ពិនិត្យ​ស្ថានការណ៍​យ៉ាង​សកម្ម ដើម្បី​ត្រៀម​វិធានការ​ដោះស្រាយ​បញ្ហា​នេះ»។

ប្រធានាធិបតីអាម៉េរិក លោកដូ ណាល់ត្រាំ នៅថ្ងៃទី ២ មេសា បានប្រកាសយកពន្ធនាំចូលទំនិញថ្មីពីប្រទេសជាច្រើន ហើយក្នុងនោះក៏មានប្រទេសកម្ពុជាផងដែរដែលខ្ពស់ជាងគេប្រមាណជិត៥០ភាគរយ តាមពីក្រោយដោយឡាវ វៀតណាម ស្រីលង្កា។ការសម្រេចដំឡើងពន្ធថ្មីលើកម្ពុជា គឺដោយសារកម្ពុជាបានយកពន្ធលើមុខទំនិញរបស់អាម៉េរិកជិត១០០ភាគរយនាពេលកន្លងមក។

ក្នុងតារាងបញ្ជីប្រទេសដែលអាម៉េរិកសម្រេចដំឡើងពន្ធថ្មីលើមុខទំនិញ គឺប្រទេសកម្ពុជាឈរលើកំពូលតារាដែលមានប្រមាណ៤៩ភាគរយ។ប្រទេសផ្សេងទៀតដែលប្រឈមនឹងការដំឡើងពន្ធក្នុងអត្រាខ្ពស់បំផុតនោះ រួមមានវៀតណាម ៤៦% ស្រីលង្កា ៤៤% បង់ក្លាដែស ៣៧% ចិន ៣៤% ឥណ្ឌា ២៦% កូរ៉េខាងត្បូង ២៥% ជប៉ុន ២៤% និងប្រទេសក្នុងសហភាពអឺរ៉ុប ២០%។ សហរដ្ឋអាម៉េរិក គឺជាទីផ្សារនាំចេញដ៏ធំបំផុតរបស់កម្ពុជា ដែលស្មើនឹង ៣៧.៩% នៃតម្លៃនាំចេញរបស់ព្រះរាជាណាចក្រកម្ពុជា បន្ទាប់មក។

នៅឆ្នាំ ២០២៤ កម្ពុជាបាននាំចេញទំនិញទៅអាម៉េរិកមានតម្លៃ ៩,៩២ ពាន់លានដុល្លារ កើនឡើង ១១,៤ ភាគរយ ខណៈការនាំចូលពីសហរដ្ឋអាម៉េរិកមកកម្ពុជាមានចំនួន ២៦៤,១៥ លានដុល្លារ កើនឡើង ២,៧ ភាគរយ។ ទំហំពាណិជ្ជកម្មទ្វេភាគីសរុបរវាងប្រទេសទាំងពីរឈានដល់ ១០.១៨ ពាន់លានដុល្លារ កើនឡើង ១១.២% ធៀបនឹងឆ្នាំ ២០២៣។ ការនាំចេញរបស់កម្ពុជាទៅកាន់សហរដ្ឋអាម៉េរិកភាគច្រើនរួមមានសម្លៀកបំពាក់ ទំនិញ និងស្បែកជើង៕