អ្នកសង្កេតការណ៍អចិន្ត្រៃយ៍របស់សន្តអាសនៈប្រចាំនៅអង្គការសហប្រជាជាតិ លោកអគ្គអភិបាល ហ្គាព្រីពែល កាហ្សា (Gabriele Caccia) បានបញ្ជាក់ថា សន្តអាសនៈនឹងបន្តរួមចំណែកដល់ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន ហើយសង្កត់ធ្ងន់លើ "តួនាទីសំខាន់" របស់ស្ថាប័ននេះ ក្នុងការដោះស្រាយវិបត្តិមនុស្សធម៌នៅហ្គាហ្សា។
នៅពេលដែលសង្រ្គាមរវាងអ៊ីស្រាអែល និងក្រុមហាម៉ាស់នៅតែបន្ត ហើយបានសម្លាប់ និងបំផ្លិចបំផ្លាញនៅតំបន់ហ្គាហ្សា សន្តអាសនៈបានសន្យាថានឹងបន្តការគាំទ្រផ្នែកហិរញ្ញវត្ថុដល់ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅតំបន់ជិតបូព៌ា ហើយបានលើកទឹកចិត្តដល់អង្គការសហប្រជាជាតិទាំងអស់ ក៏ដូចជា រដ្ឋសមាជិកនានាឲ្យបន្តរួមចំណែកគាំទ្រដល់កិច្ចខិតខំប្រឹងប្រែងមនុស្សធម៌របស់ទីភ្នាក់ងារនេះ។
ទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន ត្រូវបានបង្កើតឡើងក្នុងឆ្នាំ ១៩៤៩ ដើម្បីផ្តល់ជំនួយសង្គ្រោះ ផ្ដល់សេវាសុខភាព និងសេវាអប់រំសម្រាប់ប្រជាជនប៉ាឡេស្ទីនដែលបានបាត់បង់ផ្ទះសម្បែង និងមធ្យោបាយចិញ្ចឹមជីវិតរបស់ពួកគេក្នុងអំឡុងសង្គ្រាមអារ៉ាប់-អ៊ីស្រាអែល ហើយមូលនិធិទាំងនេះបានដោយការបរិច្ចាគស្ម័គ្រចិត្តស្ថិតក្រោមការត្រួតពិនិត្យកាលពីដើមឆ្នាំនេះ ក្រោយពេលអ៊ីស្រាអែលបានអះអាងថាបុគ្គលិក១២នាក់ក្នុងចំណោមបុគ្គលិក១៣.០០០នាក់ ជាប់ពាក់ព័ន្ធជាមួយក្រុមហាម៉ាសអំពើភេរវកម្មនាថ្ងៃទី៧ខែតុលា។
ការចោទប្រកាន់របស់អ៊ីស្រាអែលនេះ បាននាំឱ្យម្ចាស់ជំនួយចំនួន ១៦ប្រទេស រួមទាំងសហរដ្ឋអាមេរិកផ្អាក ផ្តល់មូលនិធិរបស់ពួកគេដល់ទីភ្នាក់ងារនេះ។ ទោះជាយ៉ាងណា មនុស្សដ៏ច្រើន រួមទាំងសហភាពអឺរ៉ុបនិងអាល្លឺម៉ង់ផងនៅតែបន្តការបរិច្ចាគ ដោយផ្អែកលើវិបត្តិមនុស្សធម៌បន្ទាន់នៅហ្គាហ្សា ប៉ុន្តែមកដល់ពេលនេះ ស្ថាប័ននេះបានអះអាងថា ប្រភពមូលនិធិនឹងគ្មានទៀតទេ ហើយសកម្មភាពមនុស្សធម៌របស់ពូកគេអាចបន្តត្រឹមខែសីហាប៉ុណ្ណោះ៕
Daily Program
