សន្តអាសនៈអំពាវនាវឱ្យមានវិធានការជាសកលប្រឆាំងនឹងការជួញដូរស្ត្រី និងកុមារី

អ្នកសង្កេតការណ៍អចិន្ត្រៃយ៍នៃសន្តអាសនៈនាអង្គការសហប្រជាជាតិ និងអង្គការអន្តរជាតិផ្សេងទៀតនៅទីក្រុងហ្សឺណែវ បានអំពាវនាវឱ្យការពារស្ត្រី និងកុមារីដែលបន្តរងការជួញដូរ ជាពិសេសសម្រាប់ការពពោះជំនួស និងពេស្យាចារ។

ការជួញដូរមនុស្ស ដែលតែងតែមើលមិនឃើញ គឺជាការរំលោភបំពានយ៉ាងធ្ងន់ធ្ងរដល់សេចក្តីថ្លៃថ្នូររបស់មនុស្ស និងបង្កើតស្លាកស្នាមយ៉ាងជ្រៅដល់​ជនរងគ្រោះ ដែលជារឿយៗជាស្ត្រី និងកុមារី ។

នេះត្រូវបានបញ្ជាក់សារជាថ្មីនៅក្នុងសេចក្តីថ្លែងការណ៍របស់អ្នកសង្កេតការណ៍អចិន្ត្រៃយ៍របស់សន្តអាសនៈ ក្នុងកិច្ចប្រជុំ លើកទី ៥៦ នៃក្រុមប្រឹក្សាសិទ្ធិមនុស្សស្តីពី ការជួញដូរមនុស្ស ជាពិសេសស្ត្រី និងកុមារនៅទីក្រុងហ្សឺណែវ កាលពីពេលថ្មីៗនេះ ។

នៅក្នុងកិច្ចប្រជុំនោះសន្តអាសនៈបានបញ្ជាក់យ៉ាងម៉ឺងម៉ាត់ថា ៖ «ការជួញដូរមនុស្សត្រូវតែរាប់បញ្ចូលក្នុងចំណោមការរំលោភបំពានយ៉ាងធ្ងន់ធ្ងរមកលើសេចក្តីថ្លៃថ្នូររបស់មនុស្ស»។

សន្តអាសនៈគូសបញ្ជាក់ថា អ្នកដែលប្រថុយជីវិតនៅសមុទ្រ ស្វែងរកការស្វាគមន៍ និងជីវិតប្រសើរជាងមុន មិនគួរប្រឈមមុខនឹងការកេងប្រវ័ញ្ច និងការស្លាប់ជំនួសនរណាម្នាក់ឡើយ។

សន្តអាសនៈបានអំពាវនាវថា «យើងមិនត្រូវរក្សាភាពព្រងើយកន្តើយចំពោះមុខសោកនាដកម្ម ជាសកលនេះទេ»។

សន្តអាសនៈបានព្រមានថា មនុស្សដែលរស់នៅក្នុងភាពក្រីក្រខ្លាំងបំផុត ទំនងជានឹងធ្លាក់ចូលទៅក្នុងអន្ទាក់នៃការជួញដូរមនុស្ស និងទាសភាព ដូច្នេះហើយ វាជាទំនួលខុសត្រូវរួមរបស់យើង ជួយពួកគេស្វែងរកកន្លែងសុវត្ថិភាព និងសន្តិភាពផ្លូវចិត្តឡើងវិញ៕