ប្រមុខរដ្ឋាភិបាលនៃសន្តអាសនៈឬបុរីវ៉ាទីកង់ លោកកាឌីណាល់ ព្យែត្រូ ផារ៉ូលីន បានលើកឡើងដោយការព្រួយបារម្ភថា ពិភពលោកសព្វថ្ងៃហាក់កំពុងតែមាននិន្នាការលែងគោរពច្បាប់មនុស្សធម៌។ នេះបើតាមសេចក្តីរាយការណ៍របស់វ៉ាទីកង់ញូវ។
លោកកាឌីណាល់ ព្រួយបារម្ភអំពី "ការរំលោភច្បាប់អន្តរជាតិជាប្រព័ន្ធ" ជាពិសេសការទម្លាក់គ្រាប់បែកលើជនស៊ីវិល និងការសម្លាប់បុគ្គលិកមនុស្សធម៌។
លោកបានបញ្ជាក់ថា “យើងពិតជាព្រួយបារម្ភយ៉ាងខ្លាំងចំពោះការរំលោភលើច្បាប់អន្តរជាតិជាប្រព័ន្ធ”។
វ៉ាទីកង់ញូវបានរាយការណ៍ថា ចំណាប់អារម្មណ៍របស់លោកកាឌីណាល់ គឺធ្វើឡើងក្រោយពេលដែលពិភពលោកកំពុងប្រឈមជម្លោះផ្សេងៗជុំវិញពិភពលោក ជាពិសេសអំពើហិង្សាថ្មីៗនៅតំបន់ហ្គាហ្សា ដែល សម្តេចប៉ាបទើបតែបានថ្កោលទោសកាលពីម្សិលមិញតាមរយៈសាររបស់ទ្រង់។
លោកកាឌីណាល់បានប្រាប់អ្នកសារព័ត៌មានថា ការអំពាវនាវរបស់សម្តេចប៉ាប "គឺជាការអំពាវនាវឱ្យបញ្ឈប់សង្គ្រាម ដើម្បីស្វែងរកកិច្ចសន្ទនា និងសន្តិភាព"។
លោកកាឌីណាល់ បាននិយាយថា "ថ្មីៗនេះ យើងបាននិយាយជាមួយកាកបាទក្រហម ហើយពួកគេក៏ជួបការលំបាកខ្លាំងដែរ។ ការទម្លាក់គ្រាប់បែកលើជនស៊ីវិល ការសម្លាប់បុគ្គលិកមនុស្សធម៌ ទាំងនេះគឺជាសកម្មភាពដែលផ្ទុយនឹងច្បាប់មនុស្សធម៌ ហើយសព្វថ្ងៃនេះ គ្មានគោរពច្បាប់មនុស្សធម៌ទេ។ នេះគឺជាដែនកំណត់ដ៏អស្ចារ្យមួយនៃសម័យកាលនេះ។
ជុំវិញការលើកឡើងបែបនេះស្ថានទូតអ៊ីស្រាអែលប្រចាំនៅសន្តអាសនៈ បានឆ្លើយតប នៅថ្ងៃទី២៥ខែមីនា តាមរយៈគណនីរបស់ខ្លួននៅលើគេហទំព័រ X ដោយបញ្ជាក់ថា អ៊ីស្រាអែលកំពុងអនុវត្ត ទៅតាមច្បាប់អន្តរជាតិ៕
Daily Program
