សន្តអាសនៈបានសម្តែងការរំលែកទុក្ខ និងអធិដ្ឋានជូន ដល់ជនរងគ្រោះ បន្ទាប់ពីមានការផ្ទុះនៅក្នុងអណ្តូងរ៉ែធ្យូងថ្ម មួយកន្លែងនៅភាគឦសានប្រទេសអ៊ីរ៉ង់ ដែលបានបណ្តាលឲ្យមនុស្សយ៉ាងហោចណាស់ហាសិបនាក់ស្លាប់។
លោកកាឌីណាល់ ព្យែត្រូ ផារ៉ូលីន នាយករដ្ឋមន្រ្តីសន្តអាសនៈនៅក្នុងនាមសម្តេចប៉ាបហ្រ្វង់ស៊ីស្កូ បានសម្តែងការរំលែកទុក្ខរបស់លោក ចំពោះជនរងគ្រោះនៃការផ្ទុះនៅក្នុងអណ្តូងរ៉ែធ្យូងថ្មនៅទីក្រុង តាបាស (Tabas )ក្នុងតំបន់ភាគឦសាននៃប្រទេសអ៊ីរ៉ង់។
ឧបទ្ទវហេតុនេះបានកើតឡើងកាលពីល្ងាចថ្ងៃសៅរ៍ ទី២១ ខែកញ្ញា ដោយបានឆក់យកជីវិតជនរងគ្រោះជាង ៥០នាក់ ហើយមនុស្សមួយចំនួននៅតែបាត់ខ្លួននៅឡើយ។
លោកកាឌីណាល់បានបន្តថា សម្តេចប៉ាបនៅពេលនេះទ្រង់ កំពុងអធិស្ឋាន ជូនដល់អស់អ្នកដែលបានស្លាប់ និងសម្រាប់គ្រួសារដែលបានស្លាប់បាត់បង់ជីវិត។
យោងតាមប្រព័ន្ធផ្សព្វផ្សាយអ៊ីរ៉ង់ ការផ្ទុះបានកើតឡើងខណៈពេលដែលមនុស្សប្រហែល ៧០ នាក់កំពុងធ្វើការនៅកន្លែងនោះ ហើយក៏ផ្ទុះដែលបណ្តាលមកពីការលេចធ្លាយមេតាន។ អាជ្ញាធរជឿថា កម្មករដែលជាប់ក្នុងអណ្ដូងរ៉ែមិនរួចជីវិតឡើយ។
លោក ម៉ាស៊ូ ប៉េហ្សេស្កាន ( Masoud Pezeshkian) ប្រធានាធិបតីអ៊ីរ៉ង់ បានបញ្ជាឱ្យមានការស៊ើបអង្កេតបន្ទាប់ពីឧបទ្ទវហេតុនេះ ដែលជាគ្រោះមហន្តរាយរុករករ៉ែដ៏អាក្រក់បំផុតមួយនៅក្នុងប្រវត្តិសាស្រ្តថ្មីៗនេះរបស់ប្រទេសអ៊ីរ៉ង់។
Daily Program
