វិមានក្រឹមឡាំងប្រុងប្រៀបអំពីកិច្ចពិភាក្សាដ៏ស្មុគស្មាញ នៅអំឡុងកិច្ចចរចានៅ ទីក្រុង​អ៊ីស្តង់ប៊ូល

ក្រោមពីបរាជ័យនៃកិច្ចចរចាចំនួន ២ដង កាលពីលើកមុន កិច្ចសន្ទនាជុំទី៣ រវាងរុស្ស៊ី និង អ៊ុយក្រែន បានប្រព្រឹត្តិទៅកាលពីថ្ងៃពុធ ទី២៣ ខែកក្កដា នៅទីក្រុងអ៊ីស្តង់ប៊ូល ប្រទេសទួរគី ក្រោម​សំពាធរបស់លោកប្រធានាធិបតីអាម៉េរិក លោកដូណាល់ ត្រាំ ដែលបានផ្តល់​ឲ្យទីក្រុង​មូស្គូ ៥០ថ្ងៃ ដើម្បីស្វែងរកកិច្ចព្រមព្រៀងមួយ ក្រោមការគំរាមដាក់ទណ្ឌកម្មដ៏ធ្ងន់ធ្ងរ។

លោក​វ៉ូឡូឌីមៀ ហ្សេឡេនស្គី ដែលជាប្រភពនៃការផ្តួចផ្តើមនេះ សង្ឃឹមនឹងបើកផ្លូវសម្រាប់​ជំនួប​ផ្ទាល់ជាមួយលោកវ្លាឌីមៀ ពូទីន ដើម្បីទទួលបានការឈប់បាញ់ និងការដោះដូរ​ខាង​មនុស្ស​ធម៌ ប៉ុន្តែវិមានក្រឹមឡាំង បានព្រមានរួចហើយថា គេមិនត្រូវរំពឹងការរីកចម្រើន​ទៅ​មុខ​ដ៏​អស្ចារ្យនូវការចរចា និងវិនិច្ឆ័យថា ជំហរនៃភាគីទាំងពីរគឺផ្ទុយគ្នាស្រឡះ។

ស្របពេលគ្នានេះដែរ ការវាយប្រហាររបស់រុស្ស៊ីបន្តនៅខណៈដែលសម្ព័ន្ធមិត្តលោកខាងលិច ពង្រឹងជំនួយយោធារបស់ពួកគេនៅក្នុងក្របខណ្ឌនៃយុទ្ធនាការ ៥០ថ្ងៃ ក្នុងគោលដៅជំរុញឲ្យ​លោកពូទីនមកតុចរចា។ ហើយរឿងនេះត្រូវបន្ថែមពីលើដោយភាពតានតឹងដោយ​ការទូតថ្មី ដែល​ទីក្រុងប៉េកាំង កាលពីថ្ងៃទី២៣ ខែកក្កដា បានតវ៉ាប្រឆាំងនឹងទណ្ឌកម្មរបស់អឺរ៉ុបដែល​សំដៅ​លើធនាគារចិន​ដែលពាក់ព័ន្ធនឹងការផ្តល់ហិរញ្ញប្បទានឲ្យរុស្ស៊ី។

អ្នកនាំពាក្យប្រធានាធិបតីរុស្ស៊ី លោកឌីមីទ្រី ប៉េស្កូវ បានថ្លែងថា កិច្ចពិភាក្សានឹង​លើក​ឡើង​ជា​សំខាន់​លើបញ្ហាដែលពាក់ព័ន្ធនឹងគំរោងនៃកំណត់ចំណាំ ដែលបានផ្លាស់ប្តូរគ្នា​កាលពី​ខែ​មិថុនា​ដោយភាគីទាំងពីរ និងរួមបញ្ចូលទាំងការទាមទារ​រាងៗខ្លួន។ លោកបានបញ្ជាក់ថា កំណត់ចំណាំទាំងនេះគឺមានភាពផ្ទុយគ្នាដាច់ស្រឡះ។ លោកឌីមីទ្រី ប៉េស្កូវ បានបញ្ជាក់ថា គណៈប្រតិភូរបស់រុស្ស៊ីនឹងមិនផ្លាស់ប្តូរ និងត្រូវដឹកនាំ​ដូចការប្រជុំលើកមុនកាលពីខែឧសភា និង​មិថុនា គឺដឹកនាំដោយអតីតរដ្ឋមន្រ្តីវប្បធម៌ និងអ្នកប្រវត្តិសាស្រ្តជាតិនិយម លោកវ្លាឌីមៀ ម៉េឌីនស្គី។

ចំណែកអ៊ុយក្រែន បាននិយាយថា សង្ឃឹមនឹងមានជំហរស្ថាបនាពីភាគីក្រុងមូស្គូ។ តាមប្រភព​អានាមិកមួយបានឲ្យដឹងថា អ្វីគ្រប់យ៉ាងនឹងអាស្រ័យលើឆន្ទៈរបស់រុស្ស៊ីដែល​ត្រូវបោះបង់​ចោល​ការ​ទាមទារ​ដាច់ខាតរបស់​ខ្លួន។

រដ្ឋមន្រ្តីការបរទេសអ៊ុយក្រែន លោកអន់ឌ្រីអ៊ី ស៊ីប៊ីហ្គា និងសមភាគីអ៊ីស្រាអែលរបស់លោក លោកហ្ស៊ីដឺអុង សាអា ដែលបានធ្វើទស្សនកិច្ចនៅអ៊ុយក្រែន បានប្រកាស​អំពីការបើកកិច្ច​សន្ទនា​រវាងប្រទេសទាំងពីរដើម្បីប្រឆាំងរួមគ្នាទល់នឹងការគំរាមកំហែងរបស់អ៊ីរ៉ង់។ ការធ្វើដំណើរមកកាន់ទីក្រុងគៀវរបស់មន្រ្តីជាន់ខ្ពស់អ៊ីស្រាអែល ដែលត្រូវបានស្វាគមន៍​ដោយ​អាជ្ញាធ​រអ៊ុយក្រែន កើតមានឡើងប៉ុន្មានសប្តាហ៍ ក្រោយពីការវាយប្រហាររបស់អ៊ីស្រាអែល និង​សហរដ្ឋអាម៉េរិកទៅលើមជ្ឈមណ្ឌលនុយក្លេអ៊ែររបស់អ៊ីរ៉ង់។

ចំណែករដ្ឋមន្រ្តីក្រសួងពាណិជ្ជកម្មចិន លោកវ៉ាង វ៉េនតាវ បានតវ៉ាទៅកាន់សមភាគីអឺរ៉ុបអំពី​ការ​ដាក់បញ្ចូលធនាគារចិនពីរ​នៅក្នុងការដាក់ទណ្ឌកម្ម​ចុងក្រោយដោយសហភាពអឺរ៉ុបចំពោះ​ទណ្ឌកម្មសម្រាប់រុស្ស៊ីរឿងសង្រ្គាមនៅអ៊ុយក្រែន។

ងាកមកមើលសរភូមិប្រយុទ្ធ លោកវ៉ូឡូឌីមៀ ហ្សេឡេនស្គី បានថ្លែងថា អ៊ុយក្រែនបាន​បាត់បង់​​ជាលើកដំបូងនូវយន្តហោះចម្បាំងបារាំង មីរ៉ាហ្ស៍ ២០០០ កាលពីថ្ងៃអង្គារ នៅ​អំឡុង​បេសកកម្ម តែពីឡុតរបស់យន្តហោះ អាចផ្តាច់ខ្លួនចេញបាន។ ជាសំណាងមិនល្អ យើង​បាត់បង់​យន្តហោះចម្បាំងមួយគ្រឿង។ ប្រមុខរដ្ឋអ៊ុយក្រែន បាននិយាយក្នុងកិច្ចថ្លែងការណ៍​ប្រចាំ​ថ្ងៃថា នេះគឺជាយន្តហោះបារាំងដ៏មានប្រសិទ្ធភាព ជាមួយនឹងពីឡុតយើង។