លោក ជូង ជុងី ដែលជាអតីតអតីត សមាជិកគណៈកម្មាធិការអចិន្ត្រៃយ៍ គណបក្សភ្លើងទៀន និងជាមេធាវីការពារក្តីឱ្យលោក ស៊ុន ចន្ធី ប្រធានគណបក្ស កម្លាំងជាតិ បានសម្រេចស្នើសុំចូលរួមជីវភាពនយោបាយជាមួយនឹងគណបក្សកម្លាំងជាតិ។
យោងតាមលិខិតដែលលោក ជូង ជុងី ផ្ញើជូនលោកប្រធានគណបក្សកម្លាំងជាតិ ចុះថ្ងៃទី១ ខែកក្កដា ឆ្នាំ២០២៤ បានលើកឡើងថា ៖ «ខ្ញុំបាទឈ្មោះ ជូង ជូងី ជាអតីត សមាជិកគណៈកម្មាធិការអចិន្ត្រៃយ៍ គណបក្សភ្លើងទៀន សូមគោរពជូន លោកប្រធានគណបក្សកម្លាំងជាតិ សំណើសុំចូលរួមជីវភាពនយោបាយ ជាមួយគណបក្សកម្លាំងជាតិ ចាប់ពី ថ្ងៃទី០១ ខែកក្កដា ឆ្នាំ២០២៤ តទៅ»។
លោកបានបន្តទៀតថា ដោយឃើញថា គណបក្សកម្លាំងជាតិ មានជំហរនយោបាយរឹងមាំ ច្បាស់លាស់ ដែលជាកត្តាសក្តានុពល មានឆន្ទៈខ្ពស់ មានមនសិកាជាតិខ្ពស់ ហ៊ានប្រឈម ក្នុងការតស៊ូនយោបាយ ដើម្បីការផ្លាស់ប្ដូរជាវិជ្ជមាន ដោយសន្តិវិធី។
លោក ជូង ជុងី បានបញ្ជាក់ថា ៖ «ដោយឃើញថា គណបក្សកម្លាំងជាតិ មានទឹកចិត្ត ស្រឡាញ់យុត្តិធម៌ យកចិត្តទុកដាក់ ចំពោះសុខទុក្ខរបស់ប្រជារាស្ត្រ ហ៊ានចេញមុខការពារសិទ្ធិ និងការពារប្រយោជន៍ ប្រជាពលរដ្ឋ។ ដូចនេះ ខ្ញុំបាទ សម្រេចសុំចូលរួមជីវភាពនយោបាយ ជាមួយគណបក្សកម្លាំងជាតិ ចាប់ពី ថ្ងៃទី០១ ខែកក្កដា ឆ្នាំ២០២៤ នេះ តទៅ»។
សូមរម្លឹកថា លោក ជូង ជូងី ត្រូវបានគេដាក់រហស្សនាមថា ជាមេធាវីការពារក្ដី មិនដែលឈ្នះឱ្យអ្នកនយោបាយប្រឆាំង និងសកម្មជនសង្គម បានដាក់ពាក្យសុំចូលរួមជីវភាពនយោបាយជាមួយគណបក្សភ្លើងទៀន កាលពីថ្ងៃទី១៦ ខែវិច្ឆិកា ឆ្នាំ២០២២ បន្ទាប់ពីផុតបម្រាមរយៈពេល ៥ឆ្នាំ ដែលតុលាការកំពូលហាមឃាត់ធ្វើសកម្មភាពនយោបាយ កាលពីខែវិច្ឆិកា ឆ្នាំ២០១៧ បន្ទាប់ពីតុលាការកំពូលរំលាយគណបក្សសង្គ្រោះជាតិ។
កាលពីថ្ងៃទី២៨ ខែមិថុនា លោក ជូង ជូងី បានដាក់ពាក្យសុំលាលែងពីសមាជិកគណៈកម្មាធិការអចិន្ត្រៃយ៍គណបក្សភ្លើងទៀន បន្ទាប់ពីលោកបានចូលរួមជីវភាព នយោបាយជាមួយគណបក្សនេះ រយៈពេលជាង១ ឆ្នាំ៕
Daily Program
