លោក ជា មុនី៖ គណបក្សកម្លាំងជាតិបានរៀបចំខ្លួនជាស្រេចក្នុងការចូលរួមបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ឆ្នាំ២០២៤នេះ
លោក ជា មុនី អនុប្រធាន និងជាអ្នកនាំពាក្យគណបក្សកម្លាំងជាតិ បានប្រាប់RVA Khmer ឱ្យដឹងកាលពីថ្ងៃទី១៦ ខែឧសភាថា បើទោះបីជាប្រធានគណបក្សរបស់លោកត្រូវបានចាប់ខ្លួនក៏ដោយ ប៉ុន្តែសមាជិករបស់គណបក្សទាំងថ្នាក់ជាតិ និងថ្នាក់ក្រោមជាតិមិនមានការភ័យបារម្ភ ឬខ្លាចរអាក្នុងការបន្តបេសកកម្មរបស់ខ្លួនឡើយ។
លោកបានឱ្យដឹងទៀតថា គណបក្សកម្លាំងជាតិបានរៀបចំខ្លួនជាស្រេចក្នុងការចូលរួមបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ហើយគណបក្សកម្លាំងជាតិក៏មានបេក្ខជនរបស់ខ្លួនឈរឈ្មោះស្ទើរតែគ្រប់រាជធានីខេត្តទូទាំងប្រទេសផងដែរ។
លោក ជា មុនី មានប្រសាសន៍ថា ៖ «ទោះបីជា ប្រធានគណបក្សត្រូវបានចាប់ខ្លួន តែគណបក្សកម្លាំងជាតិនៅតែបន្តដំណើរ សកម្មភាពធម្មតា ទៅតាមផែនការដែលបានគ្រោងទុក ហើយយើងក៏នៅតែបន្តធ្វើការទាមទារឱ្យមានការដោះលែងមេដឹកនាំរបស់គណបក្សកម្លាំងជាតិផងដែរ»។
លោកបានបញ្ជាក់ថា ៖ «យើងសង្ឃឹមនិងជឿជាក់ថា គណបក្សកម្លាំងជាតិនឹងទទួលបានជោគជ័យក្នុងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ខាងមុខនេះ ព្រោះពួកគាត់នៅតែមានភាពស្មោះស្ម័គ្រជាមួយនឹងគណបក្សរបស់យើង»។
អ្នកនាំពាក្យគណបក្សកម្លាំងជាតិរូបនេះ នៅតែអះអាងថា ការចាប់ខ្លួនលោក ស៊ុន ចន្ធី ប្រធានគណបក្សកម្លាំងជាតិ ជារឿងនយោបាយច្រើនជាងបញ្ហាផ្សេងៗទៀត។
សូមរំលឹកដែរថា លោក ស៊ុន ចន្ធី ប្រធានគណបក្សកម្លាំងជាតិ ត្រូវបានអាជ្ញាធរចាប់ខ្លួនភ្លាមៗ បន្ទាប់ពីលោកមកដល់ព្រលានយន្តហោះភ្នំពេញនៅព្រឹកថ្ងៃទី៩ ខែឧសភា ឆ្នាំ២០២៤ ក្នុងដំណើរត្រលប់មកពីប្រទេសជប៉ុនដែលលោកធ្វើទស្សនកិច្ច និងប្រកាសសុពលភាពតំណាងគណបក្សកម្លាំងជាតិប្រចាំប្រទេសជប៉ុន។
លោក ជា មុនី ក៏បានធ្វើការផ្តាំផ្ញើទៅដល់សមាជិករបស់គណបក្សកម្លាំងជាតិផងដែរថា ៖ «ប្រសិនបើបានក្លាយជាក្រុមប្រឹក្សាខេត្ត ស្រុក ក្រុង សុំមើលពលរដ្ឋមួយចំនួនដែលគាត់មានបញ្ហា ត្រួវយកបញ្ហាទាំងនោះមកជជែកគ្នា ហើយបើមានគំនាបខ្លាំងពេក គឺត្រូវលាឈប់»។
គណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា គណៈកម្មការរាជធានី ខេត្តរៀបចំការបោះឆ្នោត (គធ.ខប) បានសម្រេចទទួលស្គាល់ពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះរបស់គណបក្សនយោបាយចំនួន៥រួមមាន៖ ទី១៖ គណបក្សប្រជាជនកម្ពុជា, ទី២៖ គណបក្ស ឆន្ទៈខ្មែរ, ទី៣៖ គណបក្ស កម្លាំងជាតិ, ទី៤៖ គណបក្សហ៊្វុនស៊ិនប៉ិច និងទី៥៖ គណបក្សខ្មែររួបរួមជាតិ។
ការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ឆ្នាំ២០២៤ដែលមានចំនួនអ្នកបោះឆ្នោតក្នុងបញ្ជីបោះឆ្នោតជាសមាជិកក្រុមប្រឹក្សាឃុំ សង្កាត់នៅក្នុងមុខតំណែងសរុបចំនួន ១១ ៦២២ នាក់ ក្នុងនោះស្រីចំនួន ២ ៥៧៤ នាក់ និងការិយាល័យបោះឆ្នោតសរុបចំនួន ២០៩ ការិយាល័យ៕
Daily Program
