កាលពីថ្ងៃចន្ទទី១ ខែកញ្ញា ប្រធានាធិបតីរុស្ស៊ីបានការពារសង្រ្គាមរបស់លោកនៅអ៊ុយក្រែន និងចោទប្រកាន់សាជាថ្មីលើលោកខាងលិចថាបានបញ្ឆេះសង្រ្គាមនេះ នៅកិច្ចប្រជុំកំពូលដែលរៀបចំឡើងដោយរដ្ឋាភិបាលទីក្រុងប៉េកាំងនៅទីក្រុងធានជីន ប្រទេសចិន។
នៅអំឡុង កិច្ចប្រជុំកំពូលនៃអង្គការកិច្ចសហប្រតិបត្តិការសៀងហៃ OCS លោកវ្ល៉ាឌីមៀ ពូទីន ប្រធានាធិបតីរុស្ស៊ី បានថ្លែងថា ៖ “វិបត្តិនេះមិនមែនបញ្ឆេះឡើងដោយការវាយប្រហាររបស់ រុស្ស៊ីនៅអ៊ុយក្រែននោះទេ វាគឺជាលទ្ធផលនៃរដ្ឋប្រហារនៅអ៊ុយក្រែនដែលត្រូវបានគាំទ្រ និង បង្កើតឡើងដោយលោកខាងលិច”។ ការថ្លែងបែបនេះគឺលោកយោងលើចលនាគាំទ្រអឺរ៉ុបនៃបដិវត្តម៉ៃអ៊ីដាន នៅអ៊ុយក្រែន ដែលបានបង្ខំឲ្យប្រធានាធិបតីគាំទ្ររុស្ស៊ីចាកចេញពីអំណាចនៅឆ្នាំ២០១៤។ លោកបានបន្ថែមថា ៖ “ដើម្បីឲ្យដំណោះស្រាយវិបត្តិអ៊ុយក្រែនឲ្យមានចីរភាព និងមានរយៈពេលវែង គេត្រូវប្រឈមមុខដោះស្រាយមូលហេតុស៊ីជម្រៅនៃវិបត្តិ។” លោកពូទីន បាននិយាយម្តងទៀតថា មួយផ្នែកនៃប្រភពនៃសង្រ្គាមគឺស្ថិតលើការប៉ុនប៉ងដែលចេះតែបន្តរបស់លោកខាងលិចក្នុងការធ្វើសហរហកម្មអ៊ុយក្រែនទៅក្នុងអង្គការណាតូ”។
២ សប្តាហ៍ បន្ទាប់ពីបានជួបលោកដូណាល់ ត្រាំនៅរដ្ឋអាឡាស្កាសហរដ្ឋអាម៉េរិក លោកវ្ល៉ាឌីមៀ ពូទីន បានថ្លែងថា កិច្ចព្រមព្រៀងដែលធ្វើជាមួយប្រធានាធិបតីអាម៉េរិក បានបើកផ្លូវសម្រាប់សន្តិភាពនៅអ៊ុយក្រែន។ នេះគឺជាប្រធានបទដែលលោកប្រធានាធិបតីរុស្ស៊ីបានលើកឡើងជាមួយមេដឹកនាំដែលចូលរួមក្នុងកិច្ចប្រជុំកំពូលតំបន់នៅប្រទេសចិន។ កាលពីថ្ងៃអាទិត្យ លោកពូទីន បានមានប្រសាសន៍ថា លោកបានសន្ទនាសេចក្តីលំអិតជាមួយប្រធានាធិបតីចិន លោកស៊ី ជីនពីង អំពីលទ្ធផលនៃកិច្ចចរចាជាមួយលោកដូណាល់ ត្រាំ និងការងារបន្តដើម្បីដោះស្រាយវិបត្តិសង្រ្គាម។
លោកប្រធានាធិបតីរុស្ស៊ី ក៏បានថ្លែងទៀតថា ៖ “យើងបានវាយតម្លៃយ៉ាងធំធេងដល់កិច្ចខិតខំប្រឹងប្រែង និងសំណើរបស់ប្រទេសចិន និងឥណ្ឌាដែលសំដៅធ្វើឲ្យងធូរស្រាលនៃវិបត្តិនៅអ៊ុយក្រែន”។
ចំណែកនៅប្រទេសអ៊ុយក្រែន កាលពីថ្ងៃចន្ទ ទី១ ខែកញ្ញា ប្រធានាធិបតីបានប្រកាសអំពីការឃាត់ខ្លួនអ្នកដែលសន្មត់ថាជាជនបង្កការធ្វើឃាតលើអតីតប្រធានសភាអ៊ុយក្រែន លោកអន់ឌ្រីអ៊ី ប៉ារូបីយី ដែលហេតុការណ៍នេះកើតឡើងនៅថ្ងៃទី៣០ ខែសីហា នៅភាគខាងលិចនៃប្រទេស។
រដ្ឋមន្រ្តីក្រសួងមហាផ្ទៃអ៊ុយក្រែន លោកអ៊ីហ្គ័រ គ្លីមេនកូ បានបញ្ជាក់ថា ជនសង្ស័យត្រូវបានកោះហៅនៅក្នុងតំបន់ខ្មេលនីស្គី នៅចន្លោះទីក្រុងអិលវីវ និងទីក្រុងគៀវ ចេញពីប្រតិបត្តិការដែលធ្វើឡើងដោយសមាជិកកងកម្លាំងសន្តិសុខអ៊ុយក្រែនប្រមាណ ១០នាក់។
លោកវ៉ូឡូឌីមៀ ហ្សេឡេនស្គី ប្រធានាធិបតីអ៊ុយក្រែនបានអះអាងតាមបណ្តាញសង្គមថា ការស៊ើបនៅអង្កេតបន្ត និងបានអរគុណដល់ក្រុមស៊ើបអង្កេតសម្រាប់ការងារដ៏រហ័ស និងមានលំដាប់លំដោយរបស់ពួកគេ។
លោកអន់ឌ្រីអ៊ី ប៉ារូបីយី អាយុ ៥៤ឆ្នាំ គឺជានិមិត្តរូបនៃបដិវត្តន៍គាំទ្រអឺរ៉ុប ម៉ៃអ៊ីដាន និងបានធ្វើជាប្រធានសភាអ៊ុយក្រែន សភារ៉ាដា ពីឆ្នាំ២០១៦ ដល់ឆ្នាំ២០១៩។ លោកត្រូវបានសម្លាប់ដោយខ្មាន់កាំភ្លើងកាលពីថ្ងៃសៅរ៍ ទី៣០ ខែសីហា។ នេះគឺជាការធ្វើឃាតដែលប្រមុខចារកម្មយោធាអ៊ុយក្រែន លោកគីរីឡូ ប៊ូដាណូវ បានទម្លាក់ដោយបញ្ឆិតបញ្ឆៀងការទទួលខុសត្រូវនៃឃាតកម្មជាស្នាដៃរបស់រុស្ស៊ី។
លោកអន់ឌ្រីអ៊ី ប៉ារូបីយី ត្រូវបានស្គាល់ជាពិសេសសម្រាប់តួនាទីរបស់លោកនៅក្នុងចលនាធំៗគាំទ្រអឺរ៉ុបនៅអ៊ុយក្រែន ដំបូងបដិវត្តពណ៌ទឹកក្រូចនៅឆ្នាំ២០០៤ បន្ទាប់មកបដិវត្តម៉ៃអ៊ីដាន នៅឆ្នាំ២០១៤។ លោកគឺជាមេបញ្ជាការក្រុមស្វ័យការពារនៅអំឡុងបាតុកម្មនៅទីលានម៉ៃអ៊ីដាន ដែលត្រូវបង្រ្កាបដោយការបង្ហូរឈាម។ ចលនានេះបានបង្ខំឲ្យប្រធានាធិបតីគាំទ្ររុស្ស៊ី លោកវីកទ័រ ឡានូកូវីត ចាកចេញពីអំណាចដើម្បីភៀសខ្លួនទៅកាន់រុស្ស៊ីនៅឆ្នាំ២០១៤។
Daily Program
