លោកវ៉ូឡូឌីមៀ ហ្សេឡេនស្គី អំពាវនាវឲ្យសម្ព័ន្ធមិត្តស្វែងរកទម្រង់នៃកិច្ចចរចា​ដែលរួមបញ្ចូលទាំងអ៊ុយក្រែន

កាលពីចុងសប្តាហ៍ ប្រធានាធិបតីអ៊ុយក្រែន បានបញ្ជាក់ថា គ្មានកិច្ចចរចាសន្តិភាពជាមួយនឹង​រុស្ស៊ីអាចជោគជ័យដោយគ្មានអ៊ុយក្រែនទេ។ លោកវ៉ូឡូឌីមៀ ហ្សេឡេនស្គី បានសុំឲ្យសម្ព័ន្ធ​មិត្តកំណត់និយមន័យនៃទម្រង់នៃកិច្ចចរចាដែលរួមបញ្ចូលទាំងទីក្រុងគៀវ និងបរិហាររាល់ការ​ប៉ុនប៉ងរបស់ទីក្រុងមូស្គូ​ដោយដាក់កិច្ចព្រមព្រៀង​ដោយគ្មានការអនុញ្ញាតយល់ព្រមពី​អ៊ុយក្រែន។

នៅអំឡុងជំនួបនៅទីក្រុងគៀវជាមួយសមភាគីម៉ូលដាវី គឺលោកស្រីម៉ៃអា សានឌូ មេដឹកនាំ​អ៊ុយក្រែន លោកវ៉ូឡូឌីមៀ ហ្សេឡេនស្គី បានអះអាងថា ៖ ”វាមិនអាចទៅរួចនឹង​ផាត់​អ៊ុយក្រែន​ចេញ​ពីរាល់គ្រោងការនៃកិច្ចចរចា។ ឬក៏គ្រោងការនៃកិច្ចចរចានេះនឹងមិនមាន​លទ្ធផល​ពិត​ប្រាកដ។”

”មុនរាល់កិច្ចប្រជុំ មិនថាយ៉ាងណា? វាល្អប្រសើរនឹងរៀបចំទម្រង់នៅលើក្រដាស ៖ តើយើង​អាច​ឈានទៅដល់សន្តិភាពដោយយុត្តិធម៌ដោយរបៀបណា? លោកហ្សេឡេនស្គី បន្តថា យើងគួរតែផ្តោចអារម្មណ៍លើចំនុចនេះនាពេលសព្វថ្ងៃ។ លោកខ្លាច​ថា ប្រទេសរុស្ស៊ី​ជ្រើសរើស​​ទម្រង់នៃការទាមទារផ្លូវការនៃសន្តិភាព​ដែលមិនទទួលការ​អនុញ្ញាត​​ពីអ៊ុយក្រែន។

ចាប់តាំងពីការវិលត្រឡប់របស់លោកដូណាល់ ត្រាំ មកកាន់សេតវិមាន ការព្យាករណ៍អំពី​លទ្ធភាព​​​នៃកិច្ចចរចាសន្តិភាពរវាងអ៊ុយក្រែន និងរុស្ស៊ី កាន់តែរីកធំឡើង មុនថ្ងៃខួបឆ្នាំទី៣ នៃ​សង្រ្គាម​​ដ៏​ឃោរឃៅ។

កាលពីថ្ងៃសុក្រ ប្រធានាធិបតីរុស្ស៊ី លោកវ្លាឌីមៀ ពូទីន បានថ្លែងថា លោកត្រៀម​ខ្លួន​ធ្វើ​កា​រ​ជាមួយ​​សហរដ្ឋ​អាម៉េរិក​សម្រាប់កិច្ចចរចាអំពីបញ្ហាអ៊ុយក្រែន និងកោតសរសើរ​បុគ្គលិក​លក្ខណៈ​​ដោះស្រាយបញ្ហា និងភាពឈ្លាសវៃនៃសមភាគីអាម៉េរិករបស់លោក។

ទីក្រុងក្រឹមឡាំងមិនបានបញ្ជាក់ថាពេលណាដែលកិច្ចពិភាក្សាអាចនឹងធ្វើឡើង។ រដ្ឋបាល​រុស្ស៊ី​បានប្រាប់ឲ្យដឹងថា រង់ចាំសញ្ញាពីទីក្រុងវ៉ាស៊ីនតុន។ លោកដូណាល់ ត្រាំ បាន​ប្រកាស​ថា លោក​ត្រៀម​នឹងជួបលោកវ្លាឌីមៀ ពូទីន នាពេលឆាប់ៗ។

កាលពីដើមសប្តាហ៍មុន បន្ទាប់ពីពិធីឡើងកាន់តំណែង ម្ចាស់សេតវិមានថ្មី បានពិព៌នាថា សង្រ្គាមនេះ គឺមានការបង្ហូរឈាមឃោរឃៅ និងគួរឲ្យអស់សំណើច។ ប្រធានាធិបតីមហា​សេដ្ឋី​​រូបនេះ ក៏បានគំរាមប្រទេសរុស្ស៊ីអំពីការដាក់ទណ្ឌកម្មថ្មីខាងសេដ្ឋកិច្ច ប្រសិនបើរុស្ស៊ីមិន​ព្រម​អង្គុយចុះសម្រាប់កិច្ចសន្ទនា។

ក៏ប៉ុន្តែប្រធានាធិបតីអ៊ុយក្រែន លោកហ្សេឡេនស្គី សារភាពថា មិនអាចនិយាយអំពីការចរចា​ប្រភេទណាដែលនឹងកើតមានឡើង តើអ្វីជារចនាសម្ព័ន្ធនៃដំណើរការនៃកិច្ចចរចា ដោយសារ​តែយើងមិនទាន់មានផែនការរួម ហើយលោកប្រាថ្នាថា សហរដ្ឋអាម៉េរិក អ៊ុយក្រែន រុស្ស៊ី និង​សហភាព​អឺរ៉ុប នឹងពិភាក្សាទម្រង់នៃកិច្ចចរចាជាមួយគ្នា។

ប្រមុខនៃទីស្តីការប្រធានាធិបតីអ៊ុយក្រែន លោកអន់ឌ្រីអ៊ី ឡើម៉ាក ក៏បានអះអាងថា ទីក្រុង​គៀវ​​ប្រឆាំងរាល់កិច្ចចរចាសន្តិភាពរវាងលោកវ្លាឌីមៀ ពូទីន និងលោកដូណាល់ ត្រាំ ដោយ​មិន​​មានអ៊ុយក្រែន។ លោកបរិហារឡើងថា លោកវ្លាឌីមៀ ពូទីន ចង់ចចារអំពីជោគវាសនា​អឺរ៉ុប​​ដោយមិនមានអឺរ៉ុប។

ដោយលើកបង្ហាញដល់សម្ព័ន្ធមិត្តរបស់ខ្លួនកាលពីខែកញ្ញា និងបង្ហាញជាសាធារណៈកាលពី​ពាក់​​កណ្តាលខែតុលា លោកវ៉ូឡូឌីមៀ ហ្សេឡេនស្គី បានលំអិតអំពីផែនការជ័យជម្នះ​របស់​លោក​​​ដោយពិនិត្យឃើញការធានាឲ្យអ៊ុយក្រែនមានសន្តិភាពដោយមានយុត្តិធម៌។​ លោកក៏​បាន​វាយតម្លៃក្នុងវីដេអូមួយ​ដែលផ្សព្វផ្សាយ ថា អ៊ុយក្រែននឹងត្រូវការកងទ័ពអឺរ៉ុប​យ៉ាងហោ​ច​ណាស់ ២០០០០០នាក់ មកនៅលើដីអ៊ុយក្រែន ដើម្បីធានាសន្តិសុខរបស់ប្រទេស​ក្នុង​ករណី​មានបទឈប់បាញ់ និងក៏បញ្ចៀសនូវការឈ្លានពានសាជាថ្មីរបស់រុស្ស៊ីផងដែរ។