លោកដូណាល់ ត្រាំវាយប្រហារលោកប្រធានាធិបតីហ្សេឡេនស្គី ដោយវាយតម្លៃថា ជនផ្តាច់ការគ្មានការបោះឆ្នោត
ក្រោយមួយថ្ងៃនៃការរិះគន់ដ៏មុតស្រួចរបស់លោកដូណាល់ ត្រាំ ប្រឆាំងនឹងអ៊ុយក្រែន ដែល ដូចនឹងសម្លេងរបស់វិមានក្រឹមឡាំង ការផ្លោងពាក្យសំដីដាក់គ្នាកើតមានឡើងរវាងប្រធានាធិបតី លោកវ៉ូឡូឌីមៀ ហ្សេឡេនស្គី និងប្រធានាធិបតីអាម៉េរិក។
កាលពីថ្ងៃពុធ ទី១៩ ខែកុម្ភៈ លោកប្រធានាធិបតីអាម៉េរិក បានវាយប្រហារដោយពាក្យសំដីជា លើកទី២ ប្រឆាំងនឹងលោកវ៉ូឡូឌីមៀ ហ្សេឡេនស្គី ហើយលោកហ្សេឡេនស្គី ក៏បានចោទប្រកាន់លោកដូណាល់ ត្រាំ ថា បានរស់នៅក្នុងលំហព័ត៌មានក្លែងក្លាយរបស់រុស្ស៊ី។
ចេញពីរដ្ឋហ្វ៉្លរីដា លោកដូណាល់ ត្រាំ បាននិយាយជាច្រើនសារិះគន់មុតស្រួច ដោយចោទប្រកាន់ប្រធានាធិបតីអ៊ុយក្រែន គឺជាជនផ្តាច់ការដោយមិនមានការបោះឆ្នោត។ ការនិយាយ ចេញនេះកើតមានឡើងនៅពេលដែលមានកិច្ចចរចាផ្ទាល់រវាងទីក្រុងមូស្គូ និងសហរដ្ឋអាម៉េរិក បានប្រព្រឹត្តិនៅទីក្រុងរីយ៉ាដ ប្រទេសអារ៉ាប៊ី សាអ៊ូឌីត សម្រាប់ជាលើកទី១ ចាប់តាំងពីការចាប់ផ្តើមនៃសង្រ្គាម។
នៅអំឡុងសន្និសីទកាសែតនៅទីក្រុងគៀវ លោកវ៉ូឡូឌីមៀ ហ្សេឡេនស្គី បានថ្លែងថា ៖ “ប្រធានាធិបតីត្រាំដែលយើងគោរពច្រើន ជាសំណាងមិនល្អ លោករស់នៅក្នុងលំហនៃព័ត៌មានក្លែងក្លាយ។ លោកវាយតម្លៃថា ព័ត៌មានក្លែងក្លាយទាំងនេះមានប្រភពមកពីប្រទេសរុស្ស៊ី។ លោកក៏បានចោទប្រកាន់រដ្ឋបាលលោកត្រាំជួយលោកពូទីនឲ្យចាកចេញពីភាពឯកោជាច្រើនឆ្នាំដោយសារតែលោកខាងលិច។
កាលពីថ្ងៃអង្គារ លោកវ៉ូឡូឌីមៀ ហ្សេឡេនស្គី បានក្លាយជាគោលដៅនៃការវាយប្រហារដោយពាក្យសំដីរបស់ប្រធានាធិបតីអាម៉េរិក ដែលចោទសួរលើភាពជាប្រធានាធិបតីត្រឹមត្រូវតាមច្បាប់របស់លោកហ្សេឡេនស្គី ឆន្ទៈរបស់លោកក្នុងការស្វែងរកដំណោះស្រាយនៃជម្លោះ និងហាក់ ដូចជាទម្លាក់បន្ទុកឲ្យលោកហ្សេឡេនស្គីជាអ្នកទទួលខុសត្រូវនៃការឈ្លានពានរបស់រុស្ស៊ីមកលើប្រទេសខ្លួនឯង។ ទាំងនេះគឺដូចជាសំដីបន្ទរបន្តពីវិមានក្រឹមឡាំង។
នៅក្នុងសេចក្តីថ្លែងដែលបានប៉ះទង្គិចអារម្មណ៍នៅអ៊ុយក្រែន លោកដូណាល់ ត្រាំ បានចោទប្រកាន់ប្រធានាធិបតីអ៊ុយក្រែនថាគ្មានប្រជាប្រិយភាព បានរិះគន់អំពីអវត្តមានការបោះឆ្នោត នៅអ៊ុយក្រែន និងអះអាងថាមួយផ្នែកនៃជំនួយរបស់អាម៉េរិក ត្រូវបានប្រើប្រាស់មិនចំគោលដៅ។
បើយោងតាមការស្ទង់មតិមួយដែលធ្វើឡើងកាលពីដើមខែកុម្ភៈ ឆ្នាំ២០២៥ ដោយវិទ្យាស្ថានអន្តរជាតិនៃ សង្គមសាស្រ្តទីក្រុងគៀវ និងផ្សព្វផ្សាយកាលពីថ្ងៃពុធ ក៏បានឲ្យដឹងថា លោកវ៉ូឡូឌីមៀ ហ្សេឡេនស្គី អាចរីករាយជាមួយនឹងទំនុកចិត្តពីប្រជាជនអ៊ុយក្រែនចំនួន ៥៧%។ ប៉ុន្តែលោក ដូណាល់ ត្រាំ បានបញ្ជាក់ថា មានប្រជាជនអ៊ុយក្រែន ៤% ដែលទុកចិត្តប្រធានាធិបតី ហ្សេឡេនស្គី។ អណត្តិរបស់ប្រធានាធិបតីអ៊ុយក្រែនត្រូវបានផុតនៅខែឧសភា ឆ្នាំ២០២៤ អ៊ុយក្រែនមិនបានរៀបចំការបោះឆ្នោតដោយសារសង្រ្គាម និងច្បាប់អាជ្ញាសឹក នៅខណៈដែលប្រជាជនអ៊ុយក្រែនរាប់លាននាក់បានភៀសខ្លួនទៅបរទេស និង ២០% រស់នៅលើទឹកដីអ៊ុយក្រែនស្ថិតនៅក្រោមការគ្រប់គ្រងរបស់រុស្ស៊ី។
លោកដូណាល់ ត្រាំ បានអះអាងថា ទីក្រុងវ៉ាស៊ុនតុន បានផ្តល់ទឹកប្រាក់ ៣៥០ពាន់លាន ដុល្លារ ទៅអ៊ុយក្រែន ហើយចោទប្រកាន់លោកវ៉ូឡូឌីមៀ ហ្សេឡេនស្គីថា មិនដឹងអំពីទឹក ប្រាក់ ពាក់កណ្តាលទៀតនៅទីណា។ ចំណែកវិទ្យាស្ថានសេដ្ឋកិច្ច IfVV Kiel បានរាប់ឃើញថា ជំនួយ អាម៉េរិកមាន ១១៤,២ ពាន់លានដុល្លារចាប់តាំងពីឆ្នាំ២០២២។
Daily Program
