នៅក្នុងអំឡុងពេលដែលលោកកាឌីណាល់ មីកាអែល ហ្សេនី (Michael Czerny) កំពុងតែដឹកនាំបូជនីយចរក្នុងឆ្នាំមហាករុណាទិគុណ នៅក្នុងនាមសម្តេចប៉ាបហ្រ្វង់ស៊ីស្កូ បានថ្លែងថា ទ្រង់ចង់ឲ្យគ្រីស្តបរិស័ទយកឈ្នះឲ្យបានលើការល្បួងនានា។
លោកកាឌីណាល់បានថ្លែងលើកនិងពន្យល់ដល់អ្នកស្ម័គ្រចិត្តនានា ជាពិសេសគឺយុវជន ត្រៀមរៀបចំអំណរសប្បាយនឹងឆ្នាំនៃករុណាទិគុណកាលពីថ្ងៃទី ០៩ ខែមីនា ឆ្នាំ២០២៥ថា តាមហឫទ័យរបស់សម្តេចប៉ាប គ្រីស្តបរិស័ទគឺត្រូវតែបន្តការតស៊ូប្រឆាំងនឹងការល្បួងនានា ពីព្រោះការល្បួងនេះតែងតែអូសទាញមនុស្សចេញពីអំពើល្អ។
លោកកាឌីណាល់បានលើកឡើងថា កន្លងមកព្រះវិញ្ញាណបានដឹកនាំព្រះយេស៊ូទៅកាន់វាលរហោស្ថាន ជាកន្លែងដែលទ្រង់បានជួបប្រទះនឹងការស្រេកឃ្លាន ការល្បួង និងការតស៊ូ ប៉ុន្តែទ្រង់ក៏បានបង្ហាញយើងពីរបៀបដើម្បីយកឈ្នះលើអំពើអាក្រក់ដែលគេល្បួងឲ្យយើងធ្វើ។
លោកបានលើកឡើងថា ព្រះយេស៊ូបានចូលទៅក្នុងទីរហោស្ថាន ដោយស្ម័គ្រចិត្ត មិនមែនដើម្បីបញ្ជាក់ពីកម្លាំងរបស់ទ្រង់ទេ ប៉ុន្តែដើម្បីធ្វើតាមព្រះហឫទ័យរបស់ព្រះជាម្ចាស់ ដើម្បីទ្រង់យល់ឲ្យច្បាស់អំពីការល្បួងនិងគ្រោះថ្នាក់របស់វា។
លោកកាឌីណាល់បានបន្តទៀតថា ការល្បួងគឺអាចឲ្យយើងអស់សង្ឃឹម ដូច្នេះសូមទុកចិត្តលើសេចក្តីស្រឡាញ់របស់ព្រះជាម្ចាស់៕
Daily Program
