រដ្ឋាភិបាលអន្តរកាលថ្មីនៅក្នុងប្រទេសស៊ីរី បញ្ចូលស្ត្រីកាតូលិកម្នាក់ជាសមាជិក

ប្រធានាធិបតីបណ្តោះអាសន្នស៊ីរី លោក អាមេត អាសារ៉ាអា (Ahmad al-Sharaa ) បានតែងតាំងរដ្ឋាភិបាលអន្តរកាលថ្មីដែលមានរដ្ឋមន្ត្រីចំនួន ២៣ នាក់មកពីមជ្ឈដ្ឋានផ្សេងៗគ្នា រួមទាំង លោកស្រី ហ៊ីន កាបាវាត (Hind Kabawat )ដែលជាស្រ្តីកាតូលិក និងជាស្ត្រីតែម្នាក់គត់នៅក្នុងគណៈរដ្ឋមន្ត្រី។

បន្ទាប់ពីការផ្តួលរំលំរបបប្រធានាធិបតី អាល់ អាសាដ ក្នុងខែធ្នូ ឆ្នាំ ២០២៤ លោកប្រធានាធិបតីបណ្តោះអាសន្នស៊ីរីថ្មី បានប្រកាសកាលពីចុងសប្តាហ៍មុននូវរដ្ឋាភិបាលអន្តរកាលថ្មី ដោយតែងតាំងរដ្ឋមន្ត្រីចំនួន ២៣ នាក់នៅក្នុងគណៈរដ្ឋមន្ត្រីថ្មីដែលមានលក្ខណៈទូលំទូលាយ និងចម្រុះ ដែលមានភារកិច្ចរៀបចំសេចក្តីព្រាងរដ្ឋធម្មនុញ្ញថ្មី និងរៀបចំការបោះឆ្នោតលើកដំបូងរបស់ប្រទេស បន្ទាប់ពីសង្គ្រាមស៊ីវិលជាងមួយទសវត្សរ៍។

គណៈរដ្ឋមន្រ្តីថ្មីនេះគឺមានសមាសភាពគ្រប់តាំងពីគ្រីស្តបរិស័ទ​និង ក្រុមជនជាតិភាគតិចមួយចំនួននៅក្នុងប្រទេសនេះ។

លោកស្រី ហ៊ីន កាបាវាត ត្រូវបាន​​តែងតាំងជារដ្ឋមន្ត្រីក្រសួងការងារ និងសង្គមកិច្ច។ លោកស្រី ជាស្ត្រីតែម្នាក់គត់នៅក្នុងគណៈរដ្ឋមន្ត្រីដែលត្រូវបានតែងតាំង។

លោកស្រីត្រូវបានគេដឹងថា ជាគូប្រជែងនឹងរបបរបស់លោក អាសាដ។ លោកស្រីធ្លាប់ ជាអ្នកតស៊ូមតិរយៈពេលយូរសម្រាប់ការសន្ទនាអន្តរជំនឿ និងសិទ្ធិស្ត្រី ហើយមានបំណងជំរុញឱ្យមានការដាក់បញ្ចូល និងភាពចម្រុះនៅក្នុងដំណើរការកសាងឡើងវិញនៃប្រទេស៊ីរី៕