រដ្ឋសភា នឹង​បោះឆ្នោតផ្លាស់ប្តូរ​រដ្ឋមន្ត្រីក្រសួងការបរទេស ​នៅថ្ងៃស្អែកនេះ​

នៅថ្ងៃស្អែក ​ទី២០ ខែវិច្ឆិកា ឆ្នាំ២០២៤ រដ្ឋសភានៃព្រះរាជាណាចក្រកម្ពុជា នឹងបន្តសម័យប្រជុំរដ្ឋសភាលើកទី៣ នីតិកាលទី៧ ដើម្បី​បោះឆ្នោត​ផ្តល់​សេចក្តីទុកចិត្តលើលោក ប្រាក់ សុខុន ជារដ្ឋមន្ត្រីក្រសួងការបរទេសជំនួសលោក សុខ ចិន្តាសោភា។

យោងតាម​សេចក្តីជូនដំណឹង​របស់រដ្ឋសភា នៅថ្ងៃទី១៩ ខែវិច្ឆកានេះ បាន​ឱ្យដឹងថា រដ្ឋសភា​នឹង​ធ្វើការបោះឆ្នោតផ្តល់សេចក្តីទុកចិត្តលើការកែសម្រួល និងតែងតាំងបំពេញបន្ថែមសមាសភាពរាជរដ្ឋាភិបាល ចំនួន២ រូប គឺលោក ប្រាក់ សុខុន ជាឧបនាយករដ្ឋមន្ត្រី និងជារដ្ឋមន្ត្រីក្រសួ​​ងការបរទេស និងសហប្រតិបត្តិការ អន្តរជាតិ ជំនួស​លោក សុខ ចិន្តាសោភា ជាឧបនាយករដ្ឋមន្ត្រី​។

សេចក្តីជូនដំណឹង បានបន្តថា រដ្ឋសភានឹងធ្វើការពិភាក្សា និងអនុម័តលើយោបល់ស្នើសុំកែសម្រួលចំណងជើងនិងបទប្បញ្ញត្តិនៃសេចក្តីព្រាងច្បាប់ ស្ដីពី ការអនុម័តលុបចោលកិច្ចព្រមព្រៀងស្តីពីការជំរុញ និងសម្រួលពាណិជ្ជកម្មតំបន់ត្រីកោណ អភិវឌ្ឍន៍ កម្ពុជា-ឡាវ- វៀតណាម។

ការពិភាក្សា និងអនុម័តសេចក្តីព្រាងច្បាប់ស្ដីពី ការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ ២០២៣ និងការពិភាក្សា និងអនុម័តសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២៥ ក៏នឹងត្រូវធ្វើការពិភាក្សាផងដែរ៕