មេដឹកនាំព្រះសហគមន៍ជំរុញឱ្យបង្កើនការវិនិយោគលើប្រព័ន្ធផ្សព្វផ្សាយ និងប្រើប្រាស់ AI ឱ្យបានល្អ
អ្នកចូលរួមក្នុងសន្និសីទរយៈពេលបីថ្ងៃនៅទីក្រុងរ៉ូម បានលើកទឹកចិត្តឲ្យអ្នកមានធនធានបង្កើនការវិនិយោគនៅលើប្រព័ន្ធផ្សព្វផ្សាយ និង ប្រើប្រាស់បញ្ញាសិប្បនិម្មិតប្រកបដោយការទទួលខុសត្រូវ។
វ៉ាទីកង់ញូវបានរាយការណ៍ថា នៅក្នុងសន្និសីទអន្តរជាតិរយៈពេល៣ថ្ងៃពីថ្ងៃទី ២៧ ដល់ថ្ងៃទី ២៩ ខែ មករា ឆ្នាំ២០២៥ ដោយក្រសួងប្រព័ន្ធផ្សព្វផ្សាយនិងប្រកាសដំណឹងល្អ។
លោកបូជាចារ្យជនជាតិនីហ្សេរីយ៉ាម្នាក់ ដែលបានចូលរួមនៅក្នុងសន្និសីទនោះ បាននិយាយថា មេដឹកនាំព្រះសហគមន៍កាតូលិក ក៏ដូចជាភាគីពាក់ព័ន្ធទាំងអស់នៅក្នុងព្រះសហគមន៍ គឺបានពិភាក្សាគ្នាពីភាពចាំបាច់ត្រូវចេះប្រព័ន្ធផ្សព្វផ្សាយ ដើម្បីដឹងអំពីសក្តានុពលនៃបច្ចេកវិទ្យា។
លោកបូជាចារ្យក៏បានបន្តទៀតថា មេដឹកនាំព្រះសហគមន៍ក៏បានលើកទឹកចិត្តឲ្យយើងឈ្វេងយល់ពីភាពលំអៀងនៃប្រព័ន្ធផ្សព្វផ្សាយ ដើម្បីកាត់បន្ថយហានិភ័យនៃការបោកបញ្ឆោត ឬឥទ្ធិពលមិនត្រឹមត្រូវ។
លោកបានមានប្រសាសន៍ថា «សន្និសីទនេះគឺជាការដាស់តឿនមួយសម្រាប់ពួកយើង ជាពិសេសនៅពេលដែលយើងត្រូវបានគេ ឃោសនា និងប្រឈមនូវការបញ្ចុះបញ្ចូល ដែលកំពុងកាន់កាប់កន្លែងប្រព័ន្ធផ្សព្វផ្សាយ»។
លោកបានបន្តថា មេដឹកនាំព្រះសហគមន៍ក៏បានជំរុញឲ្យយើងត្រូវក្រោកឡើង ក្រឡេកមើលគ្រោះថ្នាក់នៅចំពោះមុខ ហើយសួរខ្លួនយើងថា តើយើងត្រូវធ្វើអ្វីចំពោះបញ្ហា។
លោកបានបន្តទៀតថា ព្រះសហគមន៍ក៏បានលើកទឹកចិត្តឱ្យអ្នកជំនាញប្រព័ន្ធផ្សព្វផ្សាយធ្វើការរួមគ្នាដើម្បីប្រឈមមុខនឹងសត្រូវរួម ហើយបានជំរុញឱ្យលោកអភិបាលដែលជាអ្នកដឹកនាំតាមភូមិភាគនានា ចាប់អារម្មណ៍លើប្រព័ន្ធផ្សព្វផ្សាយ និងការវិនិយោគលើប្រព័ន្ធផ្សព្វផ្សាយ។
ដោយឡែក លោក ណូអែល ស៊ីយ៉ូម ហ្រ្វេនសួរ (Noel Seyoum Fransua) អភិបាលនៃព្រះសហគមន៍ ហូសានណា ( Hosanna) បានឲ្យដឹងថា យើងត្រូវមានភាពក្លាហានដើម្បីទទួលយកទំនួលខុសត្រូវសម្រាប់ការទំនាក់ទំនង។
លោកបានបន្តថា មនុស្សមួយចំនួនមានភាពវិជ្ជមានក្នុងការប្រើប្រាស់ប្រព័ន្ធផ្សព្វផ្សាយ ប៉ុន្តែអ្នកខ្លះប្រើវេទិកាសម្រាប់ព័ត៌មានក្លែងក្លាយ និងបំភ្លៃរូបភាពរបស់មនុស្ស។
លោកបានមានប្រសាសន៍ថា យើងត្រូវប្រើបច្ចេកវិទ្យាដើម្បីជាប្រយោជន៍ដល់គ្រីស្តសាសនិក។ ដូច្នេះ យើងត្រូវយកចិត្តទុកដាក់លើការផ្លាស់ប្តូរទាំងនេះ ហើយត្រូវប្រុងប្រយ័ត្នកុំឱ្យពាក់ព័ន្ធនឹងការក្លូននៃបញ្ញារបស់មនុស្ស។
លោកបានបន្ថែមថា ប្រាជ្ញាសិប្បនិម្មិតគួរត្រូវបានប្រើសម្រាប់ជាប្រយោជន៍ដល់ព្រះសហគមន៍ លុះត្រាតែយើងដឹង បើយើងមិនដឹងយើងអាចក្លាយជាជនរងគ្រោះ ដូច្នេះ ចូរយើងប្រើវាដើម្បីបង្កើតនូវផលប្រយោជន៍សម្រាប់មនុស្ស៕
Daily Program
