ប្រធានាធិបតីអាមេរិកលោក ចូ បៃដិន បានសម្តែងក្តីសង្ឃឹមថា ដំណើរទស្សនកិច្ចនាពេលថ្មីៗនេះរបស់មេដឹកនាំឥណ្ឌាទៅកាន់អ៊ុយក្រែន និងប៉ូឡូញ នឹងជួយបញ្ចប់សង្រ្គាមរុស្ស៊ី និងអ៊ុយក្រែន ខណៈដែលការវាយប្រហារថ្មីបានសម្លាប់មនុស្សបន្ថែមទៀតកាលពីថ្ងៃអង្គារ៍។
ជាមួយនឹងរបាយការណ៍នៃការស្លាប់ និងការបំផ្លិចបំផ្លាញបន្ថែមទៀតកាលពីថ្ងៃអង្គារ៍ សេតវិមានបាននិយាយថា ប្រធានាធិបតីសហរដ្ឋអាមេរិក បានសរសើរនាយករដ្ឋមន្ត្រីឥណ្ឌា លោក ណារ៉េនដ្រា មូឌី ( Narendra Modi) សម្រាប់ដំណើរទស្សនកិច្ចនៅអ៊ុយក្រែន ដែលជាផ្នែកនៃកិច្ចខិតខំប្រឹងប្រែងដើម្បីបញ្ចប់ជម្លោះបង្ហូរឈាមបំផុតនៅអឺរ៉ុបចាប់តាំងពីសង្គ្រាមលោកលើកទីពីរ។
សេតវិមានបាននិយាយថា មេដឹកនាំទាំងពីរបានសម្តែង "ការគាំទ្រចំពោះការដោះស្រាយជម្លោះដោយសន្តិវិធី ស្របតាមច្បាប់អន្តរជាតិ ដោយឈរលើមូលដ្ឋាននៃធម្មនុញ្ញអង្គការសហប្រជាជាតិ"។
ដំណើរទស្សនកិច្ចកាលពីសប្តាហ៍មុនទៅអ៊ុយក្រែនជាដំណើរទស្សនកិច្ចលើកដំបូងរបស់នាយករដ្ឋមន្ត្រីឥណ្ឌាក្នុងប្រវត្តិសាស្ត្រអ៊ុយក្រែនទំនើប។ វាបានកើតឡើងនៅចំនុចប្រសព្វមួយនៅក្នុងសង្រ្គាមរបស់រុស្ស៊ីប្រឆាំងនឹងអ៊ុយក្រែន ដែលបានចាប់ផ្តើមនៅក្នុងខែកុម្ភៈ ឆ្នាំ ២០២២។
នៅពេលនេះទីក្រុងមូស្គូកំពុងរុញចូលទៅក្នុងទឹកដីអ៊ុយក្រែនភាគខាងកើតយឺតៗ ខណៈដែលទីក្រុង គៀវបានចូលធ្វើ ការលុកលុយឆ្លងព្រំដែនចូលទៅរុស្ស៊ី ។
ទោះបីជាយ៉ាងណាក៏ដោយ លោក មូឌី បានជំរុញឱ្យប្រធានាធិបតីអ៊ុយក្រែន ជួបជាមួយថ្នាក់ដឹកនាំរបស់រុស្ស៊ី ដើម្បីពិភាក្សាអំពីការបញ្ចប់សង្គ្រាម និងបានស្នើឱ្យជួយនាំមកនូវសន្តិភាព។
ដំណើរទស្សនកិច្ចនៅអ៊ុយក្រែនរបស់នាយករដ្ឋមន្ត្រីបានធ្វើឡើងបន្ទាប់ពីលោកបានធ្វើទៅរុស្ស៊ីក្នុងខែកក្កដា ក្នុងថ្ងៃជាមួយគ្នាដែលការវាយប្រហារដោយមីស៊ីលរុស្សីបាញ់ប្រហារទៅលើមន្ទីរពេទ្យកុមារនៅអ៊ុយក្រែន។
អាជ្ញាធរបាននិយាយថា ប្រទេសរុស្ស៊ីបានចាប់ផ្តើមការវាយប្រហារដ៏សាហាវបន្ថែមទៀតទៅលើអ៊ុយក្រែនដោយមីស៊ីល និងយន្តហោះគ្មានមនុស្សបើកនៅព្រឹកថ្ងៃអង្គារ៍មួយថ្ងៃបន្ទាប់ពីទីក្រុងម៉ូស្គូបានធ្វើការវាយប្រហារ "ដ៏ធំ" លើបណ្តាញថាមពលរបស់អ៊ុយក្រែន។
Daily Program
