អស់រយៈពេលជិត១០ឆ្នាំ កិច្ចប្រកាសដំណឹងល្អរបស់ព្រះសហគមន៍នៅកែវ សីមាស្ថិតនៅខេត្តមណ្ឌលគិរី បានចេញជារូបរាង តាមរយៈព្រះវិហារថ្មីដែលអាចផ្ទុកមនុស្សបានជាង១០០នាក់។
ព្រះវិហារដែលមានឈ្មោះថា សន្តយ៉ូសែប កែវសីមា មានទំហំ ៣៦០ម៉ែត្រការ៉េ បានផុសឡើងនៅភូមិស្រែខ្ទុម ឃុំស្រែខ្ទុម ស្រុកកែវសីមា ខេត្តមណ្ឌលគិរី ជាក្តីសង្ឃឹមរបស់គ្រីស្តបរិស័ទជនជាតិដើមភាគតិចពូណងនៃភាគឦសាន្តនៃប្រទេសកម្ពុជា។
«ព្រះវិហារនេះកកើតឡើងដោយមានគ្រីស្តបរិស័ទចំនួន៤រូប ហើយពេលនេះមានចំនួនជិត៤០គ្រួសារ ដែលសុទ្ធសឹងជាជនជាតិភាគតិចពូណង»។ នេះបើតាមសម្តីរបស់លោកបូជាចារ្យផាន បូរី អ្នកទទួលខុសត្រូវព្រះវិហារនេះ មានប្រសាសន៍នាថ្ងៃទី២៨ ខែមិថុនាកន្លងទៅ នាថ្ងៃសម្ពោធព្រះវិហារ។
លោកប្រាប់ទៀតថា សមទ្ធផលទាំងនេះ កើតឡើងដោយសារកិច្ចខិតខំប្រឹងប្រែងរបស់អស់លោកដែលបានចូលរួមប្រកាសដំណឹងល្អ មានទាំងគ្រីស្តបរិស័ទ លោកបូជាចារ្យ និងគ្រូអប់រំជំនឿមួយចំនួន ទោះបីជាផ្លូវលំបាក និងមានឧបសគ្គយ៉ាងណាក៏ដោយ។
លោកបូជាចារ្យរូបនេះបន្ថែមថា សម្រាប់ជនជាតិដើមភាគតិចពូណង ភាគច្រើនពួកគាត់ផ្លាស់ប្តូរជំនឿទាំងគ្រួសារ ព្រោះបើមានមេគ្រួសារម្នាក់ចូល សមាជិកទាំងអស់នឹងចូលរួមជាមួយគ្នាដែរ។
ក្នុងពេលនោះដែរ លោកសូមថ្លែងអំណរគុណដល់គ្រីស្តបរិស័ទដែលមានចិត្តសទ្ធា ផ្តល់កន្លែងសម្រាប់ជួបជុំ និងថ្វាយអភិបូជាកន្លងមកតាំងពីឆ្នាំ២០១៦។
មានប្រសាសន៍ក្នុងធម្មទេសនា ទៅកាន់អ្នកចូលរួមប្រមាណជាង៤០០នាក់ នាថ្ងៃដដែលនោះ លោកអភិបាល សិលា សួន ហង្សលី អភិបាលព្រះសហគមន៍កាតូលិកភូមិភាគកំពង់ចាម ដែលជាអធិបតីប្រាប់ថា នៅក្នុងព្រះបន្ទូលថ្ងៃនេះ ព្រះជាម្ចាស់នឹងធ្វើឱ្យសេចក្តីសុចរិត និងការសរសើរតម្កើងព្រះជាម្ចាស់ដុះពីលើទឹកដីនៅប្រទេសអ៊ីស្រាអែល ប៉ុន្តែថ្ងៃនេះនិយាយអំពីទឹកដីនៅកែសីមានេះ។
លោកអភិបាល បានបន្ថែមទៀតថា ដូច្នេះ ខ្ញុំសង្ឃឹមថាព្រះវិហារនេះ ទៅជាកន្លែងមួយដែលជួយឱ្យបងប្អូនគ្រីស្តបរិស័ទយើង និងអ្នកភូមិនៅទីនេះ មានឱកាសជួបជុំគ្នា ដើម្បីអធិដ្ឋាន ស្តាប់ព្រះបន្ទូលរបស់ព្រះជាម្ចាស់ ទទួលពរដែលមកពីព្រះជាម្ចាស់ និងដើម្បីឱ្យសេចក្តីសុចរិតដុះឡើង។
«សេចក្តីសុច្ចរិតមានន័យថា គឺការរស់នៅបានត្រឹមត្រូវ មានយុត្តិធម៌ មានសេចក្តីសុខសាន្ត មានសន្តិភាព នៅកន្លែងដែលយើងរស់នៅ និងសុំឱ្យមានការលើកតម្កើងព្រះជាម្ចាស់» លោកបន្តថា ដោយសារសេចក្តីនោះយើងនឹងទទួលពរសម្រាប់ភូមិរបស់យើង សម្រាប់ប្រទេសកម្ពុជា និងសម្រាប់ពិភពលោកទាំងមូល។
ក្នុងពិធីនេះដែរ ក៏មានពិធីប្រទានពរលើជួង ដែលនេះជាសញ្ញាដាស់ស្មារតីឲ្យដឹងថា ពេលជួងបន្លឺឡើងជាពេលត្រូវមកព្រះវិហារ។ នេះបើតាមលោកអភិបាលហង្សលី។ លោកបានគូសបញ្ជាក់ថា ព្រះយេស៊ូគង់នៅក្នុងព្រះវិហារ ហើយ «ខ្ញុំចង់ឱ្យព្រះវិហារយើងនៅទីនេះ ឱ្យទៅជាកន្លែងមួយដែលណែនាំឱ្យគេស្តាប់ឮ ព្រះបន្ទូលរបស់ព្រះយេស៊ូដែរ»។
លោកអភិបាលបន្ថែមថា ដូច្នេះ ព្រះវិហារគឺជាកន្លែងអប់រំបន្តជំនឿ ឲ្យគេបានស្គាល់ព្រះយេស៊ូ ជាកន្លែងមួយដែលផ្តល់សេចក្តីសង្ឃឹម។
ជាចុងបញ្ចប់ លោកអភិបាល បានមានប្រសាសន៍ថា យើងអរព្រះគុណព្រះអង្គសម្រាប់ព្រះវិហារថ្មីរបស់យើង សូមព្រះអង្គជួយណែនាំឱ្យព្រះវិហារនេះជួយឱ្យព្រះសហគមន៍កែវសីមា កាន់តែលូតលាស់ទៅមុខតាមព្រះហឫទ័យរបស់ព្រះអង្គ។
ព្រះវិហារសន្តយ៉ូសែប កែវសីមា ត្រូវបានកសាងឡើងដោយមានជំនួយឧបត្ថម្ភពីព្រះសហគមន៍នានាក្នុងស្រុកនិងក្រៅស្រុក ដែលបានចំណាយទឹកប្រាក់អស់៣០៦៨០០ដុល្លារអាមេរិក៕
ដោយ ដាំ សុដា
Daily Program
